Ailon Tetok Wapùla Law Yawàlà We'nàtok
1Pakko ton Galatia pon kon! Ànùk uya ken epe pùla ewelaika kon pa àkupùppù kon? Eyemloto kon po ku yene kon pa Jesus Christ pukapàtùppù pulusuk pona yekamappù uya àpàkù'nokon? 2Sàlà tewinannà ànùttupai wessaik ewinàpai'nokon. Wakù Akkwalùichi mepotantàu law yawàlà ewechi kon winà, wapùla ka' Itekale yeta molopai ailon te auya'nokon winà lù? 3Atta ken uchi pakko pe kulu ewechi kon màlà! Akkwalù pokonpe ewepyattà kon tùpo na' eyiwalà'nokon kappon yeselu yau yenuka'nùpùiche ewechi kon màlà? 4Iwoton pe pùla na' ewettalumattàppù kon kulu màlà - Iwoton pe pùla kulu iwechi yau? 5Katù na' mùkkàlà elepanài'nokon Takkwalù ke molopai eke ton tensan yekkwa pen ku'nài àkklottau'nokon. Masapùla law yawàlà ewechi kon pàk, wa pùla ka' Itekale yetasak auya'nokon pàk ailon tesak auya'nolon pàk lù?
6Masa Abraham wechippù yenkà “Ailon teppù ya Katù pàk molopai màlà yanùmùppù ikasa tùwessen pe,” 7Màlàpàk ittutàk kon, mùkyamlo ailon nùkayai'nannùk mùkyamlo Abraham munkà yamùk. 8Katù Maimu uya yekamappù pena iwekkupù wapiya Katù uya Jew yamùk pen yanùntok woton ikasa tùpokon pe, ailon tetok tok uya winà. Molopai Itekale yekamappù ya màlà Abraham pàk pena,
“Tamù'nawolon kon kappon yamùk pùlema màlà ayai,” tukaik. {Gen 12.3; Gen18.18; Gen 22.18}
9Màlàpàk mùkyamlo ailon tawonnan pùlemasak màlà Abraham pokonpe, ailon tawon kàyik.
10Mùkyamlo law winà tùwepùikattàiche tùwessan wechi màlà pa'nù'nàtok yo'no. Masapùla Katù Maimu uya,
“Ànù'là tamù'nawàlà iwe'menukasak nai'nùk Kaleta law yapon pàk, yawàlà tùwessen pen wechi màlà pa'nù'nàtok yo'no!” tesak man. {Deu 27.26}
11Ailon màlà ànù'là kappon yanùmù ikasa Katù pokonpe pen, Law yawà iwechi winà. Masapùla Katù Maimu uya,
“Mùkkàlà ikasa tùwessen wemapù màlà ailon tetok tùuya winà,” tesak pàk. {Hab 2.4}
12Ailon tetok pokon pan pen màlà law. Tùse kappon Law yawàlà tùwessen wemapù màlà ipàk.
13Tùse Christ uya kùpùikattàsak kon sàlà pa'nù'nàtok law nùnepùppù winàpai, ipa'nùssappe tùwenaik kùponalok kon pe. Katù Maimu uya,
“Ànù'là yei pàk ikaiwattàsak wechi màlà ipa'nùsak pe,” te kasa. {Deu 21.23}
14Pùikattànsak ya pùlemantok Abraham piyak itùsak lùppù uyàttoppe Jew yamùk pen piyak Christ Jesus winà, molopai kùmyamlo uya Akkwalù itùlù màlà teppù lùppù yanùntoppe ailon tetok yai.
Law Molopai Katù Uya Ikupù Tùuya Tetok
15Utonpa yamùk, kappon yeselu yapulà uya sàlà yentok ipàkàlà pe. Ànù'là uya kappon uya ewaik tàwà wa nechii tetok mùyakanma wapùla itonpattà pen màlà ikukkassak tùse, màlà kasa sàlà wechi màlà. 16Katù uya, ‘Ikupù uya,’ tetok tùuya kupùppù màlà Abraham pàk molopai ipa pàk.
“Molopai ipayan yamùk pàk” te ya pùn, tùse “Molopai apa pàk” tesak ya, {Gen 12.7; Gen 13.15; Gen 24.7} tewinan neken kappon Christ pàk.
17Suwa te uya màlà nai'nùk, Law 430 pe kilichimochi, Abraham tùpo iichenpoikasak lùppù uya,‘ Ikupù uya màlà,’ teppù Katù uya lùppù yama wapùla imyakanma pen màlà ikukkassak ya tùse. 18Pùlemantok yesappe we'nà law yawàlà we'nà winà yau, enpen we'nà, ‘ Ikupù uya màlà’ teppù Katù uya lùppù pàk pen màlà. Tùse wakù pe tùwettok yau Katù uya Abraham lepappù màlà,‘ Ikupù uya màlà’ tetok tùuya winà.
19Yà'là woton pe ken uchi Law wechippù màlà? Itùlùppù màlà wemakuiman pàk we'nà pàk, mùkkàlà nàlà Abraham pa ikupù uya màlà teppù lùppù ipàk uyàpù ponalà neken tùwessen pe. Law tùlùppù màlà inchelù yamùk uya akkletawon yemyak (Moses). 20Tùse akkletawon mùkkàlà tewin yentai kappon ichelok, tùse mùkkàlà Katù tewinan wechippù ànù'là iche pen màlà Abraham pàk ‘Ikupù uya,’ tetok tùuya kupù tùuya yau.
21Sàlà ken na' law wechi màlà Katù uya ikupù uya màlà teppù lùssan wakkà'nài pe? Kane ku! Masapùla law tùsak wema'nàtok tùnài pe yau, ikasa we'nàtok uyàpùppù kulu sàlà eppaino law winà. 22Tùse Katù Maimu uya tamù'nawolon kon kappon yamùk wechi màlà makui meluntàlù yo'no tesak màlà. Màlàpàk itùlù tùuya teppù Katù uya, itùsak lùppù ailon tetok Jesus Christ pàk winà tùlù màlà ailon tawonnan piyak.
23Ailon tetok uyàpù wapiya law yo'no we'nàppà màlà imeluntàlù yo'no, sàlà ailon tetok usenpoika ponalà. 24Màlàpàk Law wechippù màlà kùyesak kon pe, kùyenupanài'nokon pe Christ uyàpù ponalà, ikasa anùnnàtoppe Katù pokonpe ailon tetok yai. 25Sàlà pe nen uchi ailon tetok uyàssak man, law, kùyesak kon, yo'no làma pùla nen uchi we'nà man.
26Tamù'nawolon kon amyamlo wechi màlà Katù munkà pe Christ Jesus pàk ailon tetok auya'nokon winà. 27Masapùla tamù'nawolon kon mùkyamlo iichenpataukasak nai'nannùk Christ yak, wepontàsak màlà Christ yak. 28Màlàpàk tùpatalà we'nàtok pùla iwechi màlà Jew yamùk molopai Jew yamùk pen kùlottau, apyoto ton molopai apyoto ton pen kùlottau, kàyik yamùk molopai nossan yamùk kùlottau, tamù'nawàlà tewin ewechi kon màlà Christ Jesus yau. 29Christ ponaloppe ewechi kon yau, Abraham payan pe kulu ewechi kon màlà, molopai Katù uya itùlù tùuya teppù lùppù yanùmù auya'nokon.
