2 Historia 10

₁Dan Rekabeam go na Sikem, bika drape ala den Israelitisma ben kon makandra fu poti en leki kownu. ₂Fa Yerobeam, a manpikin fu Nebat, yere dati, na so a drai kmoto fu Egipte pe a ben lowe go tan gi kownu Salomo. ₃Den seni kari en, dan Yerobeam nanga ala den Israelitisma go na Rekabeam go aksi en taki: ₄“Yu p'pa ben meki a libi tumsi hebi gi unu. Ma efu yu meki a hebi wroko fu yu p'pa nanga a libi moro lekti gi wi, dan wi sa dini yu.” ₅Rekabeam piki den taki: “Un go dan un kon tra tamara baka na mi.” Di den gwe, ₆Rekabeam aksi den owru man di ben wroko nanga en p'pa Salomo, taki: “Sortu rai un kan gi mi fu piki a pipel?” ₇Den piki en taki: “Efu yu libi switi nanga a pipel disi, efu yu du san den aksi èn yu taki switi nanga den dan ala ten den sa dini yu.” ₈Ma Rekabeam no arki a rai di den owru man gi en. A go aksi den yonkuman di gro makandra nanga en, èn di ben e wroko now gi en. A aksi den taki: ₉“Sortu rai un e gi mi? A pipel aksi mi fu mi meki a hebi wroko di mi p'pa e meki den du, moro lekti. San mi mus piki den?” ₁₀Den yonkuman nanga san a gro kon, piki en taki: “A pipel di aksi yu fu yu meki a hebi wroko fu yu p'pa moro lekti gi den, yu mus piki taki: ‘A pikinfinga fu mi fatu moro mi p'pa bere. ₁₁Mi p'pa ben hebi a wroko gi unu, ma mi o meki a kon moro hebi. Mi p'pa ben fon unu, ma mi dati o priti un skin nanga wipi.’ ” ₁₂Tapu a di fu dri dei Yerobeam nanga a heri pipel drai go baka na kownu Rekabeam soleki fa a ben taigi den. ₁₃Dan Rekabeam piki den tapu wan grofu fasi. A no ben arki a rai di den owru man ben gi en, ₁₄ma a teki di fu den yonkuman. A piki den taki: “Mi p'pa ben hebi a wroko gi unu, mi o meki en moro hebi. Mi p'pa ben fon unu, ma mi dati o priti un skin nanga wipi.” ₁₅Tapu a fasi disi kownu no du san a pipel ben aksi en. Ma na Gado ben meki sani waka so, fu a sani ben kan kon tru di MASRA ben meki Akia fu Silo taigi Yerobeam, a manpikin fu Nebat.

₁₆Di ala den Israelitisma si tak' kownu no arki den, den piki en taki: “Man fu Israel, wi abi noti fu du nanga David, wi abi noti fu wini na a manpikin fu Isai. Meki wi go na wi oso. A kownu-oso fu David sa sorgu gi ensrefi.” Dan ala den Israelitisma drai go na den oso baka. ₁₇Na so Rekabeam tan kownu soso fu den Israelitisma di ben e libi ini den foto fu Yuda. ₁₈Dan Kownu Rekabeam seni Adoniram, a edeman fu den sma di ben mus wroko fu soso gi kownu, go na den Israelitisma ma den fringi ston kiri en. Kownu srefi ben abi fu dyompo es'esi na ini en wagi go na Yerusalem baka. ₁₉Na so den Israelitisma drai den baka gi a famiri fu David te leki tide.