Hebrews 4

₁Màlàpàk uchi wàlàkka'nà patassek yak wewonnàtoppe Katù nekamappù lùppù, walùppù man. Usenalipanpai'nokon uchi, ànù'là àkklottawon kon nàmà kùye'mappù tau tukaik. ₂Wakù Itekale yetappù'nokon nàlà man, tok uya yetappù kasa làma. Itekale yetappù tok uya tùse yà'là pe pùla tok pona iwechippù màlà. Masapùla mùkyamlo yetannan nùssan uya ailon tesak pùla iwechi pàk. ₃Kùmyamlo ailon tawonnan wewomù màlà màlà wàlàkka'nàtok yak. Tùse mùkyamlo pàk “We'naikasak wechippù màlà molopai meluntà pe, ‘Tok wewomù wàlàkkattok yak pen màlà!’ ” teppù Katù uya kasa. Katù uya wa teppù màlà tùwotokoyi wenukassak lànen tamù'nawolon konekasak tùuya yau tùse. ₄Masapùla tùulon yailà Katù Maimu yau, ichelupappù man 7 pe iku'nài wei pàk, “Katù wàlàkkapùppù màlà 7 pe iku'nài wei yattai tamù'nawolon tùwotokoyi winàpai,” tukaik. ₅Molopai tu'ma sàlà pàk iichelupasak màlà, “Tok wewomù wàlàkkattok yak pen màlà ,” tukaik. ₆Walùppù iwechi màlà, màlà wàlàkka'nàtok yak tùulon kon utàtoppe, masapùla mùkyamlo wapiya Wakù Itekale yetannan nùssan wechippù màlà imaimu yawàlà pùla, màlàpàk tok utàppù wàlàkkanàtok yak pen. ₇Màlàpàk Katù uya tùulon wei kupùppù màlà ‘Sàlà pe’ tukaik tesassen. Sàlà yekamappù ya tachin pe tùpo David winà, wapiya wateppù kasa, “Sàlà pe Katù Maimu yeta auya'nokon yau, sa'man pe eyewan kon kùssa'mankatàu.”

₈Masapùla Joshua uya kappon yamùk wàlàkkattok ke tok lepasak yau, Katù uselupappù tùulon wei pàk pen sàlà eppaino. ₉Wàlàkka'nàtok lùppù molo man 7 pe iku'nài wei yattai Katù pemokono yamùk ponaloppe. ₁₀Masapùla ànù'là Katù wàlàkkattok yak newonyai'nùk, wàlàkkapù nàlà màlà tùwotokoyi yapai, Katù wàlàkkapùppù tùwotokoyi yapai kasa làma. ₁₁Màlàpàk uchi tamù'nawàlà kùnùttu kon ikuppai'nokon man utàntokkonpe màlà wàlàkka'nàtok yak. Ànù'là kùkklottau'nokon Katù Maimu yawàlà pùla kùsettak, mùkyamlo kappon yamùk wechippù kasa.

₁₂Masapùla Katù Maimu màlà nulànan molopai meluntà. Yàkek, asa'lon yà kasupala yentaino. Tùutàsen màlà i'nak esak molopai akkwalù wessepotok tepose, molopai àppù yese'mu, molopai àppù pùnawon wessepotok tepose. Katù Maimu màlà kappon yamùk yewan wettok iche molopai ichenumenkatok ittunài kulu. ₁₃Yà'làlà wechi yonansappe pen màlà Katù winàpai, tamù'nawolon inkonekappù yau. Tamù'nawolon wechi màlà ayupo itenu yau. Molopai tamù'nawolon ikussak lùppù yekama màlà ipàk ailon pe.

₁₄Mùkkàlà eke kulu paatele yesappe we'nà'nokon man, mùkkàlà iitàsak lùppù Epùn pona, Jesus, Katù Mumu. Màlàpàk uchi meluntà pe utachinpai nokon, ailon tetok kùuya'nokon pàk. ₁₅Eke kulu mùkkàlà kùpaateleyi kon tùusentuppasen molopai attu'mùla we'nà ittunài. Tamù'nawàlà kùyittutok yekkwa ittuntok yawà iitàppù màlà, tùse àli kupùppù ya pen. ₁₆Màlàpàk tùwe'namaik pùla uyà'nàpai'nokon Katù yapon yemloto pona, wakù kuttok ya kùponaloppe patassek yak. Molo usentupantok yanùmù màlà molopai wakù yepolo, kùpùikattànài iche we'nàtok yattai.