1 Samuel 16

₁Dan MASRA taigi Samuel taki: “No sari moro langa fu Saul ede, bika na Mi poti en na wan sei leki kownu fu Israel. Furu a tutu fu yu nanga oleif-oli, dan yu e go gi Mi na Betlehem, na wan man di nen Isai. Bika na wan fu den boi fu en Mi teki fu poti leki kownu.” ₂Ma Samuel aksi taki: “Fa mi o man go du a sani dati drape? Efu Saul yere, a o kiri mi.” Ma MASRA piki en taki: “Tyari wan yongu kaw te yu e go, èn taigi den sma tak' na srakti yu kon srakti en leki wan ofrandi gi MASRA. ₃Yu mus kari Isai te yu o tyari a ofrandi. Dan Mi o meki yu sabi san yu mus du. Na a sma di Mi o sori yu, yu mus salfu gi Mi.” ₄Samuel du san MASRA taigi èn a go na Betlehem. Di a doro drape, den edeman fu a foto waka kon miti en nanga beifi ati. Den aksi en taki: “Na bun nyunsu yu tyari kon?” ₅Samuel piki den taki: “Iya, mi kon fu srakti wan meti leki ofrandi gi MASRA. Un krin unsrefi dan un kan nyan fu a ofrandi nanga mi.” Samuel kari Isai nanga den boi fu en tu èn ensrefi krin den fu den ben kan teki prati. ₆Di den e kon na inisei, en ai fadon tapu Eliab. Dan Samuel prakseri taki: “Na en mus de a wan di MASRA wani tak' mi mus salfu.” ₇Ma MASRA taigi en taki: “No luku fa a moi noso fa a bigi, bika a no en Mi wani. A no prenspari fa libisma e si sani, bika libisma e luku san den ai e si, ma MASRA e luku a ati.” ₈Dan Isai kari Abinadab, èn a meki a go na Samuel. Ma Samuel taki: “MASRA no wani a disi tu.” ₉Baka dati Isai meki Sama go na Samuel. Ma Samuel taki: “A disi srefi MASRA no wani.” ₁₀Na so Isai ben meki den seibi boi fu en go na Samuel. Ma Samuel taigi Isai taki: “MASRA no teki no wan fu den disi.” ₁₁Dan Samuel aksi Isai taki: “Na disi na ala den boi fu yu.” Isai piki en taki: “A moro yongu wan mankeri. A de ini a wei e luku den skapu.” Dan Samuel taigi Isai taki: “Un seni kari en, bika un no o nyan solanga a no kon.” ₁₂So Isai seni kari en. A boi ben luku gesontu, a ben abi moi ai, èn a ben moi fu si. Ne MASRA taigi Samuel taki: “Na en na a wan, salfu en.” ₁₃So Samuel teki a tutu nanga oleif-oli, dan a salfu David leti pe den brada fu en tnapu. Bigin fu a dei dati a yeye fu MASRA kon tapu David, èn a no gwe libi en moro. Baka dati Samuel drai go baka na Rama.

₁₄Ma a yeye fu MASRA ben gwe libi Saul, èn MASRA ben seni wan takruyeye di ben e pina en. ₁₅Ne den knekti fu Saul taigi en taki: “Na wan takruyeye di Gado seni, e pina yu. ₁₆Taigi wi leki knekti di e wroko gi yu, fu un go suku wan sma di man prei bun tapu wan citer. Dan te a takruyeye, di Gado seni, kon na yu tapu, a sma mus prei, dan yu o firi betre.” ₁₇Ne Saul taigi den knekti fu en taki: “A bun, un luku fu wan sma di kan prei bun, dan un tyari en kon gi mi.” ₁₈Dan wan fu den knekti taki: “Mi sabi wan sma di kan prei bun. Na wan manpikin fu Isai, wan man fu Betlehem. Na wan moi boi di abi dek'ati, a de wan bun fetiman èn a sabi taki bun. MASRA de nanga en.” ₁₉Dan Saul seni boskopuman go na Isai nanga a boskopu disi: “Seni yu manpikin David gi mi, di e luku den skapu fu yu.” ₂₀Dan Isai gi David wan buriki, brede, wan saka nanga win nanga wan yongu bokoboko fu tyari go gi Saul. ₂₁Na so David doro Saul èn bigin wroko gi en. Saul ben lobi David trutru, èn a poti David fu syow den fetisani fu en. ₂₂Dan Saul seni aksi Isai tu taki: “Meki David tan wroko gi mi, bika mi lobi fa a de.” ₂₃Ala leisi te a takruyeye di Gado ben seni, ben kon tapu Saul, David ben e teki a citer èn a ben e prei. Dati ben e du Saul bun, a ben e firi betre baka èn a takruyeye ben e gwe libi en.