Wiwitan 49

₂Pada nglumpuka lan rungokna, hé para anaké Yakub, rungokna tembungé Israèl bapakmu.

₃Rubèn, kowé kuwi mbarepku,

kekuwatanku lan wiwitan kekuwatanku,

sing luwih ing kaluhuran,

sing luwih ing kapinteran,

₄sing mbludak kaya banyu,

nganti wurung enggonmu dadi sing gedé déwé,

awit kowé wis ngunggahi peturoné bapakmu;

waktu kuwi kowé ngrusak kesutyiané.

Peturonku diunggahi.

₅Siméon lan Lévi kuwi pada sedulur,

gamané kanggo gawé meksa.

₆Nyawaku aja nganti katut ing rembukané,

atiku aja mèlu marang paguyupané,

awit sangka nesuné, nganti pada matèni wong

lan sangka ngamuké pada ngetoki ototé dengkulé sapi.

₇Nesuné kenaa ing bebendu,

awit nesuné kuwi kebangeten,

kenaa ing bebendu brangasané,

awit kuwi tanpa guna.

Pada arep tak pentyar ing antarané turunané Yakub

lan tak sebar ing antarané turunané Israèl.

₈Yéhuda, kowé kuwi bakal dilem karo sedulur-sedulurmu,

tanganmu bakal nyekeli gitoké mungsuhmu,

anak-anaké bapakmu bakal pada mbungkuk ing ngarepmu.

₉Yéhuda kuwi kaya anak singa,

sakwisé nubruk memangsané, terus munggah ing panggonan sing duwur, anakku!

Ijik ndekem lan njerum kaya anak singa lanang utawa kaya singa wadon,

sapa sing wani nangèkké?

₁₀Tekené kraton bakal ora ngalih sangka Yéhuda,

utawa lambangé pemrintahan sangka antarané sikilé,

nganti tekané Silo,

sing bakal disujuti bangsa-bangsa.

₁₁Kimaré bakal dityentyang ing wit anggur

lan kimaré ing wit anggur pilihan.

Sandangané dikumbah nganggo anggur

lan jubahé ing abangé woh anggur.

₁₂Mripat abang karo kekuwatané anggur

lan untuné putih karo kekuwatané mèlek.

₁₃Sébulon bakal manggon ing pinggir segara,

bakal dadi pelabuhané kapal,

tapel watesé ing panggonané Sidon.

₁₄Isakar kuwi kaya kimar sing kuwat balungé,

sing ndekem diapit ing momotané,

₁₅bareng weruh yèn panggonan lèrèné kepénak lan negarané nyenengké,

terus dipapanké gegeré terus nggawa momotan,

sak terusé dadi wong sing kena ing penggawéan peksa.

₁₆Dan kuwi bakal ngadili bangsané

kaya salah sijiné taler Israèl.

₁₇Supaya Dan kuwi kaya ula ing dalan,

kaya ula upas ing dalan

sing nyokot tungkaké jaran,

nganti sing numpak tiba nggeblak.

₁₈Duh GUSTI, kula njagakké keslametan sing sangka Panjenengan.

₁₉Gad kuwi bakal diserang karo grombolan,

nanging bakal gentèn nyerang tungkaké.

₂₀Kanggo Asyèr kuwi pangané bakal lubèr-lubèr,

malah bakal ngladèni pangané ratu-ratu.

₂₁Naftali kuwi kaya kidang wadon alasan,

kuwi bakal nglairké tetembungan sing apik-apik.

₂₂Yosèf kuwi kaya wit wowohan sing nom,

wit wowohan sing nom ing pinggir sumber.

Pangé pada ngungkuli pager témbok.

₂₃Senajan panah-panahé nggoda,

pada manah lan nyerang,

₂₄nanging panahé tetep kentyeng,

lan tangané pada tetep tyepet

awit sangka pitulungan Sing Mahakwasa, Kekuwatané Yakub,

awit sangka pangoné Gunung Watu Israèl,

₂₅awit sangka Gusti Allahé bapakmu sing bakal mitulungi kowé,

lan awit sangka Sing Mahakwasa sing mberkahi kowé,

karo berkah sing lubèr sangka langit nduwur,

berkah sangka telengé segara sing ana ngisor,

berkah sangka susu lan weteng.

₂₆Berkahé bapakmu kuwi ngungkuli berkahé gunung-gunung wiwit jaman mbiyèn,

ya kuwi sing luwih karo sedepé ing puntuk-puntuk sing wis pirang-pirang abad anané;

kabèh mau bakal mudun ing sirahé Yosèf,

ing embun-embunané wong sing gedé ing antarané para seduluré.

₂₇Bényamin kuwi kaya asu alasan nubruk,

ing wantyi ésuk mangan memangsané

lan ing wantyi soré ngedum rayahané.”