Hebrews 3

₁Màlàpàk utonpa yamùk, amyamlo esuken ikonekasak kon molopai ikà'masak kon Katù winà. Jesus yentàk kon, mùkkàlà yeunossak lùppù molopai eke kulu paatele, mùkkàlà ina nekamayai'nùk. ₂Ailon pe iwechippù màlà, Mùkkàlà, sàlà wotoko kuttoppe tùuya tanùnnàippù pàk. Moses wechippù ailon pe Katù yùwùk tau, tùwotokoyi yau kasa. ₃Tapùi yamùnài mùkkàlà kàyik apulàntok molopai namantok yeponài eke peiwa tapùi yentai. Màlà kasa làma Jesus uya màlà apulàntok molopai namantok yepolo eke peiwa Moses yentai. ₄Tamù'nawolon tapùi màlà kappon namùppù tùse Katù mùkkàlà tamù'nawolon yà'làlà konekanàippù. ₅Molopai Moses wechippù màlà ailon pe apyoto pe Katù yùwùk tau tamù'nawàlà tùwettok yau. Ichelupappù màlà Katù uselupatok yenpoika pàk, ailon pe sàlà pe tùwekkupù woton yekama pàk. ₆Tùse Christ mùkkàlà ailon, paatele, imu. Molopai kùmyamlo mùkyamlo itùwùk, meluntà pe tùusenalippaik pùla molopai enpen we'nàtok kon pàk tùutachiik we'nà'nokon yau.

₇Masapùla Wakù Akkwalù wanùkayan, “Sàlà pe, Katù Maimu yeta auya'nokon yau, ₈sa'man pe eyewan kon kùssamankatàu, pena ewechippù kon Katù winàpai eyiwalà'nokon eppai ewechi kon yau kasa. Wontaik yau Katù tùlùppù auya'nokon ittuntok yak yattaino kasa. ₉‘Atamo kon uya uyittuppù molopai pàlikantok uya ittuppù tok uya màlà motau. Màlà unkupùppù 40 pe kilichimochi yene tùpo lànen,’ ₁₀Màlà wenai we'naikasak wechippù màlà mùkyamlo kappon yamùk pàk, molopai, ‘Ikasa pùla tùwessan mùkyamlo, tàwàlà tùutassan tewan kon yau, molopai uyeselu ittu tok pùla iwechi màlà,’ teppù uya. ₁₁We'naikatok yau yekamappù uya, ikupù uya kulu tetok uya yau ‘Wàlàkkattok yak tok uyàpù pen màlà,’ teppù uya.

₁₂Utonpa yamùk, masa yentàk kon, àli pe eusenumenkatok kon wapùla ailon te pùla we'nàtok ànù'là lattàtak, tùwemassen Katù winàpai. ₁₃Tùse làkku echimeluntàlù yak ettàk kon wei kaichalà, ikuttok yattai wechi molo ‘Sàlà pe’ lùppù kùlottau. Àkklottau'nokon ànù'là yennaka ailon tetok ya pùla àli kuttok winà tukaik. ₁₄Masapùla uyà'nàsakù'nokon nai'nùk Christ pùkkù pe, utachinpai'nokon uchi meluntà pe wapiya ailon teppù kùuya'nokon nùppù pàk, iwenukapù tepose.

₁₅Wa tesak lùppù kasa, “Sàlà pe imaimu yeta auya'nokon yau, eyewan kon kùssa'mankatàu, Katù winàpai eyiwalà eppai ewechippù kon wontaik yau kasa.” ₁₆Ànùk yan ken mùkyamlo Katù Maimu yetannan nùssan, molopai màlà yawàlà pùla iwessak kon? Mùkyamlo pen na', tamù'nawolon kon Egypt yapai Moses nalàssan pen? ₁₇Ànùk yan pàk ken Katù we'naikasak wechippù 40 pe kilichimochi kaichalà? Mùkyamlo, iwemakuimasak molopai tàkàpù kon nànnàinan nùssan wontaik yau pen na'? ₁₈Molopai, ànùk yan pàk ken Katù uya, “Ailon pe kulu tok uyàpù pen màlà wàlàkkattok yak,” teppù? Mùkyamlo pen na', imaimu yawolon kon nùssan pen? ₁₉Yene'nokon uchi man, ailon te tùuya'nokon pùla iwechi pàk tok wewomù pùla iwechippù wàlàkka'nàtok yak.