John 13

₁Usentaka'nàppà pàk Uta'lettàntok weyu wapiya. Jesus uya ittupù màlà sàlà wolù nàmà tùuya molopai tùkàipùnù piyak tùwennappo weyu uyàkkassak. Mùkyamlo tùponalok pe tùwessan pùnùnmappù ya màlà, molopai tok pùnùnmatok tùuya yenpoikappù ya màlà tùwemattok wenukapù ponalà.

₂Jesus molopai inenupa ton wechippù màlà tùuta'lettà kon pàk ko'manpe. Makui uya Jesus yeimippotok ya tùkassak wechippù Judas Iscariot yewan yak. Pùsàlà mùkkàlà Simon mumu. ₃Jesus uya ittuppù màlà tùkàipùnù uya tamù'nawolon meluntà tùsak temyak, molopai nàlà tùuyàssak Katù winàpai molopai tùwennappo Katù piyak. ₄Màlàyau iwe'wuluukappù tùuta'letà yapon poi, molopai ipploppon tùpon mokkappù ya molopai towelù yaulomùppù ya tùwoloppai pàk. ₅Màlà tùpo tuna mappù ya pùsau yak, molopai tùnenupa ton pùta kukappù ya molopai ya'munakkappù ya tùwoloppai pokon towelù ke. ₆Màlàyau iyàpùppù Simon Peter piyak, màlàyau Peter uya, “Uyepulu, utta kukaichi auya?” teppù. ₇Jesus uya imaimu yeikuppù, “Tùkussai'nùk ittu auya pùla man sàlà pe, tùse masa lùiwa ittu auya màlà,” tukaik. ₈“Kane! utta kuka auya pen kulu màlà,” teppù Peter uya ipàk. Jesus uya imaimu yeikuppù, “Àkukasak uya pùla iwechi yau, upùkkù pe pùla ewechi màlà,” tukaik. ₉Simon Peter uya imaimu yeikuppù, “Uyepulu, walai yau uchi utta neken kùkkukai tùse uyemyatù ikukakà molopai uppai nàlà,” tukaik. ₁₀Jesus uya ipàk, “Ànù'là iwàppùsak lùppù mùkkàlà wakù, tùtta neken nà kuka ya màlà. Wakù pe messatàik, tùse tamù'nawàlà pùla,” teppù. ₁₁Jesus uya màlà teimipo woton ittukapùppù, màlàpàk màlà, “Tamù'nawàlà pùla wakù pe messatàik,” teppù ya.

₁₂Màlàyau tok pùta kukakapù tùpo iwepontàppù molopai iwennappoppù tùpatappù yak. Tok pàk, “Mùttuyatàu na' sàlà pe àpàkù'nokon tùkuppàssai'nùk? ₁₃Ticha molopai Epulu tukaik uyesa'nài nan amyamlo. Molopai ikasa ewechi kon màlà, masapùla mùkkàlà Iulà. ₁₄Sàlà pe, Etichayi molopai Eyepulu kon atta kon kukapàssan, màlà kasa nàlàichi àtonpa kon pùta mùkukatàik,” teppù Jesus uya tok pàk. ₁₅“Yentok auya'nokon ipàkàlà pe tùkuppàssaik àpàkù'nokon, màlà kasa làma ikupù kon pa. ₁₆Ailon kulu sàlà, apyoto mùkkàlà tepulu yentaino pen. Molopai mayin yekamaik yeunossak mùkkàlà teuno'nàippù yentaino pen. ₁₇Sàlà yamùk ittu auya'nokon yau, ipùlemasak pe ewechi kon màlà ikupù auya'nokon yau.

₁₈“Tamù'nawolon kon amyamlo pàk uselupa pen nai'nùk, tùttuyaik nen unanùmùssan. Tùse Katù Maimu uya, ‘Mùkkàlà pùlomù pussak nassai'nùk upyak welattàsak man uwinàkàik,’ teppù kasa iwechi màlà. ₁₉Sàlà pe yekama uya sàlà àpàkù'nokon iwekkupù wapiya, iwekkussak yau nen uchi ailon te kon pa Mùkkàlà pe wechi pàk. ₂₀Ailon kulu sàlà, ànù'là uneunokoppù yanùnnài uya màlà uyanùnsak, molopai ànù'là uyanùnnàippù uya màlà mùkkàlà uyeuno'nàippù nàlà yanùnsak,” teppù Jesus uya.

