1 Samuel 9

₁Wan man ben e libi ini a kontren fu a lo fu Benyamin di ben nen Kis. A ben de a manpikin fu Abiyel, Abiyel ben de a manpikin fu Seror, Seror ben de a manpikin fu Bekorat èn Bekorat ben de a manpikin fu Afiak. Kis ben de fu a lo fu Benyamin èn a ben de wan gudu man. ₂A ben abi wan boi di ben nen Saul. Saul ben de wan yongu boi di ben moi srefsrefi. No wan sma ini Israel ben moi leki en, èn a ben langa moro den alamala tu. ₃Wan leisi den uma buriki fu Kis, a p'pa fu Saul, ben kon lasi. Ne Kis taigi en boi Saul taki: “Teki wan fu den knekti dan un go suku den buriki.” ₄Saul suku ini a heri bergikontren fu Efraim. Baka dati a suku ini a heri kontren fu Salisa, ma den no feni den. Den suku tu ini a heri kontren fu Saalim, ma den no ben drape. Baka dati den suku ini a heri kontren fu Benyamin, ma drape srefi den no ben de. ₅Di den ben doro ini a kontren fu Suf, Saul taigi a knekti fu en taki: “Meki wi drai gwe baka, bika mi p'pa o broko en ede moro abra wi dan abra den buriki.” ₆Ma a knekti piki en taki: “Wakti, wan profeiti de ini a foto disi. Sma e lespeki en, èn ala san a e taki e kon tru. Meki wi go wantron drape, kande a kan taigi wi sortu sei wi mus suku den buriki.” ₇Ma Saul piki en taki: “Ma efu wi go na a man san wi o tyari gi en? No wan nyanyan sani no de ini den saka fu wi moro, èn wi no abi noti san wi kan gi a profeiti. Noti wi no abi moro.” ₈Ma a knekti piki Saul taki: “Wakti, mi abi wan pikin solfru moni ete. Efu wi gi a profeiti, a o taigi wi sortu sei wi mus go suku den buriki.” ₉Te den Israelitisma fu fosi ben wani go aksi Gado rai, den ben e taki: “Meki wi go na a man di Gado e sori sani.” Na so den sma fu fosi ben e kari wan profeiti. ₁₀Ne Saul taigi en knekti taki: “Na wan bun sani yu taki. Kon meki wi go.” Dan den go na a foto pe a man fu Gado ben e libi.

₁₁Di den ben e kren a pikin bergi fu go ini a foto, den miti nanga wantu umapikin di ben e go peti watra. Den aksi den taki: “A man di Gado e sori sani de dyaso?” ₁₂Den pikin piki den taki: “Iya, efu un go es'esi un kan miti en ete. Bika a kon ini a foto tide fu di a pipel abi wan fesa pe den o tyari ofrandi, na a presi pe den sma e tyari ofrandi. ₁₃Efu un go now ini a foto, un o si en fosi a go na a presi pe den e tyari ofrandi fu nyan makandra nanga den sma. Bika den sma no o nyan fosi a doro, fu di na en e blesi a ofrandi. Baka dati den sma di kisi wan kari e nyan. We dan, un go es'esi, bika un o miti en wantron.” ₁₄So Saul nanga en knekti waka go doro na a foto. A srefi momenti di den e go ini a foto Samuel ben e kon na dorosei, fu go na a presi pe den sma e tyari ofrandi. ₁₅Ma MASRA ben taki nanga Samuel wan dei fosi Saul ben doro drape. A ben taigi Samuel taki: ₁₆“Tamara, a yuru disi, Mi o seni wan man fu a lo fu Benyamin kon na yu. Na en yu mus salfu leki a wan di Mi kari fu tiri Mi pipel Israel. Na en sa ferlusu Mi pipel tu ini a makti fu den Filistijnsma. Bika Mi yere a kari di Mi pipel e kari fu Mi yepi den.” ₁₇Di Samuel si Saul, MASRA taigi en taki: “Luku, na a man disi Mi ben taki. Na en sa tiri Mi pipel.” ₁₈Saul waka go na Samuel di ben de na a bigi doro fu a foto, dan a aksi en taki: “Yu kan taigi mi pe a man e libi di Gado e sori sani.” ₁₉Samuel piki Saul taki: “Na mi na a man di Gado e sori sani. Go na mi fesi na a presi pe den sma e tyari ofrandi. Tide yu o tan nyan nanga mi. Tamara mamanten frukufruku mi sa meki yu gwe. Dan mi sa taigi un san e dangra unu. ₂₀Nanga den buriki di lasi dri dei kba, yu no abi fu broko yu ede, bika sma feni den. Ma suma heri Israel e angri fu feni? Na yu nanga a heri famiri fu yu.” ₂₁Ma Saul piki Samuel taki: “Mi na wan sma fu a lo fu Benyamin, wan fu den moro pikin lo fu Israel. A famiri fu mi na a moro pikin wan fu a lo dati. Dan fu sanede yu e taigi mi den sani disi?” ₂₂Samuel tyari Saul nanga a knekti fu en go ini a kamra pe den ben o nyan. Drape a poti den sidon na edesei fu a tafra. Sowan dritenti man ben sidon drape tu di ben kisi wan kari. ₂₃Dan Samuel taigi a man di ben o meki a nyanyan klari taki: “Tyari a pisi meti kon di mi ben gi yu fu hori gi mi.” ₂₄Ne a man tyari a bowtu kon, dan a poti en gi Saul. Dan Samuel taigi Saul taki: “Yu kisi wan spesrutu pisi. Yu kan nyan en. Bika mi ben kibri en gi yu fu yu nyan en na a okasi disi nanga den sma di mi kari.” Na so Saul nyan a dei dati nanga Samuel. ₂₅Baka dati den kmoto na a presi pe sma e tyari ofrandi, dan den go ini a foto. Dan Samuel taki nanga Saul tapu a plata daki fu en oso.

₂₆A tra mamanten Saul nanga en knekti wiki frukufruku. Di dei e krin Samuel bari kari Saul, di ben de tapu a daki, taki: “Kon, mi o tyari yu afu pasi.” Saul saka go na gron, èn den ala tu, en nanga Samuel, go na strati. ₂₇Di den doro na a kba fu a foto Samuel taigi Saul taki: “Taigi yu knekti meki a waka doro. Ma yu mus tan tnapu, bika mi o taigi yu san Gado taki.”