Itungan 1

₁Waktu taun sing kaping pindo ing sasi kaping pindo ing tanggal sepisan sakwisé pada metu sangka negara Egipte, GUSTI ngetokké tembung marang Moses ana ara-ara samun ing gunung Sinai ing sak njeruhné Tarup Kumpulan: ₂“Kowé ngitunga umat Israèl kabèh manut kulawargané ing sak njeruhné taleré, sakkèhé wong lanang ing Israèl tulisana jenengé siji-sijiné, ₃sing umuré rong puluh taun munggah, sing wis bisa perang, kuwi itungana karo Harun manut golongané déwé-déwé. ₄Lan sing kanggo ngréwangi kowé saben taler wong siji, kanggo penggedéné kulawargané. ₅Iki jenengé wong-wong sing pada kanggo ngréwangi kowé: Sangka taler Rubèn: Elizur anaké Syédéur; ₆sangka taler Siméon: Sélumièl anaké Surisyadai; ₇sangka taler Yéhuda: Nahason anaké Aminadab; ₈sangka taler Isakar: Nétanéèl anaké Suar; ₉sangka taler Sébulon; Eliab anaké Helon; ₁₀kanggo turunané Yosèf, sangka taler Efraim: Elisama anaké Amihud; lan sangka taler Manasé: Gamalièl anaké Pedasur; ₁₁sangka taler Bényamin: Abidan anaké Gidéoni; ₁₂sangka taler Dan: Ahiézer anaké Amisyadai; ₁₃sangka taler Asyèra: Pagièl anaké Okran; ₁₄sangka taler Gad: Elyasaf anaké Rehuèl; ₁₅sangka taler Naftali: Ahira anaké Enan.” ₁₆Kuwi wong sing dipilih sangka antarané para umat kuwi, siji-sijiné dadi penggedéné taler para leluhuré, kuwi pada dadi penggedéné suradadu Israèl.

₁₇Moses lan Harun terus nyeluk wong-wong sing wis pada disebut jenengé mau. ₁₈Bareng tanggal sepisan sasi kaping pindo terus pada nglumpukké kabèh pasamuan. Sakwisé mengkono terus diitungi para wong Israèl miturut turunané sing ketemu ing saben taler. Wong-wong sing umuré rong puluh taun munggah ditulisi jenengé siji-sijiné, ₁₉kaya sing dipréntahké karo GUSTI marang Moses. Mengkono Moses enggoné ngitungi umat ing ara-ara samun Sinai.

₂₀Kanggo turunané Rubèn mbarepé Israèl kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang, pada ditulisi jenengé déwé-déwé. ₂₁Gunggungé sangka taler Rubèn sing ketulis kuwi ana 76.500 wong.

₂₂Kanggo turunané Siméon kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang, pada ditulisi jenengé déwé-déwé. ₂₃Gunggungé sing ketulis sangka taler Siméon ana 59.300 wong.

₂₄Kanggo turunané Gad kuwi miturut turunané ing taleré, tyatyahé wong lanang sing umuré rong puluh taun munggah, sing wis bisa perang pada ditulisi jenengé. ₂₅Gunggungé sing ketulis sangka taler Gad kuwi ana wong 44.650.

₂₆Kanggo turunané Yéhuda kuwi miturut turunané, tyatyahé wong lanang sing umur rong puluh taun munggah, sing wis bisa perang pada ditulisi jenengé. ₂₇Gunggungé sing ketulis sangka taler Yéhuda kuwi ana 74.600 wong.

₂₈Kanggo turunané Isakar kuwi manut turunané ing taler, tyatyahé wong lanang sing umur rong puluh taun munggah, sing wis bisa perang pada ditulisi jenengé. ₂₉Gunggungé sing ketulis sangka taler Isakar kuwi ana 54.400 wong.

₃₀Kanggo turunané Sébulon kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang pada ditulisi jenengé. ₃₁Gunggungé sangka taler Sébulon sing ketulis kuwi ana 57.400 wong.

₃₂Kanggo turunané Yosèf, sing mlebu getihé Efraim kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang pada ditulisi jenengé. ₃₃Gunggungé sangka taler Efraim sing ketulis kuwi ana wong 40.500. ₃₄Sing mlebu getihé Manasé, manut turunané ing taleré, tyatyahé wong lanang sing umur rong puluh taun munggah, sing wis bisa perang pada ditulisi jenengé. ₃₅Gunggungé sangka taler Manasé sing ketulis kuwi ana 32.200 wong.

₃₆Kanggo turunané Bényamin kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang, pada ditulisi jenengé. ₃₇Gunggungé sangka taler Bényamin sing ketulis kuwi ana 35.400 wong.

₃₈Kanggo turunané Dan kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang pada ditulisi jenengé. ₃₉Gunggungé sangka taler Dan sing ketulis kuwi ana wong 62.400.

₄₀Kanggo turunané Asyèra kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang pada ditulisi jenengé. ₄₁Gunggungé sangka taler Asyèra sing ketulis kuwi ana wong 41.500. ₄₂Kanggo turunané Naftali kuwi miturut turunané ing taleré, tyatyahé wong lanang sing umur rong puluh taun munggah, sing wis bisa perang, pada ditulisi jenengé. ₄₃Gunggungé sangka taler Naftali sing ketulis kuwi ana wong 53.400.

₄₄Semono okèhé sing pada diitung karo Moses lan Harun lan para penggedéné wong Israèl rolas, sing siji-sijiné makili taleré. ₄₅Dadi sakkèhé wong Israèl sing diitung miturut taleré sing umur rong puluh taun munggah, sing wis bisa perang ing sak tengahé wong Israèl, ₄₆gunggungé 603.550 wong.

₄₇Nanging wong-wong sing mlebu turunané Lévi, kuwi enggoné diitung ora tyampur karo wong-wong kuwi, ₄₈awit Moses wis diomongi karo GUSTI, mengkéné: ₄₉“Mung taler Lévi kuwi aja kok tyateti lan aja kok itung tyatyahé bebarengan karo wong Israèl, ₅₀nanging kuwi pada dadia sing njaga Tarup Sutyi, panggonan pernatan uga prabot lan pirantiné kabèh; pada nggotonga Tarup Sutyi lan kabèh pirantiné; lan pada ngladèni nang kono, uga enggoné manggon ing sak ubengé. ₅₁Yèn Tarup Sutyi budal, wong Lévi sing kudu ngutyuli, lan yèn lèrèn, wong Lévi sing kudu ngedekké; yèn ana wong lumrah sing nyedaki, diukum pati. ₅₂Wong Israèl yèn pada manggon, siji-sijiné manggona ing tarupé déwé-déwé, tyedak karo gendéra gendérané, manut golongané, ₅₃nanging wong Lévi kudu manggon ing sak ubengé Tarup Sutyi panggonané angger-anggeré Gusti Allah, supaya umat Israèl aja nganti kena ing memala; wong Lévi kudu njaga Tarup Sutyi, panggonané angger-angger kuwi.”

₅₄Nanging wong Israèl ya pada nglakoni kaya ngono; kaya sing dipréntahké karo GUSTI marang Moses, kuwi digatèkké kabèh.