Galatians 2

₁14 pe kilichimochi tùpo utàtu'mappù màlà Jerusalem pona, sàlà yattai Barnabas pokonpe. Titus yalàppù uya nàlà uya'là. ₂Utàppù màlà masapùla Katù uya utàtoppe yenpoikasak pàk. Molopai itekale unekamappù lùppù Jew yamùk pen pàk yekamappù uya màlà tok pàk. Tùse sàlà kupùppù uya màlà amak yai tok yennàinan pe tukaik tùwessan pokonpe. Masapùla pena wapùla sàlà pe unkupùppù uwotokoyi wechi yà'là woton pe pùla iche pùla wechi pàk. ₃Uya'lonnà Titus, yeka'nonkappù Jew yamùk yeselu yawà yattàtoppe pen màlà, Greek pe lànen tùse. ₄Sàlà kasa iwechippù màlà masapùla tùulon kon ina tonpa yamùk pe tukaik tùusenakassan uyàpùppù màlà ina kùlottak tùwanmùla Christ Jesus yau ina wemapù yense amak yai, molopai apyoto pe ina kusse. ₅Ina wettùlùppù malalà tok yemyak pen màlà, ailon pe itekale wettok wettoppe apyau'nokon.

₆Mùkyamlo nàlà eke ton ennàinan pe tukaik tùwessan, ànùk pe là tok wessak uya tùpatalà tok kussak pùla iwechi màlà upona. Masapùla Katù mùkkàlà polopo usennàtok pàk ittunài pen. Mùkyamlo là kàyik yamùk uya uselupatok tonpattàpàssak pùla man. ₇Tùse làkku Katù uya màlà ulepasak sàlà wotoko ke, Itekale yekama pàk wettoppe Jew yamùk pen pàk yeneppù tok uya. Peter lepappù tùuya màlà lùppù Itekale ke Jew yamùk ponaloppe kasa. ₈Màlàpàk Katù yapàikketù winà yeunossappe ukupùppù màlà Jew yamùk pen winàkàik, Peter kupùppù Jew yamùk piyak yeunossappe kasa. ₉James, Peter molopai John tawonnan eke ton itepulu pe tùwessan nùttutai, Katù uya sàlà wotoko ke ulepasak. Màlàpàk ina yemyatù yachitai tok, Barnabas molopai Iulà tawonnan. Echitonpa pe tamùkke tùwe'wotokomatokkonpe, Jew yamùk pen kùlottak ina utàtoppe, molopai mùkyamlo Jew yamùk kùlottak. ₁₀Entuppa'nokon puttàka'nùpù ina uya tukaik neken tok uya ina yekamappoppù, màlà kulu ànkuppai wechippù.

₁₁Peter uyàssak Antioch pona yau, yàulàmappù uya itenpatak, masapùla ikasa pùla kulu iwechi pàk. ₁₂Kàyik yamùk uyàpù James piyapai wapiya, Peter wechippù tùuta'lettàsen pe Jew yamùk pen pokonpe. Tùse tok welepansak yau, iitamappù tok winàpai molopai Jew yamùk pen pokonpe pùla iwechippù, masapùla ichenalippappù màlà Jew yamùk pen anattàpai tùwessan pàk. ₁₃Tùulon kon Jew yamùk wenappù iichennaka tonpa pe. Màlà tok usennakatok winà Barnabas nàlà wechippù tok kasa! ₁₄Tok utà ailon Itekale yeselu yawàlà pùla yene uya pàk, Peter pàk, tamù'nawolon kon yemloto po, “Jew àmàlà, tùse Jew yamùk pen kasa memassaik, Jew kasa pùla. Yà'là kasa ken uchi Jew yamùk pen yeka'nonka auya màlà Jew yamùk yeselu yawàlà tok wemattoppe?” teppù uya.

₁₅Kùmyamlo Jew yamùk wentu'nàppà winà, makui yawon kon Jew yamùk pen kùlottapaino kon pen. ₁₆Ina nùttuyan kappon yanùnsak ikasa Katù pokonpe ailon tetok ya Jesus Christ pàk yai neken, Law yawà we'nà winà pùla. Kùmyamlo uya nàlà ailon tesak man Christ Jesus pàk Katù pokonpe ikasa anùnnàtoppe Christ yai, Law yawàlà we'nà winà pùla. Masapùla ànù'là yanùntok ikasa Katù pokonpe Law yawàlà iwechi winà pùla iwechi màlà. ₁₇Tùse kappon yanùntok ikasa Katù pokonpe iwa'nokon Christ yai yau, kùmakuyi usenpoika yau, Jesus uya ken na' wemakuimantoppe ikupù màlà? Kane ku! ₁₈Masapùla màlà yamùk unnonkappù kuttu'ma uya yau, makui yau wechi pe iwechi yekama uya màlà. ₁₉Màlàpàk law winà welichak man. Law uya uwàsak, Katù ponaloppe wemattoppe. ₂₀Upukapàtùppù màlà Christ pokonpe nulà wechi tukaik, tùse Christ nemassan uyau. Sàlà esak yau wema'nàtok yau wemassaik ailon tetok uya Katù Mumu pàk yau, mùkkàlà u'nùnmanàippù molopai iwettùsak lùppù uponaloppe. ₂₁Wakù pe Katù wettok nonka uya pen sàlà. Masapùla kappon yanùntok ikasa Katù pokonpe Law yai pe iwechi yau, yà'là woton pe pùla Christ welittoppan.