Lees verschillende vertalingenLees verschillende vertalingen
Vergelijk verschillende vertalingenVergelijk verschillende vertalingen
Maak uw notitiesMaak uw notities
Kopieer en markeer BijbeltekstenKopieer en markeer Bijbelteksten
Uitproberen
2 Historia 16
1Di Asa ben de dritenti-na-siksi yari na makti, kownu Basa fu Israel, hari kon feti nanga Yuda. Basa meki a foto Rama kon moro tranga fu a ben kan tapu a pasi fu sma no go noso kmoto fu Yuda. 2Dan Asa go teki a solfru nanga a gowtu ini a oso fu MASRA, ini den kamra pe den gudu ben e tan, nanga di fu a kownu-oso, dan a seni en go gi kownu Benhadad fu Aram, di ben e libi na Damaskus, nanga a boskopu disi: 3“Den p'pa fu wi ben meki wan ferbontu, meki wi meki wan tu. Luku, mi e seni solfru nanga gowtu gi yu. Broko a ferbontu fu yu nanga Basa, a kownu fu Israel. Dati sa dwengi en fu a puru den srudati fu en ini mi kondre.” 4Benhadad du san kownu Asa aksi en. A komanderi den edeman fu a legre fu en fu hari go na den foto fu Israel. Dan den teki den foto Iyon, Dan, Abel-Maim nanga ala den foto fu Naftali abra di den ben e teki leki maksin fu kibri nyanyan. 5Fa Basa yere a nyunsu, na so a tapu a wroko di a ben e du na Rama fu meki a foto disi kon moro tranga. 6Dan kownu Asa seni kari heri Yuda. A meki den puru ala den ston nanga ala den udu nanga san kownu Basa ben meki a foto Rama kon moro tranga, dan a meki den foto Geba nanga Mispa kon moro tranga.
7A srefi ten dati, Hanani, wan man di Gado ben e sori sani, go na kownu Asa fu Yuda dan taigi en taki: “Fu di yu no bow tapu MASRA, yu Gado, ma tapu a kownu fu Aram, yu no o man wini a legre fu a kownu fu Aram moro. 8Den legre fu Nubia nanga di fu Libia ben bigi èn den ben abi furu fetiwagi nanga srudati tapu asi, ma MASRA ben gi den abra na yu fu di yu ben fertrow na En tapu. 9Bika den ai fu MASRA e go lontu na heri grontapu fu yepi ibrisma di e dini En nanga en heri ati. Na wan don sani yu du di yu suku yepi na Aram, bika now feti e kon na yu pasi dorodoro.” 10Ne Asa atibron tapu a man di Gado e sori sani. A meki den poti en na straf'oso fu di en ati ben e bron srefsrefi. A srefi ten dati Asa du wan tu sma fu a pipel bigi ogri.
11Den tra sani di psa ini a libi fu Asa, fu a bigin go te na a kba, skrifi poti ini a buku fu den kownu fu Yuda nanga Israel. 12Di Asa ben de dritenti-na-neigi yari na makti, a kon siki na en futu èn a siki ben e gi en furu problema. Ma aladi Asa ben e siki so, a no suku yepi na MASRA, ma a go suku yepi na difrenti dresiman. 13Asa dede di a ben de fotenti-na-wan yari na makti. 14Den beri en ini a foto fu David, ini a bergi-olo di a ben meki den diki gi en. Den poti a dedeskin fu en tapu wan bedi di den ben furu nanga spesrei nanga wiwiri di ben e smeri switi. Den ben moksi den sani disi leki fa den man e du di sabi meki oli di e smeri switi. Baka dati den meki wan bun bigi faya fu gi en grani.
