Masmur 28
Gusti kuwi Tamèngku
1Masmuré Daved.
Duh GUSTI gunung watuku, kula sambat marang Panjenengan,
supaya aja ngenengké kula,
awit yèn Panjenengan ngenengké kula,
kula terus kaya wong sing medun menyang kuburan.
2Panjenengan supaya gelem ngrungokké swarané penjaluk kula,
yèn kula sambat marang Panjenengan njaluk tulung,
lan ngangkat tangan kula
nuju marang panggonan Panjenengan sing Mahasutyi.
3Kula aja nganti Panjenengan sèrèt bareng karo wong duraka,
utawa sing nandangi ala,
sing grapyak apik marang sak pepadané,
nanging atiné kebak ala.
4Kuwi supaya pada Panjenengan wales pada karo penggawéané,
lan miturut tumindakké sing ala;
supaya Panjenengan bales tyotyok karo penggawéané tangané
lan tibanana balesan apa sing ditindakké kuwi.
5Awit pada ora nggatèkké marang penggawéané GUSTI,
lan apa sing ditindakké karo tangané,
mulané bakal pada ditibakké
lan ora ditangèkké menèh.
6Pinujia GUSTI, awit wis ngrungokké
swarané sambatku.
7GUSTI kuwi kekuwatanku lan tamèngku,
atiku pertyaya marang Panjenengané.
Aku wis ditulungi, mulané atiku bungah-bungah,
lan aku mujèkaké maturkesuwun
marang Panjenengané karo kidungan.
8GUSTI kuwi dadi kekuwatané umaté,
Panjenengané dadi bèntèng keslametan kanggo wong sing dijebatani!
9Panjenengan supaya gelem ngluwari umat Panjenengan,
lan gelem mberkahi duwèké Panjenengan déwé,
supaya Panjenengan engon lan Panjenengan panggul ing sak lawas-lawasé.
