Yudas 1

₁Sangka Yudas, abdiné Yésus Kristus lan seduluré Yakobus, marang para sing dipanggil, sing ditrésnani ing Gusti Allah, Bapak lan sing pada dipilih kanggo Yésus Kristus. ₂Kabetyikan, katentreman lan katrésnan malubèra ing kowé kabèh.

₃Para sedulur sing ditrésnani, sak njeruhné aku mbudidaya karo tenanan nulis layang iki marang kowé bab keslametan kita kabèh, aku rumangsa uga nulis iki lan ngomongi kowé, supaya pada tetepa enggonmu ngupaya mbélani pengandel sing wis dikèkké marang para sutyi. ₄Awit ana sakwijiné wong sing wis nlusup ing sak tengahmu, ya kuwi wong sing wis suwé pada dipestèkké bakal diukum: para wong duraka sing nggunakké kawelasané Gusti Allah kita kanggo ngumbar hawa-nepsuné, lan sing nyélaki marang Pangwasa tunggal lan Gusti kita, Yésus Kristus.

₅Nanging senajan kowé wis pada mengertèni kuwi mau kabèh lan ora mangga-mara menèh, aku kepéngin ngélingké kowé, yèn Gusti kuwi pantyèn nylametaké umat duwèké sangka negara Egipte, nanging terus matèni sing pada ora pertyaya. ₆Mengkono uga, para mulékat sing ora pada manut marang wates-watesé kwasané, nganti ninggal panggonan sangkané, bakal diukum karo tali banda sing langgeng ing pepeteng, nganti tekané pengadilan ing dina gedé, ₇ya kaya mengkono, Sodom lan Gomora lan kuta-kuta ing sak ubengé, sing karo tyara sing pada, nindakké mlaku bédang, lan pada nguber kemareman sing ora lumrah, wis pada kesiksa ing geni langgeng, kanggo pepéling marang manungsa kabèh.

₈Nanging, para tukang ngimpi uga pada ngregeti badané lan ngrèmèhké pangwasané Gusti Allah lan ora ngajèni marang sak kabèhé kamulyan ing swarga. ₉Malah Mikaèl, penggedéné para mulékat, nalika padu karo iblis bab layoné Moses, ora wani ngadili iblis kuwi nganggo tembung-tembung sing ora ngajèni, nanging mung ngomong ngéné: “Kowé diukum karo Gusti.” ₁₀Nanging wong-wong kuwi pada ora ngajèni samubarang sing ora pada dingertèni lan apa sing pada dingertèni kaya tyarané kéwan sing tanpa pikiran, malah kuwi sing njalari karusakané. ₁₁Tyilaka wong-wong kuwi, awit pada mèlu mlaku ing dalan sing dilakoni karo Kain lan awit nguber upah, njegur ing penyasarané Biléam, nganti pada entèk, awit enggoné mbruntak kayadéné Korah. ₁₂Wong kuwi pada dadi reget ing péstané katrésnanmu, jalaran tanpa pada nduwèni rasa isin ngentèk-entèkké lan mung mentingké awaké déwé. Wong kuwi pada kaya mendung sing tanpa banyu, sing kabur katut karo angin; kaya waé wit-witan sing ora ngetokké woh ing waktu gogrok godongé, kaya wit-witan sing rungkat lan mati babar pisan. ₁₃Kaya waé ombaké segara sing medèni, sing ngumpluké regeté déwé, pada kaya lintang-lintang sing nglembara, sing wis dityepaki panggonan ing jagaté pepeteng langgeng selawasé.

₁₄Hénokh, turunan sing kaping pitu sangka Adam, uga wis ngomongké wong-wong kuwi, tembungé: “Gusti teka diubengi karo para sutyi abdiné sing éwon-éwon tyatyahé, ₁₅arep nindakké pengadilan kanggo wong kabèh, lan nibakké paukuman marang sak kabèhé penggawé mblarah sing pada dilakoni, jalaran sangka sak kabèhé tembung sing ala, sing diutyapké karo para wong dosa sing mblarah kuwi marang Gusti.” ₁₆Kuwi wong sing pada grundelan lan ora nrima karo nasipé, urip nuruti hawa-nepsuné, nanging tutuké pada ngutyapké tembung-tembung sing omong kosong, tembungé ndilat wong, supaya pada olèh untungé.

₁₇Nanging kowé kuwi, para sedulur sing ditrésnani, pada élinga marang tembungé sing mbiyèn wis diomongké marang kowé kabèh karo para rasulé Gusti kita, Yésus Kristus. ₁₈Jalaran kowé wis pada diomongi: “Mbésuk ing jaman pungkasan bakal ana tukang pemoyok, sing mlakuné pada ngumbar hawa-nepsuné sing mblarah.” ₁₉Wong-wong kuwi sing pada njalari tyetyongkrèhan, manungsa kadonyan, sing ora kanggonan Roh Sutyi. ₂₀Nanging kowé, para sedulur sing ditrésnani, pada mbanguna awakmu déwé, karo dasarané pertyayamu sing sutyi déwé, lan ndedongaa ing njeruhné Roh Sutyi. ₂₁Awakmu pada jaganen karo tyara mengkono kuwi, ing sak njeruhné katrésnané Gusti Allah, karo ngentèn-entèni marang kabetyikané Gusti kita, Yésus Kristus, tumuju ing urip langgeng. ₂₂Wong-wong sing atiné ijik mangga-mara pada welasana. ₂₃Wong kuwi pada slametna karo tyara direbut sangka geni. Nanging kétokna welas-asihmu karo rasa wedi marang wong-wong liyané uga, lan pada sengita marang sandangané wong-wong sing diregeti karo kepénginan-kepénginané dosa.

₂₄Kanggo Panjenengané sing kwasa njaga marang kowé kabèh, supaya pada ora kesandung lan mernahké kowé karo tanpa tyiri lan karo kebak kabungahan ing ngarepé kamulyan-Né. ₂₅Gusti Allah mung siji, Juruslamet kita, awit karo Yésus Kristus, Gusti kita, kuwi sing dikèki kamulyan, kaluhuran, kekuwatan lan pangwasa, sak durungé kedadiané jaman, saiki lan nganti tekan selawasé. Amin.