Masmur 56
Pertyaya marang Gusti Allah ing sak njeruhné kangèlan
1Kanggo juru penyanyi. Miturut nyanyian: Manuk dara ing wit terbantin sing adoh. Miktam masmur Daved, waktu Panjenengané dityekel bangsa Filistèn ing kuta Gat.
2Duh Gusti Allah, kula supaya Panjenengan welasi, awit wong-wong pada ngidak-idak kula,
lan kula diperangi lan dipèpètné sedina muput.
3Mungsuh-mungsuh kula pada ngidak-idak kula sedina muput,
malah okèh wong sing nglawan kula karo gemunggung.
4Yèn kula wedi,
kula pertyaya marang Panjenengan;
5Gusti Allah, sing pituturé tak puji-puji,
ya Gusti Allah kuwi sing tak endelaké, mulané aku ora wedi.
Manungsa bisa nandangi apa marang aku?
6Saben dina pada ngruwetké perkara kula,
pada tansah nduwé kekarepan bakal nindakké ala marang kula,
7pada bakal nyerang, ngintyeng lan ngewaské mlaku kula,
kaya wong sing pada arep njabut nyawa kula.
8Wong iki apa bisa utyul, sangka dosané iki?
Duh Gusti Allah, ambruké para bangsa karo bebendu Panjenengan.
9Kasangsarané kula Panjenengan sing ngitung-itung,
luh kula Panjenengan wadahi ing kendi Panjenengan;
kabèh apa ora wis pada Panjenengan tyateti ing kitab Panjenengan?
10Mungsuhku terus pada mundur waktu aku sambat,
aku yakin yèn Gusti Allah nunggal karo aku.
11Gusti Allah, sing pitutur-pituturé tak puji,
GUSTI, sing pitutur-pituturé tak puji.
12Gusti Allah, sing tak pertyaya, mulané aku ora wedi.
Manungsa bisa nandangi apa marang aku?
13Duh Gusti Allah, janji kula bakal kula tetepi ing ngarepé Panjenengan,
kula bakal masrahké kurban maturkesuwun marang Panjenengan.
14Awit Panjenengan wis ngluwari nyawa kula sangka pati,
malah njaga sikil kula, terus ora kesandung;
mila kula bisa mlaku ing ngarepé Gusti Allah,
ing pepadangé urip.
