Hebrews 2

₁Màlàpàk uchi yetasak lùppù pàk ailon te pai'nokon man sa'man pe lùiwa, iwinàpai utaman'nokon tukaik. ₂Itekale, inchelù yamùk nekamappù usenpoikappù màlà ailon pe, molopai ànù'là iku'nàippù pen wapùla imaimu yawàlà iwessak lùppù pen uya talumattàntok yepoloppù màlà ikasa. ₃Yà'là kasa ken uchi wepen eke kulu wepùikattàntok yetapàtù kùuya'nokon yau? Sàlà wepùikattàntok yekamappù màlà Itepulu Jesus uya wapiya, molopai màlà yetannannùssan uya yekamasak màlà kùpàkù'nokon. ₄Katù uya tùmàlà pe, ailon pe sàlà itekale wechi ittutok ipàkàlà kupùppù màlà, tùpatalo'nan tensen yekkwa pen molopai enumenkannan kupù tùuya winà. Molopai Wakù Akkwalù winàpaino lepantok yamùk yekamùppù ya màlà teselu yawàlà.

₅Inchelù yamùk kupù ya pùn, tùuyàpù woton wolù yepulu pe tok wettoppe, ipàk uselupan nokon nai'nùk. ₆Tùse tùulon yailà Katù Maimu yau, “ yà'là yekkwa ken kappon, eusenumenka pa ipàk, wapùla kàyik mumu, imainanpa pa?” teppù. ₇“Ikonekappù auya malalà inchelù yamùk ma'leiwa, apulàntok ke ilepappù auya molopai namantok ke. ₈Molopai tamù'nawolon yepoi iwettoppe ikupùppù auya.” Tamù'nawolon yepoi iwettoppe kappon kupù tùuya yau, Katù uya yà'làlà kupùppù itemyak tùnonkaik pùla pen màlà. Tùse kan sàlà pe tamù'nawolon yepoi, itepulu pe kappon wechi yene'nokon pùla man tà. ₉Tùse Jesus yene'nokon man, malalà inchelù yamùk ma'le imasak lùppù, sàlà pe nen uchi apulàntok molopai namantok ke yalùkottàsak man, masapùla weli'nàtok yau iwettalumattàsak pàk. Màlàpàk Katù wettok wakù pe winà, tamù'nawolon kon kappon yamùk ponaloppe weli'nàtok ittutoppe ya. ₁₀Katù uya màlà tamù'nawolon konekappù molopai tamù'nawolon màlà iponalok, màlàpàk ikasa iwechippù màlà Katù uya Jesus kupù ikasa iwettalumattàtok winà. Sàlà kupùppù ya màlà tukkan kon Katù munkà yamùk yatoppe molopai tok pùikattà toppe Jesus uya tùwettalumattàtok winà.

₁₁Asakklàma, mùkkàlà esuken kappon yamùk konekanài molopai mùkyamlo inkonekassan esuken wechi màlà tewin Ikàipùnù. Màlàpàk uchi Jesus wekuli'ma pùla iwechi màlà tok yesatù tùuya pàk tùkàipùnù munkà pe. ₁₂“Utonpa yamùk yelupa uya màlà àpàk. Katù, ayapulàtok yelenka uya màlà ilinà kappon yamùk yemlotopo,” teppù ya. ₁₃Molopai tu'ma “Ailon tetok uya tùlù uya màlà Ipàk,” tawon. Molopai, “talà wessaik mule yamùk Katù uya ulepappù lùssan pokonpe” tawon tu'ma mùkkàlà.

₁₄Kùmyamlo kappon yamùk wechi màlà tùpun ke molopai tùmùnù ke, màlàpàk Jesus wenappù nàlà màlà kùkasa'nokon. Iwelikùppù màlà Makui mattanùttoppe tùuya, mùkkàlà, weli'nàtok meluntàlù yesak. ₁₅Molopai tamù'nawàlà mùkyamlo tàwàlàlà tùusenalipaik weli'nàtok pàk tùwemassan pùikattàtoppe tùuya. ₁₆Masapùla ittu'nokon man, inchelù yamùk pùikattàse iyàpùppù pen màlà, tùse làkku Abraham payan pùikattàse iyàpùppù. ₁₇Màlà kasa iwechi pàk màlà Jesus kupùppù tamù'nawolon yau itonpa yamùk ikàipùnù munkà yamùk kasa, tùusentuppasen pe molopai ailon kulu eke paatele pe iwettoppe Katù wotokoyi yau molopai tok makuyi pàk Katù usentuppatoppe. ₁₈Masapùla tùmàlà nàlà wettalumattàsak Makui uya tùttutok yau pàk, tùttutok kon ya yau nàlà tùwessan pùikattànài pe iwechi màlà.