Masmur 7

₂Duh GUSTI, Gusti Allah kula, kula nggolèk pengayoman ing Panjenengan.

Kula luwarana sangka kabèh wong sing nguyak-uyak kula, awit Panjenengan nulungi kula.

₃Yèn ora, mesti ditubruk kaya singa,

lan nyèrèt kula lan ora ana sing ngutyuli.

₄Duh GUSTI, Gusti Allah kula,

yèn kula nandangi siji waé sing ora bener,

yèn tangan kula nindakké sing ora éklas,

₅yèn kula mbales ala marang sing betyik,

utawa ngrampok satru kula tanpa sebab,

₆yèn mengkono, bèn kula diuber karo mungsuh nganti ketyekel,

terus urip kula diidak-idak ing lemah,

lan kaluhuran kula dipendema ing lebu. Sela

₇Duh GUSTI, ngadeka, ing njeruhné nesu-Mu,

Duh Gusti, tangia nglawan nesuné mungsuhku,

Duh Gusti, tangia mitulungi kula, Panjenengan, sing mréntahké pengadilan.

₈Kumpulké para penggedéné bangsa pada ngubengi Panjenengan,

Panjenengan terus gelem njagong ing dampar-Mu sak nduwuré dèkné.

₉GUSTI ngadili para bangsa.

Duh GUSTI, supaya Panjenengan mutusi kanggo beneré kula,

awit kula bener lan resik.

₁₀Pungkasana alané wong ala,

nanging dikuwatké wong bener.

Panjenengan sing njajal ati lan batiné manungsa,

duh Gusti Allah, sing adil.

₁₁Gusti Allah kuwi tamèngku,

sing mitulungi wong sing jujur ing atiné.

₁₂Gusti Allah kuwi Rèkter sing adil,

lan Gusti Allah ngétokké nesu-Né saben dina marang ala.

₁₃Yèn wong ora mratobat,

Gusti Allah bakal ngasah pedangé, mentèng gendéwané lan panahé ditujukké.

₁₄Gaman ngidap-idapi dityawiské kanggo wong kuwi,

panahé diurupké.

₁₅Wong kuwi meteng sing ala

lan meteng tyilaka terus nglairké goroh;

₁₆terus nggawé juglangan, diduduk,

nanging ketyemplung ing juglangan gawéané déwé.

₁₇Sing ala sing ditindakké mau mbalik nampek batuké déwé,

lan panganiayané medun nibani endasé déwé.

₁₈Aku arep maturkesuwun marang GUSTI awit sangka keadilané,

lan ngidungké masmur kanggo asmané GUSTI, sing Mahaluhur.