Yésaya 29

₁Tyilaka Arièl, Arièl,

kuta panggonan tarup-tarupé Daved!

Taun nggantèni taun

riyaya bèn terus-terusan dianakké.

₂Aku bakal nggawé susahé Arièl,

terus wong pada sambat lan ngaduh-aduh,

lan kuta kuwi bakal kaya pawon kanggo Aku.

₃Aku bakal masang tarup ing kabèh kéblat ngepung kowé,

lan nggawé panggung-panggung penjagan kanggo mèpètké kowé,

uga bakal ngedekké pager-pager kanggo ngepung kowé.

₄Ing kono kowé bakal ngasorké awakmu lan kowé terus nyuwara sangka sak njeruhné bumi,

tembung-tembungmu krungu lamat-lamat sangka sak njeruhné lebu;

swaramu uniné bakal kaya swarané roh préwangan sangka sak njeruhné lemah,

lan tembung-tembungmu bakal krungu kaya bisik-bisikan sangka sak njeruhné lebu.

₅Nanging sak kabèhé suradadu mungsuhmu bakal entèk ilang kaya awu sing lembut,

lan sak kabèhé wong sing rosa-rosa gemunggung

bakal dadi kaya kulit gabah sing mawut kabur.

Awit dadakan sak kedèpé mripat,

₆kowé bakal weruh tekané GUSTI sing ngwasani langit lan bumi

ing njeruhné gluduk, lindu lan swara sing ngidap-idapi,

ing njeruhné lésus lan prahara

lan ing njeruhné geni sing ngobong nganti resik.

₇Kabèh suradaduné para bangsa

sing perang nglawan Arièl,

lan sak kabèhé wong sing merangi kuta kuwi uga bèntèngé

lan para wong sing ngrusuhi

bakal kaya impèn lan kaya wahyu ing wantyi mbengi;

₈kaya wong ngelih sing ngimpi ijik mangan,

bareng tangi wetengé ijik kosong,

utawa kaya wong ngelak sing ngimpi ijik ngombé,

bareng tangi nyatané ijik kesel, gorokané ijik ngelak,

kaya mengkono bakal kedadiané sak kabèhé suradadu para bangsa

sing perang nglawan gunung Sion.

₉Pada mlongo karo kebak nggumunaké,

mripatmu bèn merem lan lamur!

Pada mendema, nanging ora awit sangka anggur,

pada mumeta, nanging ora awit sangka ombèn keras!

₁₀Awit GUSTI wis ndadèkké kowé pada turu kepati;

mripatmu - ya kuwi para nabi - wis meremaké

lan praupanmu - ya kuwi para wong tukang ndelok - wis dikudungi.

₁₃Lan Gusti Allah wis ngomong mengkéné:

“Awit bangsa iki teka mung karo tutuké

lan ngluhurké Aku mung karo lambéné,

nanging atiné ngedohi Aku,

lan enggoné ngabekti marang Aku

kuwi mung awit sangka préntahé manungsa sing diapalaké,

₁₄mulané Aku bakal nindakké

mujijat marang bangsa iki,

mujijat sing ngidap-idapi;

kawityaksanané para wong sing wityaksana bakal ilang,

lan kepinterané para wong sing pinter bakal ndelik.”

₁₅Tyilaka wong sing ndelikké

rantyamané ing ngarepé GUSTI,

sing penggawé-penggawéné dilakoni ing pepeteng

karo ngomong: “Sapa sing weruh kita lan sapa sing nitèni kita?”

₁₆Kepriyé ta, kowé kok pada molak-maliké samubarang kabèh?

Apa lempung iki kena dianggep pada karo tukang kendi,

terus sing digawé bisa ngomong bab sing nggawé:

“Duduk wong kuwi sing nggawé aku,”

lan apa sing dibangun bisa ngomongké bab sing mbangun:

“Wong kuwi ora ngerti apa-apa?”

₁₇Apa ora mung kurang sedilut,

enggoné Libanon bakal malih dadi kebon wowohan,

lan kebon wowohan bakal dianggep alas?

₁₈Ing waktu kuwi para wong budek

bakal pada krungu tetembungan sangka sakwijiné kitab,

awit sangka wis luwar sangka klimengan lan pepeteng

mripaté para wong lamur bakal weruh.

₁₉Para wong sing ngalami sangsara ing njeruhné GUSTI bakal mundak banget enggoné seneng-seneng,

lan para wong mlarat ing sak tengahé para manungsa bakal surak-surak awit sangka sing Mahasutyi, sangka Israèl!

₂₀Awit wong sing kuwat lan gemunggung bakal ora ana lan tukang nindes bakal entèk,

lan sak kabèhé wong sing nduwé kekarepan ala bakal dientèkké,

₂₁ya kuwi para wong sing angger waé ngarani wong liyané nindakké dosa ing sakwijiné perkara,

sing masang kala jiret marang wong sing ngélingké ing gapura,

lan sing ndesek wong bener karo sing ora-ora.

₂₂Awit sangka kuwi mengkéné tembungé GUSTI, Gusti Allahé turunané Yakub,

ya kuwi sing wis ngluwari Abraham:

“Wiwit saiki Yakub ora bakal kewirangan menèh

lan praupané ora bakal putyet menèh.

₂₃Awit waktu wong-wong mau, ya kuwi turunané Yakub,

pada ndeleng apa sing ditindakké karo tangan-Ku ing sak tengahé,

terus bakal pada nyutyèkké asma-Ku;

bakal pada nyutyèkké sing Sutyi, Gusti Allahé Yakub

lan bakal pada gemeter ing ngarepé Gusti Allahé Israèl;

₂₄para wong sing pikirané kesasar, bakal pada olèh pangertèn,

lan para wong sing grundelan bakal pada nampa piwulang.”