John 12

₁6 pe wei Usentaka'nàppà yattai Uta'lettàntok wapiya, Jesus utàppù Bethany pona. Lazarus welichak wuluukappù tùuya yak. ₂Molo kùyali konekappù tok uya iponalok pe molopai Martha uya yekamùppù, Lazarus wechippù tok tonpa pe chichiupe Jesus piyau uta'lettàntok yapon po, ₃Màlàyau Mary uya nard itesek appoi'nan kalapa, epekkek, 1pound yalàppù molopai Jesus pùta kalapaimappù ya molopai ya'munakkappù ya tùnsek ke. Tamù'nawà tapùi tau appoi'ne ikà'nùmùppù. ₄Tùse Jesus nenupa ton tonpa, Judas Iscariot, usàulàmappù, Simon mumu Jesus yeimippo woton. ₅“Yà'là pe iwechi pàk sàlà appoi'nan kalapa chilanma pùn, 300 pe chilùpa pun kaichalà molopai entuppa'nokon yemyak pùlayatta tùtoppe?” teppù. ₆Judas uya wateppù màlà, entuppa'nokon pàk tùusentuppa pàk pùla, tùse amak pe tùwessen pe tùwechi pàk, molopai pùlayatta yen tùpyawon yapai tùwepùikattàsek pàk. ₇Jesus uya, “Tàwà nechii, inmainanpappù sàlà uwu'nattà weyu ponaloppe. ₈Tàwàlàlà entuppa'nokon wechi màlà apyau'nokon, tùse Iulà wechi màlà apyau'nokon tàwàlàlà pen,” teppù.

₉Tukkan kon Jew yamùk uya molo Jesus wechi Bethany po yetappù, màlàyau tok utàppù Jesus pàkànsau neken pùla, tùse Lazarus nàlà iwelichak yau inwuluukappù lùppù yense. ₁₀Màlàyau paatele yamùk yennàinan wekkupùppù Lazarus nàlà tùlù pàk iwàtoppe, ₁₁masapùla itekale lùppù pàkànsau, tukkan kon Jew yamùk wemokkappù Jesus winàkàik molopai ailon tetok tùuya'nokon ipàk tùlùppù tok uya.

₁₂Iwemassak pe tukkan kon kappon yamùk Uta'lettàntok pàk iyàssak kon uya Jesus uyàpù Jerusalem pona yetappù. ₁₃Màlàyau tok uya kumya yale yamùk yepoloppù molopai tok utàppù yepose, molopai tok wentaimeppù, “Hosanna Katù yapulàtàk kon! Ipùlemasak mùkkàlà nùyàssai'nùk itepulu yesek yau! Ipùlemasak mùkkàlà Israel yamùk Kinù!” tukaik. ₁₄Màlàyau Jesus uya tonki yepoloppù molopai ipo iitàppù, iwe'menukasak Katù Maimu yau kasa, ₁₅“Kesenalippai Zion Yenchi! Yenkà, Ekinù nùyàssan, tonki mule lùkkwà po,” tukaik. ₁₆Wapiya sàlà yamùk ittuppù inenupa ton uya pen màlà, tùse Jesus nonkasak namantok patassek yak tùpo, iwelichak we'wuluukasak molopai epùn pona iità tùpo nen uchi tok uya ittuppù. Sàlà yamùk we'menukasak ipàk lùppù molopai sàlà yamùk wekkussak iwinàkàik.

₁₇Mùkyamlo kappon yamùk Jesus piyau iwessak kon nùssan Lazarus welichak wuluuka ya uluwaik yapai yattai, wechippù yekama pàk lùppù tùulon kon pàk. ₁₈Màlàyau tukke kappon yamùk utàppù iwakkàsse, masapùla sàlà ittutok ipàkàlà kussak ya yetasak tùuya'nokon pàk. ₁₉Pharisee yamùk uya tùtonpa kon pàk, “Masa yenkà, ikupù'nokon pe pùla kulu man, Masa yentàk kon! Tamù'nawàlà wolù yawon kon utàkassak ya'là!” teppù.

₂₀Uta'lettàntok yattai Katù nama pe yapulàik iitàsak kon kùlottau màlà Greek yamùk tonpa yamùk wechippù. ₂₁Tok uyàpùppù Philip piyak, Galilee yawon Bethsaida pon piyak, “Jesus enenpai ina man yakko,” teppù tok uya ipàk. ₂₂Philip utàppù Andrew pàk yekamaik, molopai asak tok uya yekamappù Jesus pàk. ₂₃Jesus uya tok maimu yeikuppù, “Wei uyàssak man, mùkkàlà Kàyik Mumu, yanùntok namantok patassek yak yattai. ₂₄Ailon kulu sàlà, tewin nùkkwà a'naik wepukasak non pona yau tewin nùppù iwechi màlà tùse iwelichak yau, iwata molopai iwepeta tukke. ₂₅Ànù'là tùwemattok pùnùnmanài uya màlà ilachima. Tùse mùkkàlà sàlà non po tewanmape tùwemattok kussai'nùk uya màlà tàwàlàlà tùwemattok yepolo. ₂₆Ànù'là iche wettok ku'nài uyàpù màlà uya'là, molopai i'nailà là wechi yau, molo nàlà upoitolù wechi màlà. Ukàipùnù uya mùkkàlà yapulà màlà,” tukaik.

