Luke 4

₁Jesus wennapoppù màlà Jordan poi Wakù Akkwalù ke tùwanùsse, molopai Wakù Akkwalù uya yalàppù wontaik yak. ₂Màlà motau Makui uya ittuppù 40 pe wei kaichalà. Yà'làlà napùppù ya pen màlà màlà yattai. Màlàpàk iwan pe kulu iwechippù màlà wei wenukassak yau.

₃Makui, uya ipàk, “Katù Mumu pe ewechi yau, sà tàk yekamappokà eki pe iwena toppe,” teppù.

₄Jesus uya yeikuppù, “Katù Maimu uya màlà, ‘Kappon wemattok eki pàk neken kulu là pùla iwechi màlà, tùse tamù'nawolon Katù Maimu pàk,’ ” tesak tukaik. {DEU 8.3}

₅Màlàyau yalàppù ya, kawon wùk pona molopai tewinanpa tamù'nawolon wolù yau itepulu pe, itepoi we'nàtok yekamappù ipàk. ₆“Sàlà yepulu pe we'nàtok ke elepa uya molopai tamù'nawàlà temamin ke we'nàtok ke,” teppù ya ipàk. “Tamù'nawàlà itùsak lùppù sàlà uyemyak molopai itùlù uya nàlà màlà ànù'là unanùmù yemyak,” teppù ya. ₇“Tamù'nawàlà nen uchi sàlà wechi àponalok pe màlà uyapulàsak auya yau,” teppù ya.

₈Jesus uya yeikuppù, “Katù Maimu uya, ‘Itepulu Katù inamakà molopai mùkkàlà neken ya'là ekkà molopai iponalok pe e'wotokomakà!’ tesak man,” tukaik. {DEU 6:13}

₉Màlàyau Makui uya yalàppù Jerusalem pona, molopai kawon kulu Katù Yùwùk ipu pona itùlùppù ya. Molopai ipàk, “Katù Mumu pe ewechi yau, epukakà sàlà motapai,” teppù ya. ₁₀“Masapùla Katù Maimu uya, ‘Katù uya Inchelù yamùk pàk yekama màlà wakù pe amainanpa toppe tok uya,’ tesak man, ₁₁‘Tok uya ayachi màlà temyatù kon ke atta wànà auya tàk pona tukaik,’ tawon nàlà màlà,” teppù Makui uya. {PSA 91.1,12} ₁₂Jesus uya yeikuppù, “Katù Maimu màlà, ‘Itepulu Katù kùttùlùi ittuntok yak’, tawon,” tukaik. {DEU 6.16} ₁₃Tamù'nawàlà Jesus ittu pàk tùwechi yenuka'nùssak tùuya yau, Makui uya inàmàppù malalà.

₁₄Màlàyau Jesus wennapoppù Galilee pona molopai Wakù Akkwalù meluntàlù wechippù ya'là màlà. Itekale usetappù màlà pata yamùk Galilee yawolon yawàlà. ₁₅Kappon yamùk yenupappù ya màlà tok wepilittok itak tau molopai tamù'nawolon kon uya yapulàppù màlà.

₁₆Màlàyau Jesus utàppù màlà Nazareth pona, temokkappù lùppù yau yak. Molopai Jew wàlàkkattok yattai iitàppù màlà wepili'nàtok itak tak tùwessek kasa. Iwe'wuluukappù màlà Katù Maimu yekamase kaleta yapai. ₁₇Molopai Katù Maimu yenpoikanài Isaiah itesek, kaletayi tùlùppù màlà itemyak. Kaleta yakkokappù ya molopai yepoloppù ya iwe'menukasak lùppù.

₂₀Kaleta yakkoloppù ya, innapoppù ya itùnàippù yemyak molopai iweleutappù. Tamù'nawolon kon kappon yamùk wepilittok itak tawon kon wechippù itenupàkà. ₂₁Tok yelupa pàk iwepyattàppù, “Sàlà Katù Maimu nekkupàssan ailon pe iwekkupù màlà teppù kasa sàlà pe yekama metapùsatàik nùk kasa,” tukaik. ₂₂Molopai tamù'nawolon kon uselupappù wakù pe màlà ipàk. Molopai tok usenumenkappù wakù mayin iichelupappù lùppù pàk. Tok uya, “Joseph mumu pen ken na' mùkkàlà?” teppù.

