Masmur 30

₂Duh GUSTI, Panjenengan bakal kula luhurké,

awit Panjenengan wis ngentasaké kula,

lan ora nglilani yèn mungsuh kula pada bungah awit sangka kula.

₃Duh GUSTI, Gusti Allah kula, kula sambat njaluk tulung marang Panjenengan,

terus Panjenengan waraské.

₄Duh GUSTI, Panjenengan wis ngentasaké nyawa kula sangka panggonané wong mati,

Panjenengan nguripké kula

ing antarané wong-wong sing wis mlebu ing kubur.

₅Pada ngidunga masmur kanggo GUSTI, hé para wong sing ditrésnani,

lan pada masrahna maturkesuwun marang asmané sing sutyi!

₆Awit bebenduné mung sedilut,

nanging kawelasané tetep ing selawasé urip;

ing wayah mbengi ana tangisan,

ing wayah ngarepké ésuk krungu surak-surak.

₇Ing njeruhné kebungahan kula, tembungé ati kula:

“Aku ora bakal gloyoran selawasé!”

₈Duh GUSTI, awit sangka enggèn Panjenengan seneng,

kula wis Panjenengan panggonaké ing sak nduwuré gunung sing kuwat;

nanging bareng Panjenengan nutupi praupan Panjenengan, kula kagèt.

₉Kula ngomong banter marang Panjenengan, duh GUSTI,

lan kula ndedonga marang Gusti:

₁₀“Apa gunané yèn getih kula kutah,

yèn kula medun ing kubur?

Apa lebu bisa masrahké maturkesuwun marang Panjenengan

lan ngabaraké kasetian Panjenengan?

₁₁Duh GUSTI, Panjenengan supaya ngrungokké lan melasi kula,

duh GUSTI, Panjenengan supaya gelem ngadek dadi juru penulung kula!”

₁₂Kula sing sambat Panjenengan malihké dadi wong sing jejogètan,

salin kasusahan kula Panjenengan bukak,

kula terus Panjenengan sabuki karo kebungahan,

₁₃supaya nyawa kula ngidungké masmur kanggo Panjenengan

lan aja nganti meneng waé.

Duh GUSTI, Gusti Allah kula, kula bakal ngidungké maturkesuwun marang Panjenengan ing sak lawasé.