Masmur 57

₂Kula supaya Panjenengan welasi, duh Gusti Allah, kula supaya Panjenengan welasi,

awit mung Panjenengan sing dadi pangayomané nyawa kula;

kula ndelik ing ngisoré swiwi Panjenengan,

nganti bebaya kuwi wis lunga.

₃Aku sambat marang Gusti Allah sing Mahaluhur,

Gusti Allah ngrampungké perkaraku.

₄Gusti Allah supaya gelem kongkonan sangka swarga ngluwari aku,

lan ngisin-isinké wong sing ngidak-idak aku. Sela

Gusti Allah supaya gelem ngirimké kawelasan lan kebenerané.

₅Aku ngglétak ing tengah-tengahé singa-singa,

sing seneng nubruk anak-anaké manungsa,

sing untuné kaya tumbak lan panah,

lan sing ilaté kaya pedang landepé.

₆Duh Gusti Allah, Panjenengan supaya gelem nduduhké kaluhuran Panjenengan,

nganti teka ing sak nduwuré langit,

lan kamulyan Panjenengan supaya ngliwati sak lumahé bumi.

₇Mlakuku pada dipasangi kala-jiret,

nyawaku didingklukké,

pada ngeduk juglangan ing ngarepku,

nanging terus pada ketyemplung déwé ing kono. Sela

₈Ati kula wis tata-tata, duh Gusti Allah, ati kula wis tata-tata,

kula bakal ngidung, kula bakal ngidung masmur.

₉Hé nyawaku, tangia, tangia, hé harep lan siter,

aku arep nggugah ésuk wétan!

₁₀Panjenengan bakal kula puji ing sak tengahé para bangsa, duh Gusti,

Panjenengan bakal kula kidungké masmur ing sak tengahé para taleré bangsa.

₁₁Awit kawelasan Panjenengan luhuré sundul langit,

lan kebeneran Panjenengan sundul mendung.

₁₂Duh Gusti Allah, Panjenengan supaya gelem ngétokké kaluhuran Panjenengan nganti teka ing sak nduwuré langit,

lan kamulyan Panjenengan supaya ngliwati sak lumahé bumi.