Masmur 9

₂Kula arep maturkesuwun marang GUSTI karo sak kabèhé atiku,

kula arep tyerita kabèh mujijat Panjenengan.

₃Kula bakal bungah-bungah lan sukak-sukak awit sangka Panjenengan,

Asma Panjenengan kula puji karo masmur, duh Gusti,

Mahaluhur,

₄awit mungsuh kula pada mundur,

ambruk terus entèk ing ngarepé Panjenengan.

₅Awit Panjenengan sing mbélani perkara kula lan wewenangé kula,

nganti kula olèh kabeneran,

Panjenengan njagong ing dampar dadi Rèkter sing adil.

₆Para bangsa pada Panjenengan ukum,

para wong duraka Panjenengan tumpes;

jenengé Panjenengan entèkké langgeng ing sak lawasé.

₇Mungsuh wis pada entèk tyutes,

dadi gempuran gunduk-gundukan ing sak lawasé,

kutané wis pada Panjenengan gempuri,

wis ora diélingi menèh babar pisan.

₈Nanging GUSTI wis njagong ing dampar selawasé,

damparé sing diedekaké kuwi kanggo nindakké pengadilan.

₉Ya Panjenengané kuwi sing ngukumi ndonya karo adil,

lan ngadili para bangsa karo titis.

₁₀Ya mengkono kuwi enggoné GUSTI dadi pangungsèn kanggo wong sing ditindes,

dadi pangungsèn ing waktu kangèlan.

₁₁Wong sing kenal karo asma Panjenengan, kuwi pada pertyaya marang Panjenengan,

awit Panjenengan, ora tau négakké wong sing nggolèki Panjenengan, duh GUSTI.

₁₂Pada ngidunga masmur kanggo GUSTI, sing manggon ing Sion.

Pada tyritakna penggawéané ing tengahé para bangsa.

₁₃Nanging Panjenengané sing mbales marang wong

sing ngutahké getih, éling marang wong sing ditindes,

ora lali marang sambaté.

₁₄Duh GUSTI, kula supaya Panjenengan welasi,

supaya ndelok kangèlan kula awit sangka penggawéané para wong sing sengit marang kula;

Panjenengan sing ngetokké kula sangka gapurané pati.

₁₅Supaya kula bisa tyerita kabèh penggawéané Panjenengan, sing wajip dipuji kuwi,

lan ing gapurané putri Sion, kula surak-surak, awit keslametan pawèh Panjenengan.

₁₆Bangsa-bangsa wis pada ketyemplung ing juglangan gawéané déwé,

sikilé pada kenèk jiret, pasangané déwé.

₁₇GUSTI wis nglairké dèkné, Panjenengané nindakké pengadilan;

wong duraka kejiret karo pasangané déwé. Higayon. Sela

₁₈Para wong duraka bakal pada bali menyang panggonané wong mati,

malah uga kabèh bangsa sing pada lali marang Gusti Allah.

₁₉Awit wong mlarat kuwi ora dilalèkké ing sak terusé,

wong sing kasusahan ora kélangan pengarep-arep selawasé.

₂₀Duh GUSTI, supaya gelem tangi, manungsa aja nganti olèh nyombongaké dèwèké,

para bangsa pada kudu ditibani pengadilan ing ngarepé Panjenengan.

₂₁Duh Gusti, supaya kabèh Panjenengan gawé gemeter,

supaya para bangsa pada ngakoni, yèn dèwèké mung manungsa waé.