Mika 1

₂Hé, sak kabèhé para bangsa, pada rungokna!

Hé, bumi uga isiné, pada nitènana,

GUSTI bèn dadi seksi kanggo kowé kabèh,

ya Gusti, sangka omahé sing sutyi.

₃Nanging GUSTI metu sangka omahé,

lan medun lan mlaku ing gunung-gunungé bumi.

₄Gunung-gunung pada dadi èntyèr ing sak ngisoré sikilé

lan legokan pada bengkah

kaya lilin tyedak geni,

kaya banyu nggrojok ing udun-udunan.

₅Kuwi kabèh kelakon awit sangka paneraké Yakub,

lan sangka dosané turunané Israèl.

Apa ta paneraké Yakub kuwi?

Kuwi apa ora Samaria?

Dosané turunané Yéhuda kuwi apa ta?

Kuwi apa ora Yérusalèm?

₆Mulané Samaria bakal Tak dadèkké ambruk ing ara-ara,

dadi kebon anggur,

watu-watuné témbok kuta bakal Tak buwangi ing legokan

lan dasar-dasaré bakal Tak bukak.

₇Retya-retyané bakal pada diremuki

lan sak kabèhé upahé laku bédang bakal pada diobong,

lan sak kabèhé brahalané bakal Tak entèkké;

awit kabèh mau diklumpukké karo upahé laku bédang,

mulané bakal bali dadi upahé bédang menèh.

₈Awit sangka perkara mengkono kuwi aku arep sambat lan ngaduh-aduh,

arep mlaku tanpa sepatu lan wuda,

tangisanku bakal kaya tangisé asu alas,

lan sambatku kaya sambaté manuk unta.

₉Awit tatuné Samaria ora bisa waras,

wis mrèmèn nganti tekan ing Yéhuda,

malah tekan ing gapurané bangsaku,

ya ing Yérusalèm.

₁₀Aja kok wartakké ing Gat,

aja nangis babar pisan,

kowé nglésota ing lebu ing Bèt-Le-Afra.

₁₁Hé wong isiné Safir, gelis budala,

karo wuda lan kewirangan.

Wong isiné Saanan

ora wani metu.

Tangisé Bèt-Haésel ngalang-alangi enggonmu

tetep ing kono.

₁₂Wong isiné Marot karo mangga-mara

ngarep-arep marang kabetyikan,

awit ana tyilaka mudun sangka GUSTI

tekan ing gapurané Yérusalèm.

₁₃Hé wong isiné Lakis,

krétamu rakitana jaran perang.

Iki sing dadi wiwitané dosa

kanggo putriné Sion

awit kowé kanggonan

dosané Israèl.

₁₄Mulané apik kowé ngekèkana berkah pisahan

marang Moreset-Gat,

omah-omah ing Aksib

bakal dadi sing ala kanggo para ratu ing Israèl.

₁₅Hé wong isiné Maresa,

Aku ijik bakal nekakké tukang nelukké marang kowé,

kamulyané Israèl, para pemimpiné

bakal minggat tekan ing Adulam.

₁₆Tyukura lan gundulen,

awit sangka anak-anakmu sing pada kok trésnani!

Gundul kaya manuk gagak,

awit anak-anakmu kuwi bakal pada dilungakké

ing pembuwangan.