Matthew 20

₁“Itepulu pe we'nàtok epùn po wechi màlà umà yesak kasa. Ko'làma tùutàsen mùkkàlà kappon yamùk tù'mà yau tùwe'wotokoma woton kon yepose. ₂Tùwe'wotokomasan ye'matok tùuya konekappù ya màlà tok pokonpe, tewin chilùpa pun iwessek kasa là. Molopai tok yeunokoppù ya e'wotokomase tù'mà yak. ₃Iitàppù tu'ma màlà makitti pàk tok wessek yak, wei wenussak tùse molo kàyik yamùk wechi satippe yà'là pàk pùla yeneppù ya. ₄Màlàpàk tok pàk, ‘Amyamlo nàlà itàtàk kon e'wotokomase u'mà yak, molopai eye'ma kon uya màlà ikasa,’ teppù ya. ₅Màlàpàk tok utàppù. Molopai nàlà inakattapailà wei wechi tùse, molopai wei wetteilettàsak pe tu'ma màlà lùppù kupùppù ya. ₆Wei wewomù winàkàik lùiwa nen uchi tùutàsak makiti motak yau, tùulon kon tu'ma kàyik yamùk wechi molo lùppù satippe yà'là pàk pùla yeneppù ya. ‘Yà'là peichi iwechi pàk pata ko'manka auya'nokon màlà yà'làlà tùkusse pùla?’ tukaik tok yekamappoppù ya. ₇‘Ànù'là uya ina yekamapposak ina we'wotokomatoppe pùla iwechi pàk,’ tukaik tok uya yeikuppù. ‘Itàtàk kon nàlà e'wotokomase u'mà yak,’ teppù ya tok pàk.

₈“Pata uko'mansak yau, umà yesak uya tùwe'wotokomasan yennài pàk, ‘Tùwe'wotokomasan ikà'makà molopai tok ye'makà, àkàmlà'nokon nùssan winàpai tùpyattàse molopai wapiyalok kon nùssan motak iwenukattoppe,’ teppù. ₉Kàyik yamùk wei wewomù winàkàik tùwe'wotokoma kon pàk iwessa'molùkasak kon ye'mappù màlà tewin chilùpa pun ke. ₁₀Màlàyau kàyik yamùk wapiya yekamapposak kon, tok we'wotokomatoppe uyàssak te'ma tok kon pe yau, eke peiwa pùlayatta yepolo tùuya'nokon pe tok uya yekamappù, tùse mùkyamlo uya nàlà tewin chilùpa pun yepoloppù. ₁₁Tùpùlayattayi kon yekkwatùppù tok uya molopai umà yesak winàkàik tùusàulàma kon pàk tok wessa'molùkappù. ₁₂‘Pùsamlo àkàmlàk yekamapposak kon ne'wotokomai tachin pe pùla, ina we'wotokoma kassak sa'man pe tùse a'nek wei yau. Tùse tok ye'masak auya man ina yepeppù kaichalà!’ teppù tok uya. ₁₃‘Utonpa, ayama'masak kon uya pùla man. Eusenumenkatok kon ku mùkonekatàu tà tewin wei wotoko kupù pàk tewin chilùpa pun yepeppe,’ tukaik tok yeikuppù ya. ₁₄‘Eye'matok kon uchi yanùntàk kon molopai emeittàk kon. Pùsàlà kappon àkàmlàk iwe'wotokomatoppe yekamapposak lùppù enlepapai wessaik elepasak kon uya nai'nùk kaichalà. ₁₅Iche wettok kupù uya ken na' uchi upùlayattayi ke wechi màlà ikasa pùla? Wapùla ka' àkùlùmàlu kon màlà lù masapùla tùwe'lepasen pe wechi pàk?’ teppù ya.” ₁₆“Màlàpàk mùkyamlo àkàmlà'nokon wechi màlà wapiya, molopai mùkyamlo wapiyalok kon wechi màlà àkàmlàk,” teppù Jesus uya.

