1 Timoteus 2

₁A fosi sani san mi wani aksi yu fu du, na fu begi gi ala sma. Tyari den nowtu kon na fesi Gado, taki nanga Gado gi den, èn gi Gado tangi. ₂Begi gi den kownu nanga ala den sma di abi wan hei presi ini a kondre. Na so wi o man libi safri na tapu wan tiri fasi. Wi o man libi leki fa Gado wani èn du sani san abi warti. ₃A bun fu du a sani disi, èn Gado wi Ferlusuman lobi te wi e begi so. ₄Bika A wani ferlusu ala sma, èn A wani taki den kon ferstan a tru leri. ₅Bika na wan Gado nomo de, èn na wan Mindriman nomo de di e tyari Gado nanga libisma kon na wan. A man dati na Kristus Yesus. ₆Na Yesus ben gi En libi fu ala sma kan kon fri. Dati na a boskopu di Gado seni kon di a yoisti ten doro. ₇Èn Gado poti mi leki boskopuman fu panya a boskopu disi. A poti mi fu leri den sma di no de Dyu abra a bribi nanga a tru leri. A sani disi tru, mi no e lei.

₈Mi wani taki na ala presi, den mansma mus opo santa anu go na loktu te den e begi. Den no mus de nanga atibron, noso e libi ini trobi. ₉Moro fara mi wani taki den umasma no mus weri krosi san e poti den skin na doro. Den mus weri bun soleki fa a fiti. Den no mus wani fu sma si den fu di den e brei moi wiwiri, noso fu di den e weri gowtu sani, parelkrara noso dir'diri krosi. ₁₀Ma sma mus e si den fu di den e du bun wroko, bika na so a fiti wan umasma di e taki tak' a e libi leki fa Gado wani. ₁₁Te wan umasma e teki leri, a mus tan tiri èn a mus arki nanga sakafasi. ₁₂Mi no e gi umasma pasi fu gi leri noso fu abi makti tapu mansma. Den mus de tiri. ₁₃Bika Gado meki Adam fosi èn baka dati A meki Eva. ₁₄A de so tu tak' a no Adam meki didibri kisi en, na a uma meki didibri kisi en fu du sondu. ₁₅Ma Gado o ferlusu en fu di a e tyari pikin kon na grontapu, efu a e tan hori a bribi, lobi tra sma, èn libi santa soleki fa a fiti.