Philemon 1

₁Sàlà màlà Paul nùmenukappù Philemon yemyak. Paul, yachisak pe nai'nùk Jesus pàkànsau, Timothy winàpaino nàlà sàlà.

Kaleta menukasak ina uya sàlà ina wechi yakon molopai ina we'wotokoma tonpa kulu Philemon yemyak. ₂Ailon tawonnan àyùwùk tak tùwepilichan piyak, kùpachi Apphia molopai kùtonpa soicha Archippus piyak.

₃Tàwà Katù Kùkàipùnù kon molopai Itepulu Jesus Christ elepai'nokon wakù pe we'nàtok molopai echitonpa pe we'nàtok tùwinàpaino ke.

₄Utonpa Philemon, wàpùlema yau tàwàlàlà, eyekamanài Iulà, molopai tenki tawon Katù pàk. ₅Masapùla tamù'nawàlà kappon yamùk pùnùnma auya tukaik tetayaik, ailon tetok auya Itepulu Jesus pàk, yeta uya pàk. ₆Wàpùlema sàlà wakù pe ailon tetok yai Christ ponaloppe ikupù nai'nùk usenpoikatoppe i'napailàiwa. ₇Pùnùnmantok auya uya kulu eke pe uyauchinpasak man, utonpa, molopai umeluntàlùttàsak ya. Masapùla tamù'nawàlà Katù ponalok kon kappon yamùk yewan yenpakasak auya pàk.

₈Sàlà winà tùwe'namaik pùlaiwa wechi eppaino, àtonpa pe Christ ponaloppe tùwekkusse, eyekamappo uya tùkussen kupù pa . ₉Tùse làkku uchi'nùnmantok ukussan apawanattàtoppe uya. Sàlà tùkussaik amoko pe echi'ma Paul pe echii'ma, Christ Jesus ponaloppe tùuselupasen pe echii'ma molopai sàlà pe ipàkànsau yachichak pe echii'ma. ₁₀Màlàpàk apawanattàyan Iulà Onesimus pàkànsau. Mùkkàlà umu Christ Jesus yau, masapùla patikichi tau echii'ma ikàipùnù pe wessak màlà Christ ittutoppe ya. ₁₁Pena yapulà auya yentai iwechippù màlà, tùse sàlà pe tapulàsen pe man asakklàma àmàlà molopai Iulà tukaik.

₁₂Yeunottukka uya sàlà apyak, molopai ya'là uyewan nùtàyan. ₁₃Patikichi tau wechi yawàlà upyau ànkupai wessaik Wakù Itekale yekama pàk, upùikattàtoppe ya apatassek yau. ₁₄Eyeka'nonkapai pùla kan wessaik tà upùikattà pa, tùse eyiwalà làkku ikupù auya iche wessaik. Màlàpàk yà'làlà kupù uya pen sàlà, “Ewaik,” te auya ponalà.

₁₅Yattai pùla Onesimus wechippù apyau pen sàlà malalà, tachinpe nen uchi tùwennapposak yau apyau tùwettoppe. ₁₆Sàlà pe te'masen pe pùla tùwe'wotokomasen pe neken pùla man, tùse apyoto yentai: kùtonpa pe kulu man Christ yau. Màlà yentai man upona! Màlà yentai nen uchi àpona'nokon iwechi màlà Itepulu yau!

₁₇Màlàpàk àtonpa pe ukupù auya yau, yanùnkà uyanùmù auya kasa. ₁₈Yà'làlà iwalai pen kussak ya ewinàkàik yau, wapùla yà'làlà yanùnsak ya ewinàpai te'maik pùla yau, ye'matoppe uya ikukkà. ₁₉Sàlà menuka uya sàlà uyemyatù ke: Iulà, Paul, uya eye'ma màlà. Uwomasak auya man àmàlà, ewemattok ke, màlà pàk là eyenu yappontà uya pen salà . ₂₀Màlàpàk, utonpa, sàlà tàwà ikukkà uponaloppe itepulu pàkàsau: uyewan yenpakakà utonpa Christ yesek yau!

₂₁Sàlà menukai'ma unekamappoppù kupù auya pe kulu tùttuyaik molopai yekamappoppù uya yentai ikupù auya pe. ₂₂Màlà kupùi'ma, upatassek woton ikonekakà, masapùla Katù uya tùpawanattàtok auya'nokon yeiku pe tùttuyaik unnapo ya apyakù'nokon pe.

₂₃Epaphras patikichi tau nai'nùk upokon pe Christ Jesus pàkànsau, “Wakù pe na' messan?” nùkayan, ₂₄molopai nàlà we'wotokoma wechiyakon non Mark, Aristarchus, Demas, molopai Luke.

₂₅Tàwà Itepulu Jesus Christ winàpaino wakù pe we'nàtok nechii tamù'nawàlà apyau'nokon.