1 Timoteus 4

₁Ma a Yeye e taki krin tak' na den kriboi dei son sma o gwe libi a bribi. Den o bribi den yeye di e kori sma, èn den o bribi sani san takruyeye e leri den. ₂Den leri disi e kmopo fu sma di e du leki den santa, ma na soso lei den e lei èn na so den tapu a sten fu den konsensi. ₃Den e leri taki sma no mus trow èn taki den no mus nyan ala sani. Ma na Gado meki den sani disi, èn ala bribisma di kon ferstan a tru leri kan nyan den nanga tangi. ₄Bika ala sani san Gado meki, bun. Wi kan nyan ala sani, solanga wi e taki Gado tangi te wi e nyan en. ₅Bika a wortu fu Gado nanga a begi di wi e begi, e meki taki a kon bun fu nyan.

₆Yu mus leri den brada nanga sisa den sani disi, dan yu o de wan bun wrokoman fu Kristus Yesus di kweki ini den tru sani fu a bribi nanga a bun leri san yu e hori. ₇Ma yu no mus lasi yu ten nanga lawlaw taki di no abi noti fu du nanga Gado. Teki ala ten èn du ala muiti fu libi leki fa Gado wani. ₈Fu tan wroko na a skin no e tyari furu yepi. Ma fu libi leki fa Gado wani abi warti na ala fasi, fu di a sani dati e pramisi yepi gi yu libi dya nanga gi a libi san mus kon. ₉San mi e taki now de fu fertrow èn un kan bribi en nanga un heri ati. ₁₀Iya, dat'ede wi e meki someni muiti èn wi e wroko tranga, bika wi poti wi fertrow na tapu a libilibi Gado di de a Ferlusuman fu ala sma, ma funamku fu den bribisma.

₁₁Leri den sma a sani disi èn komanderi den taki den mus du so. ₁₂No meki no wan sma si yu leki noti fu di yu yongu. Ma yu mus de wan eksempre gi den bribisma ini a fasi fa yu e taki, a fasi fa yu e libi, sosrefi na ini lobi, nanga bribi, nanga wan krin libi. ₁₃Poti yusrefi fu leisi a wortu fu Gado gi den bribisma. Kraka den èn gi den leri te leki mi kon. ₁₄Di den fesiman fu a gemeente ben poti anu na yu tapu, èn di sma taki san Gado gi den fu taki abra yu, yu kisi wan presenti fu a Santa Yeye. Wroko nanga en. ₁₅Du den sani disi, tan du den nanga yu heri ati. Dan so ala sma sa si taki yu e go na fesi. ₁₆Luku bun fa yu e libi èn san yu e leri. Tan hori doro ini den sani disi. Sofasi yu e yepi yusrefi nanga den sma di e arki yu.