Masmur 49

₂Hé kabèh para bangsa, pada rungokna,

hé kabèh wong ndonya, pada ngrungokna;

₃para wong tyilik lan wong gedé,

para wong sugih lan wong mlarat sak kabèhé!

₄Tutukku bakal nglairké kawityaksanan,

sing dipikir-pikir karo atiku kuwi pangertèn.

₅Aku bakal ngrungokké marang bebasan,

lan bakal ngomongké paribasan karo ngunèkké siter!

₆Kenèng apa kok aku nganti wedi marang dinané kangèlan,

waktu aku dikepung karo penggawé alané wong sing pada ngoyak-oyak aku,

₇wong-wong sing pada ngendel-ngendelké banda-bandané,

lan umuk awit sangka okèhé bandané?

₈Ora ana wong siji-sijia waé sing bisa ngluwari sedulur liyané,

utawa ngomongi tebusan marang Gusti Allah kanggo gantiné nyawané.

₉Awit kelarangen regané kanggo ngluwari nyawané,

lan selawasé ora bakal tyukup,

₁₀supaya tetep urip ing sak terusé,

lan ora weruh bolongané kuburan.

₁₁Sejatiné, bakal weruh: para wong sing wityaksana pada mati,

para wong bodo lan tanpa pikiran pada mati bareng,

lan bandané ditinggalké marang wong liyané.

₁₂Kuburané kuwi dadi omahé selawasé,

dienggoni nganti turun-temurun,

tegalan-tegalan dianggep dadi duwèké.

₁₃Nanging wong kuwi gedéa kaluhurané, ya ora tetep uripé,

mung pada kaya kéwan sing dipatèni.

₁₄Kaya mengkono kuwi kahanané wong sing pertyaya marang awaké déwé,

lan patiné wong sing seneng marang tembungé déwé. Sela

₁₅Kaya wedus enggoné pada mlebu ing ndonyané wong mati,

pati sing dadi pangoné;

pada terus mudun ing kuburan,

awaké ajur mumur,

ndonyané wong mati sing dadi panggonané.

₁₆Nanging nyawaku bakal diluwari karo Gusti Allah,

sangka tyengkeremané ndonyané wong mati,

awit Panjenengané bakal njupuk aku. Sela

₁₇Aja sumelang, yèn ana wong mundak sugih,

lan mundak tambah kamulyané ing omahé,

₁₈awit waktu matiné kabèh kuwi ora bakal digawa,

kamulyané ora bakal ngetutké dèwèké.

₁₉Senajan sak njeruhné uripé ngarani awaké déwé kuwi beja,

lan dielem karo wong awit enggoné mbetyiki awaké déwé,

₂₀nanging bakal pada marani para leluhuré,

sing ora bakal weruh pepadang sak terusé.

₂₁Manungsa sing kanggonan kamulyan okèh, yèn ora nduwé kaweruh,

kuwi kena dipadakaké kéwan sing dibelèh.