Ekamappontok Wemali'mantok Pàk
1Kaleta enmenukappù kon lùppù yawon pàkànsau uselupa sàlà.
“Wakù pe iwechi màlà kàyik wechi nossan tappàsse pùla yau.” 2Tùse eke pe imakuyippù pe esak ke we'nàtok wechi molo pàk, tàwà kàyik yamùk wechi màlà tùponalà tùnoppù ke'ne, molopai nossan yamùk wechi tùponalà tùtayappù ke'ne. 3Tàwàichi tùnoppù kenan tùnkupù kupùi tùnoppù winàkaik molopai tùtayappù kenan nàlà màlà kasa làma tùtayappù pàk. 4Tùtayappù kenan yesak wechi màlà iponaloppe neken pùla tùse itayappù ponaloppe nàlà. Màlà kasa làma tùnoppù kenan yesak wechi iponaloppe neken pùla tùse inoppù ponaloppe nàlà. 5Ke'nulunpatàu uchi, tùse “Masa ka' tàwà we'nà lù malalà wàpùlemantoppe,” te neken nà. Molopai lànen uchi ànkupù kon kupù kon pa Settan uya ittuntok yak ewettùlù kon tukaik, ipàlikatok auya'nokon pàk.
6Sàlà yekama uya “Sàlà ikukkà,” te toppe pùla, tùse ikupù làichi auya'nokon màlà te toppe. 7Tamù'nawàlà lànen kàyik yamùk wechi ukasa iche wessaik. Tùse iponalà'ne kappon yamùk lepatok wechi màlà Katù winàpaino, tewinan lepatok sà yekkwa, molopai tùulon mà yekkwa.
8Iwemali'mappù pùnon molopai itayappù iwelichak kon pàk te uya. Wakù peiwa iwechi màlà tùwemali'maik pùla ukasa tok wechi yau. 9Tùse tùutamùipatok pàlikanài pe pùla tùwechi kon yau, tok wemali'ma màlà, wakù peiwa wemali'man wechi màlà ànkuppai we'nàtok uya eka'nonkan yentai lùiwa.
10Iwemali'masak kon ponaloppe sàlà elupantok tùtùyaik, uwinàpaino pen, tùse Itepulu winàpaino, tùtayappù kenan uya tùtayappù nonka pen màlà. 11Tùse tùtayappù nonkasak tùuya yau, tàwà tùwemali'maik pùla nechii wapùla tàwà nennappoi tùtayappù piyak. Molopai tùnoppù nonka tùnoppù kenan uya pen màlà.
12Tùulon kon pàk wa ukayaik, Itepulu pe pùla nen uchi. Ailon tawon kàyik wechi ailon tawon pen inoppù pe yau, molopai ipyau tùwemapù pàk ichenumenkasak yau, inonka ya pen màlà. 13Molopai ailon tawon nossan wechi ailon tawon pen kàyik itayappù pe yau, molopai ipyau tùwemapù pàk ichenumenkasak yau, inoppù uya inonka pen màlà. 14Masapùla tùnoppù kenan ailon tawon pen, konekasak màlà esuken inoppù winà, molopai tùtayappù kenan ailon tawon pen konekasak màlà esuken itayappù winà. Màlà kasa pùla iwechi yau àmunkà kon yamùk wechi màlà àli pe, tùse màlà kasa, esuken tok wechi màlà nai'nùk. 15Tùse ailon tawon pen wechi tùwechi yakon ànnonkapai yau, tàwà nùkupùi. Ailon tawon kàyik wapùla nossan wechi yewattàsappe pen màlà, màlà kasa iwechi yau Katù uya kà'mansakù'nokon màlà wakù pe tùutaimelunpaik pùla wema'nàtoppe. 16Yà'là kasa ken ittu auya, tùtayappù kenan, atayapù pùikattà auya pe là iwechi? Wapùla yà'là kasa ken ittu auya, tùnoppù kenan, ànoppù pùikattà auya pe là iwechi?
Emattàk Kon Katù uya Àkà'mappù Kon Kasa
17Tàwà tamù'nawolon kon nemapùi Itepulu uya tùlepatok kon lepantok yawàlà, Katù uya tùkà'mappù kon kasa. Sàlàichi màlà unekama tamù'nawàlà sochi yamùk tau. 18Jew yamùk yeselu yau na' kàyik yattàkassappe iwechippù màlà ikà'ma yattai? Tùwemyakanmaiche iwechi pen màlà. Kàyik yattàsappe pùla na' iwechippù màlà ikà'ma yattai? Yattà kùsettak. 19Masapùla usattàn molopai usattànsak pùla iwechi wechi màlà yà'là pe pùla. Katù uya enupantok yawàlà làkku nen we'nà màlà yà'là. 20Tàwàichi tamù'nawolon kon tùkà'ma kon Katù uya yattai tùwechippù kon kasa nechii. 21Tepotolù keichi ewechippù kon Katù uya àkà'ma kon yattai? Tàwà nechii kataimelunpatàu, tùse itepotolù pùla wenantok yattai yesappe ewechi kon yau yapulàtàk kon kulu. 22Masapùla tepotolù kenan, Itepulu uya tùkà'ma yattai mùkkàlà Itepulu nùmokkappù, màlà kasa làma itepotolù pùn tùkà'ma yattai wechi màlà Christ yapyoto pe. 23Eye'mappù kon màlà epekkek ke, kappon yamùk poitolù pe kenattàu. 24Utonpa yamùk, emennappe ewemattok kon yau ettàk kon àkà'ma kon Katù uya yattai ewechippù kon kasa.
