1 Timoteus 3

₁San mi e taki now de fu fertrow. Efu wan sma wani tron tiriman fu a gemeente, dan na wan tumsi bun sani a wani. ₂Wan tiriman fu a gemeente mus abi wan bun nen èn a mus abi wan uma nomo. A mus de nanga krin ai, a mus abi wan krin ferstan, èn a mus abi bun maniri. A doro fu en mus opo gi ala sma, èn a mus man gi leri. ₃A no mus de wan sma di lobi dringi, èn a no mus de wan sma di e kisi atibron es'esi, ma a mus abi switi maniri. A no mus de wan trobiman, èn a no mus gridi fu moni. ₄A mus de wan bun tiriman na ini en eigi oso, di e leri den pikin fu en tapu wan lespeki fasi fu du san a wani. ₅Bika efu wan sma no man tiri en eigi oso, fa a sa man sorgu gi a gemeente fu Gado dan? ₆Wan tiriman fu a gemeente mus de wan sma di drai en libi langa ten kba. Bika a kan kisi bigifasi, dan a o kisi a srefi strafu leki didibri. ₇A mus abi wan bun nen na den sma di no e bribi, fu a no kisi pori nen èn fu didibri no man kisi en.

₈Den dinari fu a gemeente mus de sma tu di trawan kan lespeki. Den no mus de leki wan tumofo gon, den no mus lobi dringi furu win, èn den no mus suku fu abi wini tapu wan fasi di no fiti. ₉Ma nanga wan krin konsensi den mus hori densrefi na den kibrisani san Gado sori wi fu a bribi. ₁₀Fosi den sma disi tron dinari fu a gemeente, sma mus luku efu den fiti fu du a wroko. Baka te a sori taki den o man, dan yu kan poti den leki dinari. ₁₁A mus de a srefi nanga den uma. Den mus de sma di trawan kan lespeki. Den no mus waka e pori trawan nen, ma den mus de nanga krin ai, èn den mus de fu fertrow na ini ala sani. ₁₂Den dinari fu a gemeente mus abi wan uma nomo. Den mus kweki den pikin fu den bun èn sorgu bun gi den eigi oso. ₁₃Bika den dinari di e du den wroko bun, e meki sma kisi lespeki gi den. Den sa man taki fri fu a bribi ini Kristus Yesus.

₁₄Mi e skrifi yu den sani disi aladi mi e howpu fu kon her'esi na yu. ₁₅Efu mi tan tumsi langa fu kon, yu sabi fa den sma mus tyari densrefi ini a oso fu Gado, sobun a gemeente fu a libilibi Gado. Na a gemeente e tyari a tru leri èn na en na a stonfutu fu en. ₁₆Fu tru, den kibrisani san Gado sori wi fu a bribi, bigi psa marki: