Masmur 50

Sing Mahakwasa, ya kuwi GUSTI, ngomong lan nyeluk bumi,

sangka njedulé srengéngé tekan peneré mingslepé.

₂Sangka Sion, putyuké kabetyikan,

Gusti Allah ngétok nganggo kamulyan.

₃Gusti Allah kita bakal teka lan ora meneng waé,

ing ngarepé ana geni sing ngobong,

ing sak ubengé karo lésus sing medèni.

₄Panjenengané mbengok marang langit ing nduwur,

lan marang bumi perlu ngadili marang umaté:

₅“Para duwèk-Ku pada klumpukna ing ngarep-Ku,

sing pada nggawé perjanjian karo Aku karo pasrah kurban sing dibelèh!”

₆Terus langit ngomongké keadilané,

awit Gusti Allah déwé kuwi sing dadi Rèkter. Sela

₇“Hé umat-Ku, pada rungokna, Aku gelem ngomong,

hé Israèl, Aku mréntahké paseksi marang kowé,

Aku iki Gusti Allah, Gusti Allahmu!

₈Aku ora melèhké kowé awit sangka kurbanmu,

awit kurbanmu obongan apa ora tansah ing ngarep-Ku?

₉Aku ora susah njupuk sapi sangka omahmu

utawa wedus lanang sangka kandangmu,

₁₀awit sak rupané kéwan ing alas kuwi duwèk-Ku,

semono uga kéwan-kéwan éwon-éwon ing gunung.

₁₁Kabèh manuk ing awang-awang Aku kenal,

lan apa sing urip ing ara-ara kuwi ing pangwasa-Ku.

₁₂Yèn Aku ngelih, ora usah ngomong marang kowé,

awit ndonya sak isiné kabèh kuwi duwèk-Ku.

₁₃Apa Aku mangan dagingé sapi lanang,

utawa ngombé getihé wedus lanang?

₁₄Masrahna maturkesuwun kanggo kurban marang Gusti Allah,

lan bayaren janjimu marang sing Mahaluhur!

₁₅Ing dina kangèlan kowé pada nyeluka marang Aku,

terus Aku bakal mitulungi kowé lan kowé bakal ngluhurké Aku.” Sela

₁₆Nanging marang wong duraka Gusti Allah ngomong mengkéné:

“Kowé kok kemendel mriksa pernatan-Ku,

lan tutukmu kok ngrasani perjanjian-Ku,

₁₇nanging kowé geting marang pamelèh,

lan nyingkur marang tembung-Ku.

₁₈Yèn kowé weruh maling, kowé terus dadi kantyané,

lan kowé selawasé karo wong laku bédang.

₁₉Tutukmu aja ngomong ala,

lan ilatmu kelèt karo goroh.

₂₀Kowé lungguhan nyatur alané sedulurmu,

lan anaké ibumu kok pitenah.

₂₁Ya kuwi sing kok lakoni;

nanging Aku meneng waé;

pikirmu Aku iki pada karo kowé;

kowé mesti Tak welèhké lan bab iki bakal Tak atung-atungké ing ngarepmu.

₂₂Hé kowé sing pada nyingkur marang Gusti Allah, pada gatèkna;

supaya aja nganti Tak sempal-sempal,

lan ora ana sing ngluwari.

₂₃Sapa sing masrahaké pamuji kanggo kurban, kuwi ngluhurké Aku;

sapa sing jujur mlakuné,

keslametan pawèhé Gusti Allah bakal Tak duduhké.”