Hebrews 1

₁Pena Katù uya kùtamo kon yelupappù tukke itekkwa molopai tukkan yawà tùmaimu yenpoikannan winà. ₂Tùse sàlà pata weyu wenukattok yau kùyelupasak kon ya man Tùmu winà. Katù uya pùsàlà mappù màlà tamù'nawolon yesappe molopai Iwinà tamù'nawolon konekappù ya. ₃Katù Mumu mùkkàlà tùulenpansen Katù yakkwayi ke. Katù yenpoika ya tamù'nawàlà, molopai tamù'nawolon tùnkonekappù yachinài mùkkàlà apàikkek tùmaimu ke. Wakù pe, tok uya àli kuttok yapai kappon yamùk kupù tùpo, iweleutappù màlà epùn po wakù kulu patassek Eke kulu Katù laitanù winon yak.

₄Katù uya Tùmu kupùppù màlà eke pe inchelù yamùk yentai, itesek, Katù uya ilepappù lùppù ike wechi apàikkek pe tok yentai, kasa làma. ₅Masapùla inchelù yamùk pàk, “Umu àmàlà, sàlà pe Àkàipùnù pe wenasa'man,” tawon pen. Wapùla Katù uya, “Ikàipùnù pe wena màlà, molopai Umu pe iwechi màlà,” tesak pùla iwechi màlà tok pàk ₆Wapiya iwentusak lùppù Tùmu yeunoko pàk Katù wekkupù non pona yau, “Tàwà tamù'nawolon kon Katù inchelùyi yamùk nùnamai,” teppù ya. ₇Sàlàichi màlà wa teppù ya lùppù inchelù yamùk pàk tùuselupa yau, “Katù mùkkàlà tùyinchelùyi yamùk ku'nài assetun kasa, molopai tapyoto yamùk ku'nài mùkkàlà apok ulenpansak kasa,” tawon. ₈Tùse Tùmu pàk tùuselupa yau, “Katù!Itepulu pe ewettok wechi màlà tàwàlàlà molopai tàwàlàlà, molopai itepulu pe ewettok woton ikasa,” teppù ya. ₉“Ikasa nai'nùk pùnùnmanài àmàlà molopai àli kuttok yeya'nomanài. Màlàpàk uchi Katù, Akatùyi uya ayanùmùppù màlà apatùnayi yamùk yepoi, utauchinpantok kalapayi ke akalapaima tùuya winà,” ₁₀“Àmàlà Itepulu, iwepyattà pe non konekappù auya, molopai eyemyatù ke kak konekappù auya,” teppù ya nàlà. ₁₁“Tamù'nawàlà màlà yamùk waliwomù màlà, tùse ewemapù màlà tàwàlàlà. Tamù'nawàlà tok umattatok woton, pon wena ipoippà pe kasa,” ₁₂“Kussan pon kasa màlà yamùk yamoko'ma auya màlà, molopai pon kasa màlà yamùk wemyakanma. Tùse wa lùppù ewechi màlà, Amoko pe ewena pen,” teppù ya. ₁₃Katù uya tùyinchelùyi yamùk tonpa pàk là, “Eleutakà talà ulaitanù winà, eyeyatonnon nonka uya atta yapon pe ponalà,” tesak pùla iwechi màlà. ₁₄Tamù'nawàlà ken na' inchelù yamùk mùkyamlo Akkwalù yamùk tùwe'wotokomasan pe yeunossak kon pen, mùkyamlo Katù ponalok kon epùikattàpaino kon pùikattànan pe?