1 Samuel 8

₁Di Samuel ben kon owru, a poti den boi fu en leki krutubakra fu Israel. ₂A fosi wan ben nen Yowel èn a trawan ben nen Abia. Den ben tan na Berseba èn fu drape den ben e tiri a kondre. ₃Ma den no ben e tyari densrefi leki den p'pa. Den ben gridi fu moni, den ben e teki tyuku èn den no ben e koti krutu nanga leti. ₄Na dat' meki ala den edeman fu Israel kon makandra. Dan den go na Samuel na Rama. ₅Drape den taigi en taki: “Luku, yu kon owru, èn den boi fu yu no e tyari densrefi leki fa yu ben tyari yusrefi. Dat' meki wi wani wan kownu fu tiri wi, leki den tra folku.” ₆Ma a no ben bun ini Samuel ai di den aksi en fu a gi den wan kownu fu tiri den. Dat' meki a begi MASRA. ₇Dan MASRA piki Samuel taki: “Arki san a pipel e taki, èn du ala san den wani. Bika a no yu den poti na wan sei, ma na Mi den no wani moro leki den kownu. ₈Na so den e du kba, sensi a dei di mi puru den na Egipte, te kon miti tide, den e drai den baka gi Mi fu dini tra gado. Now den e du en nanga yu. ₉Du san den e aksi. Ma yu mus warskow den trangatranga èn sori den tapu den leti di a kownu abi di o tiri den.”

₁₀Dan Samuel taigi a pipel, di ben aksi fu wan kownu, ala san Masra taki. ₁₁A taigi den moro fara taki: “Na den sani disi a kownu di o tiri unu o du nanga unu: a o teki den manpikin fu unu puru na un anu èn poti den fu wroko gi en na den fetiwagi nanga den asi fu en, èn fu waka fesi a wagi fu en. ₁₂A o poti den leki ofisiri abra wan dusun noso abra feifitenti srudati. Den o abi fu wroko den pranigron fu en èn koti nyanyan ini en pranigron. Den o abi fu meki fetisani nanga sani di fetiwagi abi fanowdu. ₁₃A o teki den umapikin fu unu puru na un anu tu fu meki oli nanga switismeri gi en, fu bori en nyanyan èn fu baka en brede gi en. ₁₄A o puru den moro bun pranigron, droifidyari nanga oleifdyari na un anu tu fu gi den spesrutu wrokoman fu en. ₁₅Te den karu nanga den droifidyari fu unu gi nyanyan, a o puru tin prosenti na un anu gi den spesrutu wrokoman nanga den tra wrokoman fu en. ₁₆A o puru den srafu fu unu na un anu tu, manwan nanga umawan. Sosrefi den moro tranga yonkuman fu unu nanga den buriki fu unu. A o teki den fu den wroko gi en. ₁₇A o teki tin prosenti fu den skapu nanga fu den krabita fu unu. Iya, unsrefi o tron en srafu. ₁₈Dan un o bari kari MASRA a ten dati, tak' un no wani a kownu moro di unsrefi ben teki, ma MASRA no o piki unu.”

₁₉Ma a pipel no ben wani arki Samuel. Den taki: “Nono, wi wani wan kownu fu tiri wi, ₂₀dan wi sa de leki den tra folku. A kownu sa tiri wi, a sa go na wi fesi èn feti den feti gi wi.” ₂₁Di Samuel arki ala san den sma taki, a go taigi MASRA. ₂₂Ne MASRA piki en taki: “Du san den taki èn gi den wan kownu.” Dan Samuel taigi ala den Israelitisma fu den drai go baka na den foto.