Matthew 19

₁Sàlà yamùk pàk tùuselupakapù tùpo, Jesus uya Galilee nàmàppù màlà, molopai iwennappoppù pata Judea yawon pona, tuna Jordan latoi pona. ₂Tukkan kon kappon yamùk uya iwenaimappù màlà molopai tok ipittàppù ya molo.

₃Pharisee yamùk tonpa yamùk uyàpùppù màlà Jesus piyak ittuse, tok uya yekamappoppù, “Enupantok yawàlà na' màlà kàyik uya tùnoppù nonka yà'làlà wenai wechi?” tukaik. ₄Jesus uya yeikuppù, “Katù Maimu yau ken na' yennàinan pen amyamlo, ‘Iwepyattà pe Konekanài uya kappon yamùk konekappù walawok molopai ulichan tawonnan tesak ya? ₅Molopai Katù uya wateppù, “Sàlà wenai uchi kàyik uya tùkàipùnù molopai tùsan tawonnan nàmà màlà, molopai tok wekki'ma màlà tùnoppù pokonpe molopai asa'lon kon wena màlà tewin.” ’ {Gen 2.24} ₆Màlàpàk, asa'là tok wechi pen nen uchi màlà, tùse tewin. Kappon uchi Katù niki'massan pantakatak,” teppù ya. ₇Pharisee yamùk uya Jesus yekamappoppù, “Yà'là pe ken uchi iwechi pàk Moses uya, ‘Ànoppù ànnonkapai ewechi yau, inonka auya kaletayi itùkà itemyak molopai yeunoko pa,’ teppù kàyik pàk?” tukaik. ₈Jesus uya yeikuppù, “Moses uya, ‘Tàwà tùnoppù kon nonkai tok,’ teppù màlà, masapùla sa'man pe eyewan kon wechi pàk. Tùse sàlà kasa iwechippù pen màlà tamù'nawolon koneka yattai. ₉Tekamayaik uchi àpàkù'nokon, ànù'là kàyik tùnoppù nonkanài, tùse ailon pe pùla neken iwessak yau, molopai tùulon nossan pokonpe iwemali'masak uya àli kupù màlà,” tukaik.

₁₀Ya'lon kon uya ipàk, “Sàlà kasa iwechi kàyik molopai inoppù tawon yakkletau yau, wakù peiwa nen tùwemali'mase pùla we'nà wechi màlà,” teppù. ₁₁Jesus uya yeikuppù, “Tamù'nawolon kon uya sàlà mayin yanùmù pen màlà, tùse mùkyamlo neken màlà ke ilepasak kon. ₁₂Tùulon kon mùkyamlo tùwemali'masan pen. Masapùla màlà kasa tùwentusak kon pàk, tùulon kon molonkonnà tùwemali'masan pen kappon yamùk uya tùkussak kon màlà kasa pàk, molopai tùulon kon tùwemali'masan pen itepulu pe we'nàtok epùn po pàkànsau. Ànù'là sàlà yanùnnài uya yanùmù màlà,” teppù Jesus uya.

₁₃Tùulon kon kappon yamùk uya mule yamùk nepùppù màlà Jesus piyak temyatù tùtoppe ya tok pona molopai iwàpùlematoppe, tùse ya'lon kon uya kappon yamùk yàulàmappù. ₁₄Tùse Jesus uya, “Tàwà mule yamùk nùyàpùi upyak, tok kùseleutanùttàu, masapùla itepulu pe we'nàtok epùn po wechi màlà pùsamlo yekkwa ponaloppe,” teppù. ₁₅Temyatù tùlùppù ya màlà mule yamùk pona, molopai nen uchi iitàppù.

₁₆Màlà yattai kàyik uyàpùppù màlà Jesus piyak. “Enupanài, yà'là yekkwa ken wakù kupù uya, wema'nàtok yepotoppe uya?” tukaik yekamappoppù ya. ₁₇“Yà'là peichi iwechi pàk uyekamappo auya màlà wakù pe nai'nùk pàk? Tewinan neken nen molo man, wakù. Enupantok ikukkà tàwàlàlà wema'nàtok yak àutà pa,” tukaik Jesus uya yeikuppù. ₁₈“Yà'là yekkwaichi enupantok?” tukaik Jesus yekamappoppù ya. Màlàyau yeikuppù ya, “Ànù'là kù'wànài, ànoppù pen pokonpe kechii, amak pe kechii, kasei pe kechii. ₁₉Àkàipùnù molopai asan tawonnan inamakà. Molopai ayakontalù i'nùnmakà eyiwalà euchi'nùnma kasa tawon,” tukaik. ₂₀“Tamù'nawolon sàlà yamùk enupantok maimu yawàlà wessak man. Yà'là tu'ma ken uchi kupù uya?” tukaik umoine uya yeikuppù. ₂₁Jesus uya ipàk, “Wakù pe, ikasa kulu eppai ewechi yau, itàkà molopai tamù'nawolon itesappe ewettok ichilanmata, molopai entuppa'nokon mùlepaik molopai nen uchi mamin yamùk yesappe ewechi màlà epùn po. Molopai uya'là àikkà,” teppù. ₂₂Sàlà yetasak tùuya yau, umoine utàppù màlà tùusewankono'maik, masapùla tukke kulu mamin yesappe tùwechi pàk.

₂₃Jesus uya nen uchi ta'lon kon pàk, “Ailon kulu sàlà, sa'man pe kulu tukkan itemamin wewomù itepulu pe we'nàtok epùn po, yak wechi màlà. ₂₄Tekamatukkayaik àpàkù'nokon, sa'man pe pùla lùiwa camel wepakka akkussa yenu yeuta yai wechi màlà. Mamin yesak wewomù itepulu pe we'nàtok epùn po yak yentai,” teppù nàlà màlà. ₂₅Yetasak tùuya'nokon yau ya'lon kon usenumenkasak kulu wechippù màlà. “Ànùk wepùikattà ken uchi?” tukaik tok uya yekamappoppù. ₂₆Jesus uya tok yeneppù, molopai tok yeikuppù ya, “Sàlà màlà iwekkupù yentaino kappon yamùk pona, tùse tamù'nawolon màlà Katù nùkupù,” tukaik.

₂₇Màlàyau Peter uya, “Masa yenkà ina uya tamù'nawolon nànsak man molopai aya'là ina man. Yà'là yepolo ken uchi ina uya?” teppù. ₂₈Jesus uya tok pàk, “Ailon kulu sàlà, Kàyik Mumu wechi chichiu pe wakù tapon po emennak pata weyu yattai yau, amyamlo 12 pan kon unenupassan wechi nàlà màlà chichiu pe aponnok yamùk po, 12 pan kon Israel mumu yamùk munkà yamùk ittutoppe auya'nokon. ₂₉Molopai tamù'nawolon kon tùwùk kon nànnàinannùssan, wapùla tùlunan yamùk tùpachi ton, wapùla tùkàipùnù kon, tùsan kon, tùmunkà kon yamùk wapùla tù'mà kon nànnàinannùssan upàkànsau uya, 100 pe itekkwa yepolo màlà molopai tàwàlàlà wema'nàtok yepolo ya. ₃₀Tùse tukkan kon wapiya nai'nannùk wechi màlà àkàmlàk, molopai tukkan kon àkàmlàk nai'nannùk sàlà pe wechi màlà wapiya,” teppù ya.