₁₇Jerusalem pona tùutà pe Jesus uya 12 pan kon ta'lon kon yalàppù màlà miya molopai tok yelupappù ya amak yai, tùutài'ma'nokon. ₁₈“Masa yetatàk kon, utàn'nokon sàlà Jerusalem pona, màlà motau Kàyik Mumu tùlù màlà eke ton paatele yamùk yepulu yemyak, molopai enupannan Law pàk yemyak. Molo màlà, iwànà màlà, te ipàk. ₁₉Molopai nen uchi itùlù màlà tùulon kon kappon yamùk Jew yamùk pen yemyak, tok wàkklà màlà ipàk italumattà pe. Tok uya ippoppàtù màlà, molopai tok uya ipukapàtù màlà pulusuk pona. Molopai nen uchi icholùwano wei yattai iwuluuka màlà wema'nàtok yak,” tukaik.

₂₀Màlàyau Zebedee munkà yan uyàpùppù màlà Jesus piyak walawotichi tùmunkà yamùk pokonpe, iwepeimappù itemlotopo molopai iche tùwettok yennappù ya ipàk. ₂₁“Yà'là iche messan?” tukaik, Jesus uya yekamappoppù. “Asa'lon kon umunkà walawotichi yamùk weleutatoppe apyak ikukkà, tewin kamik pen eyemyatù winà, molopai tùulon akamikù winà Kin pe ewechi yau,” tukaik yeikuppù ya. ₂₂Jesus uya tok yeikuppù, “Enenna kon ittu auya'nokon pùla man. Pùsau yawon, inchi uya winàkàik nai'nùk inchi ken na' uchi auya'nokon?” tukaik Jesus uya tok yekamappoppù. “Ina uya nen inchi,” tukaik tok uya yeikuppù. ₂₃“Ussawù yawon inchi là nen auya'nokon, tùse ikasa pùla iwechi màlà ànù'là yanùmù uya iweleutatoppe ukamikù pen winà, molopai ukamikù winà tukaik yau. Sàlà màlà patassek yamùk Ukàipùnù nùkonekappù iponalok kon ponaloppe,” teppù Jesus uya tok pàk.

₂₄Tùulon kon 10 pan kon Jesus nenupaton uya sàlà yetasak yau, tok we'naikappù asa'lon kon echilunan pàk. ₂₅Màlàpàk Jesus uya tamù'nawàlà tok kà'mappù màlà tamùkke tùpyak molopai, “Mùttuyatàik Jew yamùk pen yepulu yamùk wechi tùmeluntàlù ke, tok yepoi, molopai tok yennàinan pe tok yepulu yamùk wechi. ₂₆Sàlà kasa ewechi kon pen màlà. Tùse làkku ànù'là àkklottawon'nokon eke pe enappai tùwesssen wechi màlà àpoitolù kon pe. ₂₇Molopai ànù'là wechi wapiya eppai yau, tàwà ayapyoto kon pe nechii. ₂₈Kàyik Mumu uyàpùppù tapyoto ke esse pen màlà, tùse apyoto pe esse, molopai tùwemattok tùse tukkan kon kappon yamùk ye'matoppe tùuya,” teppù Jesus uya.

₂₉Jericho nàmà tok uya pe tukkan kon kulu kappon yamùk uya Jesus wenaimappù. ₃₀Asa'lon kon enpùnon kàyik yamùk, chichiu pe tùwessan asanta yenapo uya Jesus uya pata yentaka yetappù màlà, màlàpàk tok wessamolùkappù tùwentaime kon pàk, “David Mumu! Ina pàk tàwà esentuppakà, ina yepulu!” tukaik. ₃₁Tukkan kon kappon yamùk uya tok yàulàmappù, “Eppana ettàk kon!” teppù tok uya. Tùse eke peiwa tok wentaimeppù, “David Mumu! Ina pàk tàwà esentuppakà, ina yepulu!” tukaik. ₃₂Jesus weleutappù molopai tok kà'mappù ya. “Yà'là kupù uya iche messatàu àponalok kon pe?” tukaik tok yekamappoppù ya. ₃₃“Ina yepulu, ina yenu yakkoka auya iche ina man!” teppù tok uya. ₃₄Jesus usentuppappù tok pàk molopai tok yenu yappàtùppù ya. Màlà yattai là tok uya pata yeneppù, molopai tok utàppù Jesus ya'là.