1 Petrus 4

₁Fu di Kristus nyan pina leki libisma, dan unu srefi mus de klar'klari tu gi dati. Bika a sma di teki pina leki libisma, tapu nanga sondu. ₂Dan so a no o libi moro fa en ati firi, ma ini a ten san a abi fu libi ete, a o libi leki fa Gado wani. ₃Bika un libi nofo leki fa den sma di no sabi Gado e libi. Un ben e libi wan yayolibi, èn un ben e du san un ati ben e firi fu du. Un ben e dringi drungu, un ben e gi fesa nomo, èn un ben e du ala sortu takru afkodrei. ₄Den sma di no sabi Gado no man ferstan taki un no wani libi a srefi doti libi disi moro nanga den. Dat' meki den e taki takru fu unu. ₅Ma den o abi fu gi frantwortu na a Wan di tnapu klar'klari fu krutu den libiwan nanga den dedewan. ₆Bika na fu dat'ede den dedewan yere a bun nyunsu tu. Leki libisma den ben mus kisi strafu na libisma fasi, ma gi Gado den e libi na yeyefasi.

₇A kba fu ala sani de krosbei. Dat' meki un mus kisi unsrefi. Un mus de na un krin ferstan fu un kan begi. ₈A moro prenspari sani na taki un lobi makandra tranga, bika lobi e tapu furu sondu. ₉Un mus opo un oso gi makandra, sondro fu knoru. ₁₀Ibri sma mus dini den trawan nanga a presenti di Gado gi en, leki sma di e wroko bun nanga den difrenti sortu presenti di Gado gi wi. ₁₁Efu wan sma e tyari wan wortu, meki a de so taki a wortu e kon fu Gado srefi. Efu wan sma e dini trawan, meki a de so taki a e dini nanga a krakti san Gado gi en. Disi o meki tak' fu Yesus Kristus ede, Gado o kisi grani fu ala sani. Na En mus kisi ala grani nanga ala krakti fu têgo èn ala ten! Amen.

₁₂Lobiwan, un no mus ferwondru fu a bigi tesi di e miti unu, neleki na wan spesrutu sani psa nanga unu. ₁₃Ma o moro un e teki prati ini a pina fu Kristus, o moro un mus breiti. Dan un sa breiti srefsrefi tapu a dei di A o sori En glori. ₁₄Unu na blesi sma efu un e nyan pina fu a nen fu Kristus ede. Bika a Yeye fu Gado, di de a Yeye fu glori, de na un tapu. ₁₅Sorgu taki no wan fu unu abi fu nyan pina leki wan kiriman, leki wan fufuruman, leki wan abani, noso fu di a e bemui na ini tra sma tori. ₁₆Ma efu wan fu unu e nyan pina fu di a de wan Kristensma, dan a no abi fu firi syen. Ma meki a gi Gado grani fu di a e tyari a nen disi.

₁₇Bika a ten fu krutu doro kba, èn a o bigin na ini a oso fu Gado. So efu a e bigin na wi fosi, dan fa a sa waka nanga den sma di no wani bribi a bun nyunsu fu Gado? ₁₈Efu nanga muiti Gado e ferlusu den sma di bun ini En ai, san o psa dan nanga den sma di no e dini Gado èn nanga den wan di e sondu? ₁₉Dat' meki den sma di mus nyan pina fu di Gado wani dati, mus tan du san bun èn den mus poti den libi ini anu fu Gado. Na En meki den èn A de fu fertrow.