John 14

₁Jesus uya, “Kesewankono'matàu molopai kataimelunpatàu. Ailon katàk kon Katù pàk, molopai ailon katàk kon nàlà upàk,” teppù. ₂“Ukàipùnù yùwùk tau, tukke patassek yamùk man. Sàlà wa pùla iwessak yau yekamappù uya sàlà eppaino. Utà sàlà apatassek kon woton konekaik. ₃Molopai apatassek kon woton konekaik utà tùpo, uyàpù tu'ma màlà ayase'nokon upyak, wessai'nùk motau nàlà ewechi kon pa. ₄Utàyai'nùk yak, pata ye'ma mùttuyatàik,” teppù Jesus uya. ₅Thomas uya, “Itepulu, ina uya nen àutàtok yailà ittu pùla man, molopai atta ken uchi ina uya ite'ma ittu?” teppù. ₆Jesus uya, “Iulà mùkkàlà asanta, ailon molopai wema'nàtok. ànù'là uyàpù Ukàipùnù piyak pen màlà, tùse uwinà neken. ₇Uyittu auya'nokon yau, Ukàipùnù nàlà ittuppù auya'nokon sàlà eppaino. Sàlà motapai mùkkàlà mùttuyatàik molopai nàlà yensak auya'nokon man,” teppù.

₈Philip uya, “Itepulu, Àkàipùnù yenpoikakà ina uya yentoppe, màlà neken nà iche ina man,” teppù. ₉Jesus uya yeikuppù, “Philip, apyau'nokon wessa'man tachin pe, tùse ken na' uchi uyittu auya pùla lùppù iwechi màlà? Ànù'là uyennàippù uya Ukàipùnù yensak màlà. Tùse yà'là pe iwechi pàk màlà, ‘Àkàipùnù yenpoikakà ina uya yentoppe,’ te auya? ₁₀Ailon te auya pùlaichi nai, Ukàipùnù yau wechi molopai Ukàipùnù wechi uyau pàk? Yà'làlà ukayai'nùk àpàkù'nokon màlà uyiwalà là uselupatok pen, tùse Ukàipùnù, uyau nai'nùk mùkkàlà ne'wotokomayai'nùk,” teppù ya. ₁₁“Ailon katàk kon, Ukàipùnù yau wessaik molopai Ukàipùnù uyau man teuya pàk. Wapùla ailon katàk kon upàk eke ton wotoko yamùk kupù uya yensak auya'nokon pàk. ₁₂Ailon kulu sàlà, ànù'là ailon nùkayai'nùk upàk uya nàlà tùkussai'nùk kupù màlà. Sàlà yamùk yentaino kon nùiwa là kupù ya màlà. Masapùla Ukàipùnù piyak utà sàlà. ₁₃Molopai yà'làlà yekamappo auya'nokon uyesek yai yau, ikupù uya màlà. Ukàipùnù yapulà toppe Imu winà. ₁₄Yà'làlà yekamapo auya'nokon màlà upàk uyesek yai, molopai ikupù uya màlà,” teppù ya.

₁₅“À'nùn pe ukupù auya'nokon yau, enupantok uya kupù auya'nokon màlà. ₁₆Ukàipùnù yekamappo uya màlà tùulon àpùikattà kon woton yeunottoppe ya, apyau'nokon tùwechi woton tàwàlàlà. ₁₇Ailon Akkwalù. Sàlà wolù yawon kon uya yepolo pen màlà, masapùla yene tùuya'nokon molopai ittu tùuya'nokon pùla iwechi pàk. Tùse mùkkàlà mùttuyatàik masapùla apyau'nokon iwechi pàk molopai ayau'nokon nàlà iwechi màlà.

₁₈“Tewincha ànàmà kon uya pen màlà ichan pùnon kasa, apyakù'nokon uyàpù màlà. ₁₉Tachin pe kulu sàlà wolù yawon kon uya uyene pen màlà. Tùse amyamlo uya màlà uyene. Masapùla wemapù pàk, ewemapù kon nàlà màlà. ₂₀Màlà wei uyàssak yattai ittu auya'nokon màlà Iulà wechi Ukàipùnù yau molopai amyamlo wechi uyau molopai Iulà wechi ayau'nokon.

₂₁“Ànù'là enupantok uya yanùnnài molopai iku'nài mùkkàlà uyi'nùnmanài. Ànù'là tù'nùn pe ukussai'nùk wechi nàlà màlà Ukàipùnù pùnùn pe, u'nùn pe nàlà màlà ikupù uya molopai usenpoika màlà ipyak,” tukaik. ₂₂Judas (Judas Iscariot pen) uya Jesus yekamappoppù, “Itepulu, atta ken uchi eusenpoika ina piyak, sàlà wolù yawon kon uya yene pen tùse?” tukaik. ₂₃Jesus uya yeikuppù, “Ànù'là tù'nùn pe uku'nài wechi yau, enupantok uya maimu yawàlà iwechi màlà. Molopai Ukàipùnù uya tù'nùn pe ikupù màlà, molopai ina uyàpù màlà ipyak, ipyau emasse. ₂₄Ànù'là tù'nùn pe pùla uku'nài wechi enupantok uya maimu yawàlà pen màlà. Uselupa metayatài'nùk màlà umaimu pen, tùse Ukàipùnù uyeuno'nàippù winàpaino.

₂₅“Sàlà yamùk yekamasak uya man àpàkù'nokon apyau'nokon lùppù wechi kùlottau. ₂₆Tùse àpùikattà kon woton Wakù Akkwalù, yeunoko màlà Ukàipùnù uya uyesek yau. Mùkkàlà uya màlà tamù'nawolon pàk eyenupa kon. Molopai tamù'nawàlà unekamappù àpàkù'nokon nepù ya màlà ittu kon pa.

₂₇“Wàlàkka'nàtok nàmà uya sàlà apyau'nokon, uwinàpaino wàlàkka'nàtok tùlù uya eyemyakù'nokon. Sàlà wolù nùtùlù yekkwa pen tùtùyaik. Eyewan kon kùttaimelunpatak molopai kesenalippatàu. ₂₈Yetasak auya'nokon man àpàkù'nokon, ‘Utà sàlà molopai uyàpù tu'ma màlà apyakù'nokon,’ teuya. À'nùn kon pe ukupù auya'nokon yau, autauchinpa kon màlà Ukàipùnù piyak utà pàk, masapùla Ukàipùnù mùkkàlà eke uyentaino. ₂₉Sàlàichi tekamapàssaik àpàkù'nokon iwekkupù wapiya, iwekkupù yau nen uchi ailon te kon pa. ₃₀Màlà yentak lùiwa àpokonpe' nokon uselupa pen sàlà, masapùla sàlà wolù yepulu nùyàssan. Tùse uyentaino pen imeluntàlù mùkkàlà. ₃₁Tùse sàlà wolù yawon kon uya Ukàipùnù kupù uya u'nùn pe ittutoppe, tamù'nawolon kupù uya yekamappù ya yawàlà.

“E'wuluukatàk kon, utànpai'nokon sàlà motapai,” teppù Jesus uya tùnenupa ton pàk.