1 Timoteus 5

₁Yu no mus taki grofu nanga wan owru man. Efu yu mus pir'ai gi en, du en leki en na yu eigi p'pa. Taki nanga den yongu man leki den na brada fu yu, ₂nanga den moro owru uma leki den na yu eigi m'ma, èn nanga den yongu uma leki den na yu eigi s'sa, sondro fu abi tra prakseri.

₃A gemeente mus sorgu gi den uma di masra dede kba, efu den no abi no wan tra sma fu sorgu gi den. ₄Ma efu wan uma di masra dede kba abi pikin noso granpikin, dan den dati mus leri na a fosi presi fu du san Gado wani ini den eigi famiri. Den mus sorgu gi den bigisma fu den, fu san den bigisma ben du gi den na fesi, bika Gado lobi a sani disi. ₅Wan uma di masra dede kba èn di trutru no abi no wan sma fu sorgu en, e luku na Gado fu sorgu en. Dei nanga neti a e tan begi fu Gado yepi en. ₆Ma efu a e libi fu meki soso prisiri, dan a dede kba aladi a e libi ete. ₇Yu mus komanderi den sma den sani disi, fu den uma di masra dede kba, no kisi pori nen. ₈Ma efu wan sma no e sorgu gi en famiri, spesrutu gi en ososma, a no e hori ensrefi na a bribi èn a ogri moro wan sma di no drai libi.

₉Wan uma di masra dede kba mus abi siksitenti yari fosi yu skrifi en nen leki wan sma di mus kisi yepi. A mus de so tu taki a no ben e waka gi en masra. ₁₀Sma mus sabi en leki wan uma di ben e du bun. Sobun den mus man taki tak' a ben kweki den pikin fu en bun èn tak' en doro ben opo gi ala sma. Moro fara taki a ben dini den sma fu Gado nanga sakafasi èn taki a ben yepi sma di ben de na nowtu. Sobun a ben de klar'klari fu du ala sortu bun wroko. ₁₁Ma yu no mus skrifi den nen fu den yongu uma di masra dede kba leki sma di mus kisi yepi. Bika baka wan pisten den o wani trow baka, bika a angri fu de nanga wan masra o kon bigi moro leki a angri fu dini Kristus. ₁₂Na so sma o taki na den tapu fu di den no hori densrefi na a pramisi san den ben meki fosi. ₁₃Boiti dati, fu di den no abi noti fu du, den o kon lobi fu waka oso fu oso. Ma dati a no ala, den o taki sma sani, den o diki ini sma tori, èn den o taki sani di no fiti. ₁₄Dat' meki mi wani taki den yongu uma di masra dede kba, mus trow baka. Den mus kisi pikin èn den mus sorgu bun gi den oso. Na so den sma di e feti wi, no o kisi a okasi fu taki ogri fu wi. ₁₅Bika wantu fu den kmopo fu a bun pasi kba e du san Satan wani.

₁₆Efu wan uma di de wan bribisma abi famiri di masra dede kba, a mus sorgu gi den. A no mus libi a sorgu gi a gemeente. Dan a gemeente sa man sorgu gi den uma di trutru no abi no wan sma fu sorgu den.

₁₇A gemeente mus lespeki èn sorgu den fesiman di e du den wroko bun, spesrutu den wan di e preiki èn di e gi leri. ₁₈Bika a Santa Buku e taki: “Yu no mus tai a mofo fu wan kaw san e masi a graan fu puru a buba.” A taki moro fara taki: “A fiti fu wan wrokoman kisi en pai.” ₁₉Efu wan sma tyari wan kragi kon fu wan fesiman fu a gemeente, yu no mus teki en solanga tu noso dri kotoigi taki tak' a de so. ₂₀Efu wan fu den e sondu, yu mus warskow en na fesi a gemeente, fu den trawan sa frede fu sondu. ₂₁Na fesi Gado nanga Kristus Yesus nanga den santa engel, mi e taigi yu krin taki yu mus fu du den sani disi san mi taki. Yu no mus abi a prakseri na fesi kba taki wan sma fowtu, èn no teki a sei fu no wan sma. ₂₂Yu no mus gaw fu poti yu anu tapu wan sma. Yu no mus teki prati ini a sondu fu tra sma. Hori yusrefi krin. ₂₃Yu mus dringi pikinso win gi yu bere nanga den siki di e trobi yu ala yuru. No dringi soso watra. ₂₄Nownow kba den sondu fu son sma de krin fu si bifo den kisi den strafu srefi. Ma den sondu fu trawan o kon na krin bakaten. ₂₅Na a srefi te wan sma e du bun. A de krin fu si gi ala sma. Èn awinsi a no de fu si ete, wan dei a o kon na krin.