Masmur 5

₂Duh GUSTI, Panjenengan, supaya ngrungokké tembung kula

lan ngrungokké sambat kula.

₃Duh Ratu kula lan Gusti Allah kula, Panjenengan, supaya ngrungokké enggèn kula njerit nyuwun pitulungan,

awit marang Panjenengan enggèn kula ndedonga.

₄Duh GUSTI ing wantyi ésuk Panjenengan ngrungokké swara kula,

ing wantyi ésuk kula nyuguhké pandongaku ing ngarepé Panjenengan,

lan kula ngentèn-entèni.

₅Awit Panjenengan kuwi Gusti Allah sing ora seneng marang duraka,

wong ala ora bakal manggon ing ngarepé Panjenengan.

₆Wong gemunggung ora bakal tahan ing ngarepé Panjenengan,

Panjenengan sengit marang kabèh wong sing nindakké ala.

₇Panjenengan numpes kabèh wong goroh,

GUSTI sengit weruh wong sing ngutahké getih lan mlaku goroh.

₈Nanging kula, Panjenengan nglilani kula, mlebu ing griya Panjenengan,

awit sangka gedéné kawelasan-Mu.

Panjenengan nglilani kula, sujut

madep ing griya Panjenengan sing sutyi,

karo ngajèni marang Panjenengan.

₉Duh GUSTI, Panjenengan, supaya nuntun kula ing keadilan-Mu,

awit sangka satru kula;

Panjenengan, supaya nggawèké dalan Panjenengan kanggo kula.

₁₀Awit tembungé wong-wong kuwi ora ana sing jujur,

atiné kebak ala,

bolongan guluné kaya kubur menga,

ilaté ngutyapké sing lamis.

₁₁Duh Gusti Allah, wong kuwi ya bèn pada nyangga kesalahané,

ya bèn pada tiba awit sangka réka-rékané déwé,

pada kebuwak awit sangka okèhé panerak,

awit pada nglawan marang Panjenengan.

₁₂Nanging kabèh wong sing ndelik ing Panjenengan, bakal pada bungah-bungah,

pada surak-surak ing sak lawasé awit pada Panjenengan ayomi;

lan wong sing trésna marang asmané Panjenengan bakal pada surak-surak awit Panjenengan.

₁₃Awit Panjenengan sing mberkahi wong bener, duh GUSTI,

lan Panjenengan pageri karo kawelasan-Mu, kaya tamèng.