Pangentasan 28

₁Kowé mréntaha marang sedulurmu Harun lan anak-anaké, sangka sak tengahé wong Israèl, supaya pada dadi imam ngladèni marang Aku; ya kuwi Harun lan anak-anaké: Nadab, Abihu, Eléazar lan Itamar. ₂Kakangmu Harun kuwi gawèkna sandangan sing sutyi, kanggo ajiné kaluhuran. ₃Kowé mréntaha marang sakkèhé para wong pinter, sing wis Tak kebaki roh kapinteran, pada kongkonen nggawé sandangané Harun, kanggo nyutyèkké dèwèké, supaya dadia imam ngladèni marang Aku. ₄Iki sandangan sing kudu digawé: tutupé dada, kotang éfod, jubah, klambi tenunan apik, serban lan sabuk, ya kuwi sandangan sing sutyi kanggo kakangmu Harun lan anak-anaké, supaya pada dadi imam ngladèni marang Aku. ₅Kanggo kaperluané kuwi dibutuhaké emas, bakal wungu tuwa, bakal wungu nom, bakal abang lan mori lenan alus. ₆Kotangé éfod sing digawé kudu emas, bakal wungu tuwa, wungu nom, bakal abang lan mori lenan tenunan alus, garapané wong pinter. ₇Kotang éfod kuwi ana pundaké tangkepan loro, sing digawé nangkepké ing kiwa lan ing tengen. ₈Sabuk sing kanggo nyingseti kotang éfod kuwi kudu pada gawéané lan digawé dadi siji karo kotang éfod mau, bakalé ya emas, bakal wungu tuwa, wungu nom, abang lan mori lenan alus tenunan. ₉Uga kowé njupuka watu onyx loro lan ing kono diukir jenengé para anaké Israèl. ₁₀Jenengé sing nem ing watu sing siji, lan sing nem ing watu liyané, nurut sanga lairé. ₁₁Tyarané ngukir kaya tukang ngukir watu-watu, mèmper ngukir ségel, kaya mengkono enggonmu ngukir jenengé para anaké Israèl ing watu loro mau; terus wènèhana lés emas ₁₂watu loro kuwi pasangen ing pundaké kotang éfod dadi watu-watu pengéling-éling kanggo wong Israèl; Harun sing kudu nggawa jenengé ing pundaké marang ing ngarepé GUSTI lan dadia pengéling-éling. ₁₃Kowé uga nggawéa lés emas, ₁₄uga ranté emas murni rong iji, ranténé terus gawénen tali kaya klabangan ranté sing wis gawé tali terus gandèngna karo lés-lés mau.

₁₅Lan kowé kudu nggawé tutupé dada, piranti kanggo nibakké putusan, garapané wong pinter. Gawéané pada kaya kotang éfod, sing digawé: emas, bakal wungu tuwa, wungu nom, abang lan mori lenan alus tenunan sing bolahé ditenun. ₁₆Modèlé pesagi lan rangkep loro, dawané sak kilan ambané ya sak kilan, ₁₇kuwi pasangana watu-watu patang larik. Larikan kaping pisan: watu yaspis abang, topas lan smarak. ₁₈Larikan kaping pindo: watu abang, lazurit lan yaspis. ₁₉Larikan kaping telu: watu yasinta, agaat lan ametis. ₂₀Larikan sing kaping papat: watu turkoois, onyx lan jaspis, kabèh pada gawèkna lés emas, kaya mengkono watu-watu mau kabèh ketalènan ing lés. ₂₁Watu-watu kuwi pasangen jenengé para anaké Israèl, mulané tyatyahé kudu rolas. Lan ing saben watu diukir jenengé, manut turunané rolas, kaya tyarané nggawé ségel. ₂₂Tutupé dada kuwi pasangen ranté emas murni rupa klabangan, penggawéné kaya tali nam-naman. ₂₃Uga pasangana gelangan emas rong iji, gelangan kuwi pasangen ing pojokané tutupé dada loro pisan. ₂₄Ranté emas loro mau pasangen ing gelangan loro kuwi, ing pojoké tutupé dada. ₂₅Putyuké ranté loro kuwi lebokna ing tali loro mau; kaya mengkono enggonmu masang kuwi ing pundaké éfod panggonané ing ngarep. ₂₆Lan menèh nggawéa gelangan emas loro, pasangen ing pojokané tutupé dada loro pisan, ing pinggir njeruh sing temumpang ing kotang éfod. ₂₇Karo menèh nggawéa gelangan emas loro pasangen ing pundaké kotang éfod, sisih ngisor panggonan ngarep, mèpèt ing sambungané, ing sak nduwuré sabuké kotang éfod. ₂₈Sakwisé mengkono gelang tutupé dada kuwi pada talènana menduwur olèh gelangé kotang éfod karo tali wungu tuwa temumpang ing nduwur sabuké kotang éfod, lan tutupé dada kuwi ora kena kok pisah karo kotangé éfod. ₂₉Mengkono Harun enggoné nggawa jenengé para anaké Israèl ing sak nduwuré atiné dumunung ing tutupé dada piranti kanggo nibakké putusané kuwi yèn mlebu ing panggonan sutyi, supaya dadia pengéling-éling sing tetep ing ngarepé GUSTI. ₃₀Lan ing tutupé dada piranti kanggo nibakké putusané kuwi pasangana Urim lan Tumim, ing sak nduwuré jantungé Harun yèn mlebu ngadep ing ngarepé GUSTI; mengkono Harun enggoné tansah nggawa rampungé putusané kanggo wong Israèl, ing sak nduwuré atiné ing ngarepé GUSTI.

