Hebrews 5

₁Eke kulu paatele mùkkàlà yanùnsak kappon yamùk kùlottapai iwe'wotokomatoppe kappon yamùk ponaloppe Katù pokonpe. Lepantok tùnai pe molopai kamo wànài pe, tùtùsen pe kappon yamùk makuyi ponaloppe. ₂Masapùla tùmàlà pe nàlà attu'mùla tùwechi pàk kappon yamùk pàlikanài mùkkàlà, pakko pe molopai iitassappe lànen tok wechi tùse. ₃Sàlà wenai kamo wànài nàlà mùkkàlà tùmakuyi ponaloppe, kappon yamùk makuyi ponaloppe kamo wànà tùuya kasa. ₄Ànù'là mùkkàlà sàlà namantok yanùnnài tùyiwalà eke kulu paatele pe we'nàtok yau pen. Katù nùkà'mappù pe làkku iwechi màlà, Aaron wechippù kasa. ₅Màlà kasa làma Christ uya namantok yanùmùppù pen tùpona eke kulu patele pe tùwena yau. Tùse Katù uya ipàk, “Umu àmàlà, sàlà pe Àkàipùnù pe wenasak man,” teppù. ₆Tùulon yailà nàlà, “Paatele pe ewechi màlà tàwàlàlà, Melchizedek yekkwa pe,” teppù ya.

₇Tùwemapù non po yau Jesus wàpùlemappù màlà molopai Katù pawanattàppù ya eke pe tùkalanse molopai tenupalu tùkkwanse, tùpùikattà toppe ya weli'nàtok winàpai. Katù uya imaimu yetappù màlà masapùla tùmaimu yawàlà iwettùssak tamù'nawàlà pàk. ₈Katù Mumu pe lànen iwechi tùse, mayin yawàlà we'nàtok pàk iichenupappù màlà tùwettalumattàtok winà. ₉Ikasa kulu Jesus wekonekasak pàk, mùkyamlo tùmaimu yawolon kon nà pùikattà ya màlà tàwàlàlà. ₁₀Màlàyau Katù uya yanùmùppù màlà eke kulu paatele pe iwettoppe Melchizedek yekkwa pe.

₁₁Màlà yentak palà ina nekama molo man àpàkù'nokon, sàlà pàk. Tùse sa'man pe ina uya yekama àpàkù'nokon wechi màlà, masapùla tànànpàk ittutok auya'nokon yau ewenasak kon pàk. ₁₂Sàlà yattai'ne enupannan pe ewettok kon wechippù nai'nùk, tùse tu'ma wapiyalok usenupantok Katù Maimu yawon pàk eyenupanài'nokon iche lùppù messatàik. Manak iche ewechi kon, sa'man kùyali pen. ₁₃Ànù'là manak pàk nemassai'nùk wechi màlà mule pe lùppù. Iichenupasappe pùla tok wechi iwalai winàpai iwalai pen ittutoppe tùuya'nokon. ₁₄Sa'man kùyali màlà ichemokkasak kon ponalok. Mùkyamlo ichenupasak kon pe nai'nannùk, wakù winàpai àli ittun nan.