Kàyik Nappàtùppù Ton Pen Ema'nomichi
25Walawok ittunnannùssan pen yelupatok uya woton Itepulu winàpaino pùla lànen man. Tùse usenumenkatok yekama uya sàlà Itepulu Katù usentupatok yai, ewaik ken ko tetok ipàppe.
26Sàlà yattai sa'man pe pata weyu wechi pàk, messatài'nùk kasa lùppù ewechi kon yau wakù peiwa iwechi tukaik usenumenkayaik. 27Iwemali'masappe ewechi kon yau ewe'nonkaiche nokon kettàu. Iwemali'masappe pùla ewechi yau, ànoppù wotton kichiwai. 28Tùse ewemali'ma kon yau, ewemakuimasak kon pen màlà. Molopai walawok ittunàippù pen ulichan wemali'ma yau, iwemakuimasak pen màlà. Tùse iwemali'masak kon uya màlà tukkan utaimelunmantok yepolo màlà sàlà wema'nàtok yau. Molopai sàlà yekkwa ton winàpai àpùikattà kon uya iche wechi sàlà.
29Utonpa yamùk, tokkwen pata weyu man te uya nai'nùk. Sàlà motapai tàwà tùnoppù kenan kon wemapù màlà ipla tùwechi kon kasa. 30Mùkyamlo tùusewankono'masan, tùusewankono'ma kon pùla iwechi kasa. Mùkyamlo tùutauchinpasan tùutauchinpa kon pùla iwechi kasa. Mùkyamlo yà'làlà ye'mannan ine'mappù pùla tùwechi kon kasa. 31Mùkyamlo sàlà wolù yawon mamin yapulànnan yapulàtok tùuya'nokon pùla iwechi kasa. Masapùla sàlà wolù sàlà pe yene nai'nùk, uko'mamù tachinpe kulu pen màlà.
32Autaimelunpa kon iche pùla wessaik. Inoppù pùn kàyik mùkkàlà tùusenumenkasen Itepulu wotokoyi pàk, yà'là kasa là Itepulu yauchinpatok tùuya pàk. 33Tùse tùnoppù kenan kàyik mùkkàlà tùusenumenkasen sàlà wolù yawon kon pàk, yà'là kasa là tùnoppù yauchinpatok tùuya pàk. 34Molopai ichenumenkatok wechi asa'là. Itayappù pùn nosson wapùla walawok ittunàippù pen ulichan wechi màlà tùusenumenkasen pe Itepulu wotokoyi pàk, masapùla ettùpai tùwechi Itepulu ponaloppe pàk asakklàma tesak molopai takkwalù yau. Tùse tùtayappù kenan nossan mùkkàlà tùusenumenkasen sàlà wolù yawon kon pàk, masapùla tùtayappù anauchinpapai tùwechi pàk.
35Wa te uya nai'nùk masapùla àpùikattàpai'nokon wechi pàk. Yà'làlà sa'man tùkussen tùlùiche wechi àpona'nokon pen. Tùse làkku Itepulu yemyak iwettùsappe iwalai yawà ewemapù kon pa, tùwe'wanittàpaik pùla.
36Ànù'là, mùkkàlà tùnoppù pe iwechi teppù tùuya lùppù ema'non winàkàik wakù pe pùla tùwelaikatok ittunài wechi yau molopai emali'mapai tùwechi yau, tàwà ànkuppai tùwettok kupùi. Iwemakuima pen màlà. Tok wemali'ma màlà. 37Tùse mùkkàlà tùyiwalà tùusenumenkatok yau màlà yekkwa yeleutanù'nài kàyik, eka'nonkantok yo'non pen tùse tùyiwalà teselu yesappe tùwessen molopai ichenumenkasak ema'non tanùnse tùnoppù pe pùla tùwettoppe, pùsàlà nàlà kàyik uya màlà iwalai kupù. 38Màlàpàk mùkkàlà nùnoppùtayai'nùk uya màlà iwalai kupù, tùse mùkkàlà tùunoppùtaik pùla nai'nùk wechi màlà itentai lùiwa wakù pe.
39Tùtayappù kenan nossan yewattàsak màlà itayappù pàk iwemapù yawàlà. Tùse tùtayappù welichak yau tàwà nemali'ma tu'mai emali'mapai tùwechi yau ànù'là pokonpe, tùse Itepulu yau neken. 40Walà tùse, tùutauchinpaik lùiwa nen iwechi màlà tùtayappù ke pùla tùwechi yau te uya màlà molopai Katù Yakkwalù yesappe wechi pe tùttuyaik.
