Yohanes 13

₁Nalika arep tekané dina riyaya Paskah, Yésus wis weruh, yèn wis tekan wantyiné enggoné bakal lunga sangka ndonya iki nemoni marang Bapak. Pada kayadéné Panjenengané enggoné tansah trésna marang para duwèké ing ndonya, mengkono uga saiki Panjenengané enggoné trésna kuwi nganti tekan ing pungkasané. ₂Nalika pada mangan bebarengan, iblis wis mbisiki rantyaman ing atiné Yudas Iskariot, anaké Simon, supaya ngiyanati Panjenengané. ₃Yésus weruh, yèn Bapak wis masrahké samubarang kabèh marang Panjenengané lan yèn Panjenengané kuwi tekané sangka Gusti Allah lan mulih marang Gusti Allah. ₄Yésus terus ngadek lan ngutyuli jubahé. Panjenengané njupuk mori terus diubetké ing Panjenengané, ₅terus ngesokké banyu ing wadah, lan wiwit ngisuhi sikilé para muridé lan diulapi karo mori sing diubetké ing Panjenengané mau. ₆Bareng tekan gilirané Simon Pétrus. Pétrus terus ngomong: “Gusti, Panjenengan arep ngisuhi sikil kula?” ₇Yésus nyauri, tembungé: “Apa sing tak tindakké, saiki kowé durung nyandak tegesé, nanging mbésuk kowé bakal mengertèni.” ₈Pétrus ngomong marang Panjenengané: “Panjenengan aja nganti ngisuhi sikil kula ing sak lawasé.” Yésus nyauri, tembungé: “Yèn Aku ora ngisuhi kowé, kowé ora nduwé panduman ing Aku.” ₉Semauré Simon Pétrus marang Panjenengané: “Gusti, aja mung sikil kula waé, nanging uga tangan lan sirah kula pisan.” ₁₀Yésus nyauri, tembungé: “Sapa waé sing wis adus, ora usah adus menèh, kejaba mung ngisuhi sikilé waé, awit badané sekujur wis resik. Mengkono uga kowé kuwi wis resik, mung waé ora kabèh.” ₁₁Awit Panjenengané weruh sapa sing bakal ngiyanati Panjenengané. Awit sangka kuwi Panjenengané ngomong: “Kowé kuwi ora kabèh resik.”

₁₂Sakwisé ngisuhi sikilé para muridé mau, Panjenengané nganggo jubahé menèh terus njagong lan ngomong: “Apa kowé pada mengertèni tegesé penggawéan-Ku marang kowé iki mau? ₁₃Kowé pada nyebut Aku Guru lan Gusti, lan panyebutmu kuwi bener, awit Aku iki pantyèn Guru lan Gusti. ₁₄Dadi yèn Aku iki sing dadi Gusti lan Gurumu wis ngisuhi sikilmu, dadi kowé ya pada wajip pada gentènan ngisuhi sikil. ₁₅Awit Aku wis ngekèki tulada marang kowé, supaya kowé kabèh uga nindakké kaya sing wis Tak tindakké marang kowé. ₁₆Sak temené Aku ngomong marang kowé: Abdi kuwi ora ngungkuli bendarané, utawa kongkonan ya ora ngungkuli sing ngutus. ₁₇Yèn kowé pada mengertèni perkara kuwi kabèh, rahayu kowé, yèn kowé kabèh pada nglakoni.

₁₈Tembung-Ku iki ora kanggo kowé kabèh. Aku weruh, sapa sing wis Tak pilih. Nanging kudu kedadian tenan tulisan sing tembungé ngéné: Wong sing mèlu mangan roti-Ku, kuwi wis ngangkat tungkaké marang Aku. ₁₉Saiki kowé pada Tak omongi sak durungé bab kuwi kelakon, supaya yèn bab kuwi kelakon, kowé pada pertyaya, yèn ya Aku iki Panjenengané. ₂₀Sak temené Aku ngomong marang kowé, sapa sing nampani wong sing Tak utus, kuwi nampani Aku; lan sapa sing nampani Aku, kuwi nampani Panjenengané sing ngutus Aku.”