₃₁Karo menèh nggawéa jubahé éfod nganggo bakal wungu tuwa kabèh. ₃₂Guloné anaa ing tengahé; lan nganggo pinggiré mubeng rupa tenunan, kaya klambi tembaga, supaya aja nganti suwèk. ₃₃Ing pungkasané jubah kuwi pasangen gambar woh delima sangka bolah wungu tuwa, bolah wungu nom lan bolah abang mubeng temu gelang, diselang-seling karo klintingan emas, ₃₄dadi saben klintingan emas siji gambar woh delimané siji, ing pinggiré jubah mau mubeng. ₃₅Jubah kuwi dienggo Harun yèn nindakké pangabekti, lan uniné klintingan emas mau bisa krungu yèn mlebu panggonan sutyi ing ngarepé GUSTI lan uga yèn metu, supaya aja nemoni pati. ₃₆Uga nggawéa blèbèkan emas murni lan ing blèbèkan kuwi ukirana tulisan tyarané kaya ngukir ségel, uniné: Sutyi mung kanggo GUSTI. ₃₇Blèbèkan kuwi pasangana tali wungu tuwa, tèmplèkna ing serban ing sisih ngarep. ₃₈Blèbèkan kuwi anaa ing batuké Harun lan Harun kudu nyangga kesalahan kanggo samubarang sing disutyèkké karo wong Israèl, ya kuwi kanggo kabèh sing dadi pisungsung sutyi. Blébékan mau kudu tetep nèmplèk ing batuké, supaya wong Israèl kuwi ketampa ing ngarepé GUSTI.

₃₉Kowé kudu nggawé klambi tenunan apik nganggo mori lenan alus, mengkono uga serban ya sangka mori lenan alus, nanging sabuké kuwi digawé nganggo tenunan werna-werna. ₄₀Uga para anaké Harun kuwi ya gawèkna klambi lan sabuk, ya gawèkna kupluk sing kanggo ajiné kamulyan. ₄₁Sandangan mau enggokna marang kakangmu Harun lan anak-anaké lan sakwisé kuwi terus dijebatani, tetepna lan sutyèkna, supaya pada dadi imam ngladèni marang Aku. ₄₂Lan menèh ya gawèkna tylana mori lenan, digawé nutupi daging kawirangané. Tylana mau dawané wiwit bangkèkané nganti tekan pupuné. ₄₃Kuwi kudu dienggo Harun kabèh anak-anaké yèn mlebu ing Tarup Kumpulan utawa yèn nyedaki mesbèh perlu nindakké pangabekti ing panggonan sutyi, supaya aja nganti kesalahan lan terus mati. Kuwi dadia pernatan ing selawasé kanggo Harun lan para turunané.