₂₃Tok pàk, “Tùttuyaik yekamasak lùppù yekama auya'nokon upàk, ‘Ipitànài, echipittàkà,’ tawon. Molopai, ‘Màlà yamùk ànkupùppù Capernaum po lùppù ina netappù nàlà ikukkà apatasek yau,’ te nàlà auya'nokon màlà upàk. ₂₄“Ailon kulu sàlà,” teppù Jesus uya. “Ànù'là Katù Maimu yenpoikanài mùkkàlà tanùnsen kulu pen ipatassek yau. ₂₅Kùyetatàk kon, ailon pe iwechi màlà. Tukkan kon itayappù iwelichak kon wechippù màlà Israel po Elijah yattai, konok pùla iwechi yau 3 1/2 pe kilichimochi molopai eke pe iwan wechippù màlà tamù'nawolon pata yawàlà. ₂₆Tùse Elijah yeunokoppù pen màlà tok piyak tùse itayappù iwelichak lùppù pata Zarephath pon piyak neken, pata Sidon yawon pon piyak. ₂₇Molopai tukkan kon welei pokon kon wechippù màlà Israel po Elijah yattai tùse tok wennapù wakù pe pen màlà, tùse Naaman, Syrian pon neken,” teppù Jesus uya tok pàk. ₂₈Tamù'nawolon kon kappon yamùk wepili'nàtok itak tawon kon we'naikassak wechippù màlà sàlà yetasak tùuya'nokon yau. ₂₉Molopai tok we'wuluukappù. Tok uya Jesus pàlàkappù pata yapai. Molopai tok uya yalàppù wùk nakatta pona, tùpatassek kon konekasak ipo tùuya'nokon pona, yenu'matoppe tùuya'nokon wùk poi. ₃₀Tùse tukkan kon ton kùlottawà itàppù.

₃₁Màlàyau Jesus utàppù Capernaum pona, pata Galilee pon pona, kappon yamùk yenupappù ya molo, Jew yamùk wàlàkkattok yattai. ₃₂Tamù'nawolon kon usenumenkappù màlà enupantok ya yeselu pàk, masapùla imaimu wechi apàikkek pe pàk. ₃₃Kàyik wechippù màlà molo wepili'nàtok itak tau àli akkwalù yen. Iwentaimeppù eke pe. ₃₄“Yà'là pe ina wechi iche messan, Jesus Nazareth pon? Ina mattanùsse na’ àuyàssak màlà? Eyittuyan Iulà, Àmàlà mùkkàlà wakù, Katù winàpaino!” tukaik. ₃₅Jesus uya meluntà pe akkwalù pàk, “Eppana ekkà, molopai epakkakà kàyik yapai!” teppù. Àli akkwalù uya kàyik yenu'mappù tok yemloto po, molopai iwepakkappù yapai tùmattanùsse pùla. ₃₆Tamù'nawolon kon usenumenkappù màlà. Molopai tok uya tùtonpa kon pàk, “Yà'là yekkwa ken sàlà usenupantok? Meluntà pe molopai apàikkek pe ku pùsàlà kàyik àli akkwalù wepakka toppe nekamai, molopai nepakkai!” teppù. ₃₇Molopai Jesus yekale utàppù màlà tamù'nawolon màlà pata yawàlà.

₃₈Jesus uya wepili'nàtok itak nàmàppù molopai iitàppù Simon yùwùk tak. Simon yewoppù wechippù e'nek pe iwàkkàmi'masak, molopai Jesus pàk tok uya yekamappù. ₃₉Iitàppù molopai satippe iwechippù itekkwek piyau molopai iwàkàmi'matok pàk, “Wa là àmolonkakkà,” teppù ya. Màlàyau iwàkkàmi'makapùppù molopai iwà'mùssakappù asse'ne kulu, tok yeipa konekappù ya.

₄₀Wei wewomù tùpo, kappon yamùk uya tamù'nawàlà e’nek ton tùpatalo'nan itepalan ton nepùppù Jesus piyak. Temyatù tùlùppù ya tewin pàk tok pona molopai tok ipittàppù ya. ₄₁Àli ton akkwalù nàlà wepakkappù tukkan kon kappon yamùk yapai, tùwentaimeipàtùi’ma' nokon, “Katù Mumu, Àmàlà!” tukaik. Jesus uya tok yàulàmappù molopai tok uselupa toppe ikupùppù ya pen, masapùla tok uya enupanài Christ pe tùwechi ittu pàk.

₄₂Ko'làma kulu Jesus uya màlà pata nàmàppù molopai iitàppù tùkkenan pata yak. Kappon yamùk uya iwappù, molopai yepossak tùuya'nokon yau tok wechippù yeleutanùpù iche iità tukaik. ₄₃Tùse tok pàk, “Wakù Itekale, Katù wettok Itepulu pe, yekale yekama uya nàlà màlà tùulon pata yamùk yau, masapùla màlà kusse màlà Katù uya uyeunossak,” teppù Jesus uya. ₄₄Màlàpàk Itekale yekamappù ya wepili'nàtok itak yamùk tau Judea po.