Ayub 19

₂“Nganti pira suwéné enggonmu pada nglarakké atiku

lan ngremuk aku karo tetembungan?

₃Saiki wis kaping sepuluh enggonmu ngrèmèhké aku,

kok ora isin nglarani aku.

₄Yèn aku iki pantyèn kesasar,

apa ora aku déwé sing nanggung enggonku kesasar kuwi.

₅Yèn kowé tenan-tenan arep ngegung-ngegungké uripmu ing ngarepku,

lan tyatyatku kok gawé bukti kanggo aku,

₆pada ngertia, yèn Gusti Allah wis nandangi ora adil marang aku,

lan aku dikrukup karo jaringé.

₇Lah aku mbengok: ‘Penindesan!’ nanging ora ana sing nyauri.

Aku sambat njaluk tulung, nanging ora ana pengadilan.

₈Dalanku dialang-alangi karo témbok, terus aku ora bisa liwat,

lan dalan-dalanku didadèkké peteng.

₉Kaluhuranku karo Panjenengané wis didèdèli,

lan makutaku wis dirampas sangka sirahku.

₁₀Aku dibongkar babar pisan terus aku entèk,

lan pengarep-arepku dijebol kaya wit-witan.

₁₁Bebenduné marang aku mulat-mulat,

aku dianggep mungsuhé.

₁₂Suradaduné maju bebarengan,

ngalang-alangi dalan nglawan marang aku,

terus ngepung tarupku.

₁₃Sedulurku pada didohké sangka aku,

lan kantya-kantyaku pada pangling babar pisan marang aku.

₁₄Sanak sedulurku pada ngedoh

lan kantyaku pada lali marang aku.

₁₅Wong-wong sing tunggal sak omah karo aku lan para batur wadon

pada ngarani aku wong liyané,

lan nganggep aku wong mantya.

₁₆Baturku tak undang, ora semaur,

ndadak kudu tak bujuk karo tembung alus.

₁₇Bojoku ora betah mambu ababku,

lan ambuku bosok kanggo para sedulurku tunggal bapak ibu.

₁₈Uga botyah-botyah pada ngrèmèhké aku;

yèn aku arep ngadek terus diisin-isin.

₁₉Kabèh kantyaku sing apik pada mukok weruh aku,

lan sing tak trésnani pada ninggal aku.

₂₀Kulit lan dagingku pada kelèt karo balungku

mung kèri gusiku sing ijik.

₂₁Melasa marang aku, melasa marang aku, hé, kantya-kantyaku,

awit aku digepok karo tangané Gusti Allah.

₂₂Kenèng apa kowé pada ngoyak-oyak aku, kaya Gusti Allah

lan kok ora warek enggonmu mangan dagingku?

₂₃Aduh, supaya tembung-tembungku ditulis

dityateti ing kitab,

₂₄ditatah karo wesi kanggo ngukir lan timbel

ing gunung watu kanggo ing sak lawas-lawasé.

₂₅Nanging aku weruh: Penebusku kuwi urip,

lan ing pungkasané Panjenengané bakal tangi ing lebuné bumi.

₂₆Uga sakwisé kulité awakku rusak banget,

nanging sangka dagingku

aku bakal weruh Gusti Allah,

₂₇sing bakal tak deleng déwé kuwi bakal mbélani aku;

mripatku déwé sing weruh, duduk wong liyané;

telengé atiku banget enggoné kangen.

₂₈Yèn kowé pada ngomong: ‘Aku bakal pada nuntut marang dèwèké,’

lan bakal weruh sebabé perkarané,

₂₉pada wedia marang pedang,

awit nesu kuwi nekaké ukuman pedang,

supaya kowé pada ngertia yèn tenan ana pengadilan.”