₂₇“Sàlà pe Uyewan nùtaimelunpayan, molopai yà'là te uya? ‘Ukàipùnù, sàlà wei winàpai kùpùikatàkà,’ te uya ka'lù? Kane, sàlà pàkànsau uyàssak sàlà, sàlà wei motak. ₂₈Ukàipùnù, eke pe eyesek wettok yenpoikakà,” teppù Jesus uya. Màlàyau mayin uyàpùppù epùn poi, “Eke pe wettok yenpoikasak uya màlà, molopai yenpoika tukka uya màlà,” tukaik.

₂₉Ilinà kappon yamùk ipyau satippe tùwessan uya mayin yetappù, “Wala'napi màlà,” teppù tok uya, tùse tùulon kon uya, “Inchelù nelupai,” teppù. ₃₀Màlàyau Jesus uya tok pàk, “Sàlà mayin màlà àponalok, Iulà pen. ₃₁Sàlàichi màlà sàlà wolù yawon kon kappon yamùk ittutok weyu. Molopai sàlà peichi sàlà wolù yepulu yenpakka màlà,” teppù. ₃₂“Molopai non poi uyanùnsak yau, tamù'nawolon kon nepù uya màlà upyak,” teppù Jesus uya. ₃₃Sàlà teppù ya màlà tok pàk, yà'là yekkwa là weli'nàtok yau tùwelikù yekama pe. ₃₄Ilinà kappon yamùk uya Imaimu yeikuppù, “Ina uya yetasak man Law yapai, Christ wemapù màlà tàwàlàlà tukaik, tùse yà'là kasa ken uchi wa te auya nai'nùk Kàyik Mumu yanùmù màlà te auya? Ànùk ken uchi mùkkàlà Kàyik Mumu?” tukaik. ₃₅Màlàyau Jesus uya tok pàk, “Akkwa wechi màlà apyau'nokon tachin pe kulu pùla. Asatàk kon akkwa pe iwechi kùlottau, ewalupà uyàpù àpona'nokon wapiya. Ewalupàttau tùusasen mùkkàlà i'nailàlà tùutà ittunài pen. ₃₆Ailon tukaik ettàk kon akkwa pàk itesak pe ewechi kon kùlottau molopai akkwa munkà pe ewena kon màlà,” tukaik. Tùuselupakapù tùpo Jesus utàppù molopai tok winàpai iicho'namùppù.

₃₇Ittutok ipàkàlà kuppàssak ya lànen temloto kon po tùse ailon teppù tok uya ipàk pen màlà. ₃₈Sàlà wekkupùppù màlà Katù Maimu yenpoikanài Isaiah uselupappù wekkutoppe, màlà kasa iwechi màlà teppù ya kasa, “Itepulu, ànùk uya ailon tesak kùmaimu pàk nai? Ànùk yemyak Itepulu meluntàlù usenpoikappù?” teppù ya kasa. ₃₉Màlàpàk ailon teppù tok uya pen màlà masapùla Isaiah uya wa tesak tu'ma pàk. ₄₀“Katù uya enpùla tok yenu kussak màlà, molopai tok usenumenkatok yakkosak ya, tenu kon ke tok uya yene tukaik molopai tùusenumenkatok kon ke tok uya ittu tukaik, wapùla tok welattà pen uwinàkàik, tipittàtok kon pe uya,” tukaik. ₄₁Sàlà yamùk teppù Isaiah uya màlà masapùla Jesus yapulàtok yensak tùuya pàk, molopai ipàk ichelupappù.

₄₂Wa tùse là tukke Jew yamùk yepulu ton kùlottau uya ailon teppù tok ipàk, tùse tok uya yekamappù pen masapùla Pharisee yamùk pàk tùusenalippa kon pàk, Jew yamùk wepilittok itak tapai tenpakka kon tukaik. ₄₃Masapùla Katù uya apulàntok yentai kappon yamùk uya tapulàtok kon ku'nàinan mùkyamlo tù'nùn kon pe.

₄₄Jesus wentaimeppù eke pe, “Ànù'là ailon nùkayai'nùk upàk uya, ailon te upàk neken nà pen màlà, tùse mùkkàlà nàlà uyeuno'nàippù pàk. ₄₅Molopai uyenyai'nùk uya nàlà uyeuno'nàippù yensak màlà. ₄₆Uyàssak sàlà, wolù weyu pe, ànù'là ailon tawon upàk wechi ewalupàttau tukaik. ₄₇Ànù'là umaimu yetanài molopai yawàlà tùwessen pen kottùma uya pen màlà. Wolù yawon kon kappon yamùk kottùmaik uyàssak pen sàlà, tùse tok pùikattàik. ₄₈Ànù'là unulunpanài molopai umaimu yanùnnài pen kottùmanài wechi màlà molo. Mayin unekamappù wechi màlà ikottùmanài pe wei wenukassak yattai. ₄₉Masapùla uyiwalà là uselupa pùn tùse Ukàipùnù uyeuno'nàippù uya yà'là tukaik là molopai yà'là kasa là uselupatok pe suwa kakkà teppù. ₅₀Molopai tùttuyaik iichelupatok uya tàwàlàlà wema'nàtok tùlù. Màlàpàk yà'làlà tukaik uselupa màlà Ukàipùnù uya upàk yekamappù yawàlà,” teppù Jesus uya.