1 Samuel 4

Den Israelitisma ben hari go feti nanga den Filistijnsma. Den meki den kampu na Eben-Haeser. Den Filistijnsma ben meki di fu den na a foto Afek. ₂Di a legre fu den Filistijnsma seti densrefi abra di fu Israel, a feti broko. Israel lasi a feti èn den Filistijnsma kiri sowan fo dusun man fu Israel ini a feti. ₃Di den srudati drai go baka na a legrekampu, den edeman fu Israel taki: “Fu sanede MASRA meki den Filistijnsma wini wi tide? Meki wi go teki a santa kisi fu a ferbontu fu MASRA na Silo. Te a de na wi mindri a o ferlusu wi fu a makti fu wi feyanti.” ₄Dan a legre seni boskopu go na Silo, fu seni teki a santa kisi fu a ferbontu fu MASRA fu ala sani, di e sidon na tapu den kerub. Hofni nanga Pinekas, den tu boi fu Eli, ben kon tu nanga a santa kisi fu a ferbontu fu Gado. ₅Fa a santa kisi fu a ferbontu fu MASRA doro ini a legrekampu, na so ala den Israelitisma meki sowan babari fu prisiri, tak' a gron seki. ₆Di den Filistijnsma yere a tranga babari fu den Israelitisma, den taki: “San wani taki a bigi babari drape ini a legrekampu fu den Hebrewsma?” Di den yere tak' na a santa kisi fu MASRA ben doro ini a legrekampu, ₇den kon frede, èn den taki: “A Gado fu den doro ini a legrekampu. A kba gi wi, bika noiti ete sowan sani psa. ₈A kba gi wi! Suma sa man ferlusu wi fu a makti fu a bigi gado disi? Na a srefi gado di ben strafu den sma fu Egipte tapu difrenti fasi ini a bigi dreisabana. ₉Ma man fu Filistea, teki dek'ati èn sori taki wi na man, noso wi o tron srafu fu den Hebrewsma, leki fa den ben de srafu fu wi. We dan, meki wi sori taki wi na man èn feti!” ₁₀Dan den Filistijnsrudati bigin feti baka nanga den èn Israel lasi a feti. Ala den srudati lon go baka na den oso èn den Filistijnsrudati kiri dritenti dusun srudati fu Israel di ben de nanga futu. ₁₁Boiti dati, den Filistijnsrudati teki a santa kisi fu Gado, èn den tu boi fu Eli, Hofni nanga Pinekas, lasi den libi tu.

₁₂Ma wan man fu a lo fu Benyamin lon kmopo fu pe a feti ben e feti, go na Silo. A srefi dei a doro drape. Fu sori tak' a ben e sari trutru, a ben priti en krosi èn a ben fringi santi tapu en ede. ₁₃Di a man doro drape, Eli ben sidon tapu wan sturu sei a pasi. A ben sidon e wakti fu yere fa a feti waka, fu di a ben e broko en ede srefsrefi fu a santa kisi fu Gado. Di a man panya a nyunsu ini a foto, ala den sma bari krei. ₁₄Eli di yere fa den sma ben e krei, aksi taki: “San na a babari di mi e yere?” Dan a man go es'esi na Eli go ferteri en san psa. ₁₅A pisten dati Eli ben abi neigitenti-na-aiti yari. Den ai fu en ben kon dungru srefsrefi, taki a ben e si not'noti moro. ₁₆A man taigi Eli taki: “Mi kmopo fu pe a feti e feti. Tide srefi mi lowe kmopo drape.” Ne Eli aksi en taki: “Mi boi, san psa drape?” ₁₇A boskopuman piki en taki: “Israel lon gi den Filistijnsrudati. Den kiri bun furu fu den srudati fu Israel. Den tu boi fu yu, Hofni nanga Pinekas, lasi libi tu èn den Filistijnsrudati teki a santa kisi fu Gado.” ₁₈Di a man taki fu a santa kisi fu Gado, Eli fadon go nanga baka fu a sturu fu en di ben de sei a bigi doro fu a foto. A broko en neki èn a dede, bika a ben owru èn a ben fatu. Fotenti yari langa Eli ben de krutubakra fu Israel.

₁₉A uma fu Pinekas, wan fu den boi fu Eli, ben de nanga bere. Iniwan momenti a ben kan kisi a pikin. Di a yere tak' den Filistijnsma teki a santa kisi fu Gado, èn tak' en masra nanga a papa fu en masra dede, den pen fu kisi a pikin kon wantron. Ne a uma saka sidon tapu en futu dan a meki a pikin. ₂₀Di a ben didon e dede gwe, den umasma di ben kon tnapu lontu en taigi en taki: “Yu no abi fu frede, yu kisi wan boi.” Ma a uma no piki, a no luku den srefsrefi na wan ai. ₂₁Dan a kari a boi Ikabod èn a tak' moro fara taki: “Israel lasi en grani.” A ben taki so fu di den Filistijnsma ben teki a santa kisi fu Gado, èn fu di en masra nanga a papa fu en masra ben dede. ₂₂A taki: “Israel lasi en grani, bika den Filistijnsma teki a santa kisi fu Gado.”