₂₁Sàlà yamùk te kapù tùpo, Jesus usewankono'mappù kulu takkwalù yau. “Ailon kulu sàlà, tewinan nà àtonpa kon uya uyeimippo màlà,” teppù ya. ₂₂Màlàyau inenupa ton usenpàtùppù, ànùk pàk là wate ya ittu tok uya pùla. ₂₃Tewinan nà Jesus nenupa ton tonpa tù'nùn pe kulu inkupù wechippù màlà mei pùla kulu ipyau. ₂₄Màlàyau Simon Peter uya temyatù ke mùkkàlà yekamappù, “Ànùk pàk là iichelupa yekamappokà,” teppù ya. ₂₅Màlàyau Jesus piyak lùiwa iwepeimappù molopai yekamappoppù ya, “Ànùk uchi, Uyepulu?” tukaik. ₂₆Jesus uya imaimu yeikuppù, “Sà pùlomù pusak pilikasak kipù uya màlà tuma kak molopai mùkkàlà yemyak itùlù uya màlà,” tukaik. Màlàyau pùlomù pusak pilikasak kichak tùuya tùlùppù ya Judas Iscariot, Simon mumu, yemyak. ₂₇Pùlomù pusak yekkwassak Judas uya pe là Makui, wewomùppù yak. Jesus uya ipàk, “Màlà ikupù pàk ewekkussak nai'nùk, ikukkà asse'neiwa,” teppù. ₂₈Ànù'là uta'lettàn yapon woi tùwessen uya, yà'là pe là iwechi pàk Jesus uya wate ipàk ittuppù pen màlà. ₂₉Tùulon kon usenumenkappù masapùla Judas wechi pùlayatta yen yesappe pàk, Jesus uya, “Yà'làlà ye'mata uta'lettàntok woton wapùla entuppa'nokon ilepata,” te pe tok uya yekamappù. ₃₀Màlàyau pùlomù pùsak yekkwatù tùpo Judas wepakkappù tewinanpa. Molopai ewalupà pe iwechippù màlà.

₃₁Judas utàkapù tùpo, Jesus uya, “Sàlà peichi Kàyik Mumu namatok patassek yau usenpoikasak man, molopai Katù yapulàtok usenpoikasak man mùkkàlà yai. ₃₂Katù yapulàtok usenpoikasak yai yau, Katù uya nàlà màlà tùmu yapulàtok yenpoika tùmàlà yau. Molopai tewinanpa ikupù ya màlà. ₃₃Umunkà yamùk, apyau'nokon wechi sàlà malalà. Uyiwa auya'nokon màlà, yekama uya sàlà àpàkù'nokon, Jew yamùk pàk yekamappù uya kasa, ‘Utàyai'nùk yak àutà kon pen màlà,’ ₃₄Emennak Enupantok tùlù uya sàlà, echi'nùn pe ettàk kon. Uyi'nùn pe àkupùppù kon uya kasa, mechinùnmatàik. ₃₅Tùuchi'nùnmaik ewechi kon tense, tamù'nawolon kon uya eyittu kon màlà unenupa ton pe ewechi kon,” teppù Jesus uya.

₃₆Simon Peter uya Jesus pàk, “Uyepulu, i'nailà ken àutà màlà?” teppù. Jesus uya imaimu yeikuppù, “Utàyai'nùk yailà uya'là àuyàpù pen màlà sàlà pe, tùse masa lùiwa là àuyàpù màlà,” tukaik. ₃₇Peter uya ipàk, “Uyepulu, yà'là pe iwechi pàk sàlà pe aya'là utà pen? Wemattok tùlù uya màlà àponalok pe!” teppù. ₃₈Jesus uya imaimu yeikuppù, “Ewemattok tùlù kulu na' auya uponalok pe? Ailon kulu sàlà, kalicho tàwù wapiya màlà, ‘Unùttu pen mùkkàlà,’ te auya àsolùwau itekkwa,” tukaik.