₂₁Sakwisé Yésus ngomong mengkono, Panjenengané banget trenyuh ing ati, terus ngekèki paseksi ngéné: “Sak temen-temené Aku ngomong marang kowé: Wong siji sangka tunggalmu bakal ngiyanati Aku.” ₂₂Para muridé terus pada pandeng-pandengan, karo mangga-mara sapa sing dikarepké kuwi. ₂₃Salah sijiné muridé, ya kuwi muridé sing ditrésnani Panjenengané, lungguh sèndèn sandingé Panjenengané, ing sisih tengené. ₂₄Muridé kuwi mau dibisiki karo Simon Pétrus lan diomongi: “Njaluka weruh sapa sing diomongné kuwi.” ₂₅Muridé sing lungguh tyedak Yésus mau terus nolèh lan ngomong marang Panjenengané: “Gusti, sapa wongé?” ₂₆Yésus nyauri: “Wongé ya kuwi sing bakal Tak wènèhi roti sakwisé Tak tyelupké.” Sakwisé ngomong mengkono, terus njupuk roti lan dityelupké terus dikèkké marang Yudas, anaké Simon Iskariot. ₂₇Lan sakwisé nampani roti kuwi, Yudas terus ketèmpèlan sétan. Yésus terus ngomong marang Yudas: “Apa sing arep kok lakoni, kuwi gelis tindakna!” ₂₈Nanging ora ana wong siji-sijia ing antarané para muridé sing pada kembulan kuwi sing mengertèni, apa karepé Yésus ngomong mengkono marang Yudas kuwi. ₂₉Awit Yudas sing nyekel kas duwit, ana sing nduwé pangira yèn Yésus ngutus wong kuwi tuku apa-apa sing perlu kanggo riyaya kuwi, utawa dipréntahké ngekèki apa-apa marang wong mlarat. ₃₀Yudas nampani roti kuwi terus gelis-gelis lunga. Nalika kuwi wantyiné wis mbengi.

₃₁Sakwisé Yudas lunga, Yésus terus ngomong: “Saiki Putrané Manungsa diluhurké lan Gusti Allah diluhurké ing Panjenengané. ₃₂Yèn Gusti Allah diluhurké ing Panjenengané, Gusti Allah ya bakal ngluhurké Panjenengané ing Panjenengané piyambak, malah Panjenengané terus bakal diluhurké. ₃₃Hé, anak-anak-Ku, enggon-Ku ngantyani kowé mung kari sedilut. Kowé bakal pada nggolèki Aku, kayadéné enggon-Ku wis ngomongi marang wong Ju: Menyang ngendi paran-Ku, kowé ora bakal pada bisa mrana; mengkono uga saiki Aku ngomong marang kowé.

₃₄Aku ngekèki pepakon anyar marang kowé, ya kuwi supaya kowé pada trésna-tinrésnaa; kaya enggon-Ku wis trésna marang kowé, kaya mengkono uga kowé ya pada trésna-tinrésnaa. ₃₅Karo mengkono wong kabèh bakal pada mengertèni, yèn kowé pada dadi murid-Ku, ya kuwi yèn kowé pada trésna-tinrésnan.”

₃₆Simon Pétrus terus ngomong: “Gusti, Gusti lunga menyang ngendi?” Semauré Yésus: “Menyang ngendi paran-Ku, kowé ora bisa mèlu Aku saiki, nanging mbésuk kowé bakal pada mèlu Aku.” ₃₇Pétrus ngomong marang Panjenengané: “Gusti, kenèng apa kula ora bisa mèlu Gusti saiki? Kula arep nanggungké nyawa kula kanggo Gusti.” ₃₈Semauré Yésus: “Nyawamu bakal kok kèkké kanggo Aku? Sak temen-temené Aku ngomong marang kowé: Sak durungé pitik jago kluruk, kowé wis nyélaki Aku dibalèni kaping telu.”