2 Historia 15

₁A Yeye fu Gado kon tapu Asarya, a manpikin fu Oded. ₂Dan Asarya waka miti Asa èn a taigi en taki: “Asa, yu nanga ala den sma fu Yuda nanga Benyamin, un arki mi! MASRA de nanga unu solanga un de nanga En. Efu un suku En, A o meki un feni En, ma efu un gwe libi En, A o gwe libi un tu. ₃Wan heri pisten Israel libi sondro a tru Gado, sondro priester di ben e gi leri èn sondro wèt. ₄Ma te den ben de ini benawtu, den ben drai kon baka na MASRA, a Gado fu Israel èn te den ben e suku En, dan A ben e meki den feni En. ₅Ini den ten dati no wan sma ben man go fu a wan presi na a trawan sondro problema, bika ala presi bruya ben de. ₆A wan kondre ben e feti nanga a trawan èn a wan foto ben e feti nanga a trawan, bika Gado ben e tyari ala sortu bruya na den pasi. ₇Ma unu, un mus teki dek'ati, un no mus lasi ati, bika un o kisi a pai fu a wroko di un e du.”

₈Fa Asa yere a boskopu, den sani di Gado ben gi Asarya, a manpikin fu Obed, fu taki, na so a teki dek'ati. A puru ala den groskin popki fu tra gado ini a heri kontren fu Yuda nanga Benyamin nanga ini den foto di a ben teki abra ini a bergikontren fu Efraim. A meki a altari fu MASRA, di ben tnapu fesi a fes'sei gadri fu a tempel, bun baka. ₉Dan a seni kari ala den sma fu den lo fu Yuda nanga Benyamin fu kon na wan, makandra nanga den sma fu Efraim, Manase nanga Simeon di ben e libi leki doroseisma na den mindri. Bika furu sma fu Israel ben abra go na Asa di den si tak' MASRA, a Gado fu en, ben de nanga en. ₁₀Dan den kon makandra na Yerusalem ini a di fu dri mun di Asa ben de na tin-na-feifi yari na makti. ₁₁A dei dati den tyari seibi hondro kaw nanga seibi dusun skapu nanga krabita gi MASRA, fu den meti di den wini ini den feti. ₁₂Dan den meki wan ferbontu tak' den o suku MASRA, a Gado fu den afo fu den, nanga den heri ati, nanga den heri sili, ₁₃èn tak' den ben o kiri ini wan sma di no du dati. A no ben abi trobi efu a ben de wan pikin noso wan bigisma, wan man noso wan uma. ₁₄Nanga tranga sten den sweri dati gi MASRA. Den ben e meki babari fu prisiri èn den ben e bro trompet nanga tutu. ₁₅Heri Yuda ben breiti nanga a ferbontu di den meki. Bika den ben sweri nanga den heri ati èn den ben suku MASRA trutru, èn MASRA meki den feni En. A ben meki taki den ben e libi ini freide nanga ala den folku lontu den.

₁₆Kownu Asa puru a grani di en granm'ma Maaka ben abi leki m'ma fu kownu, fu di a ben meki wan groskin popki fu Asyera. Asa kapu a popki dati pis'pisi, dan a sutu faya gi en ini a Kidrondal. ₁₇Asa tan dini MASRA wawan nanga en heri ati en heri libi langa, ma den presi pe sma ben e tyari ofrandi ben tan. ₁₈Den sani di en p'pa nanga di ensrefi ben poti aparti gi MASRA, soleki solfru, gowtu nanga ala sortu tra sani, a tyari go poti ini a oso fu Gado.

₁₉Te leki di Asa ben de dritenti-na-feifi yari na makti feti no ben broko ini a kondre.