Kownu Asarya fu Yuda
1Di kownu Yerobeam fu Israel ben de tutenti-na-seibi yari na makti, Asarya, a manpikin fu Amasya tron kownu fu Yuda. 2A ben abi tin-na-siksi yari di a tron kownu. A tan feifitenti-na-tu yari na makti ini Yerusalem. En m'ma ben nen Yekolya èn a ben de fu Yerusalem. 3A ben e du san bun ini MASRA ai, neleki en p'pa Amasya. 4Ma den presi pe den sma ben e tyari ofrandi ben tan. Den sma ben tan e srakti meti leki ofrandi èn bron wierook na den presi dati.
5Dan MASRA strafu kownu nanga gwasi. A tan nanga gwasi te leki a dede. A ben go tan en wawan na ini wan aparti oso. Yotam, a manpikin fu en ben e sorgu taki sani ben e waka bun ini a kownu-oso èn a ben e tiri a kondre. 6Den tra sani di psa ini a libi fu Asarya nanga ala den sani di a du skrifi poti ini a buku fu a historia fu den kownu fu Yuda. 7Asarya dede èn den beri en ini a foto fu David. En manpikin Yotam teki en presi leki kownu.
Kownu Sekarya fu Israel
8Di kownu Asarya fu Yuda ben de dritenti-na-aiti yari na makti, Sekarya, a manpikin fu Yerobeam, tron kownu fu Israel. A ben e libi na Samaria, èn a tan siksi mun na makti. 9A ben e du san no bun ini MASRA ai, neleki den afo fu en. A tan du den sondu di Yerobeam, a manpikin fu Nebat, ben meki Israel e du.
10Salum, a manpikin fu Yabes, meki mofo fu kiri Sekarya èn a kiri en leti fesi ala sma dan a teki en presi leki kownu. 11Den tra sani di psa ini a libi fu Sekarya skrifi poti ini a buku fu a historia fu den kownu fu Israel. 12MASRA ben pramisi Yehu taki: “Yu pikin, granpikin nanga afopikin, o teki yu presi leki kownu fu Israel.” Èn na so a psa tu.
Kownu Salum fu Israel
13Di kownu Usia fu Yuda, ben de dritenti-na-neigi yari na makti, Salum, a manpikin fu Yabes, tron kownu. A tan wan mun na makti ini Samaria. 14Dan Menakem, a manpikin fu Gadi, kmoto fu Tirsa go kiri Salum, a manpikin fu Yabes, na Samaria dan a teki en presi leki kownu. 15Den tra sani di psa ini a libi fu Salum nanga a mofo di a ben meki fu kiri kownu, skrifi poti ini a buku fu a historia fu den kownu fu Israel. 16Di Menakem ben e hari kmoto fu Tirsa, a broko a foto Tifsak èn a kiri ala den sma fu a foto dati nanga di fu a heri kontren drape, fu di den sma fu Tifsak no ben wani opo den bigi doro fu a foto gi en. A kiri ala den sma fu a foto èn a meki den priti ala den bere fu den uma opo di ben de nanga bere.
Kownu Menakem fu Israel
17Di kownu Asarya fu Yuda ben de dritenti-na-neigi yari na makti, Menakem, a manpikin fu Gadi, tron kownu fu Israel. A ben e libi na Samaria èn a tan tin yari na makti. 18A ben e du san no bun ini MASRA ai. A tan du den sondu di Yerobeam, a manpikin fu Nebat, ben meki Israel e du te leki a dede.
19Dan Kownu Pul fu Asur hari go feti nanga Israel. Ma Menakem gi Pul dritenti dusun kilo solfru fu Pul ben kan yepi en fu a tan kownu fu a kondre. 20Menakem ben puru a moni disi na anu fu den gudu sma fu Israel, fu a ben kan pai a kownu fu Asur. A ben meki ibri sma gi sowan afu kilo solfru. Dan a kownu fu Asur drai gwe libi a kondre. 21Den tra sani di psa ini a libi fu Menakem nanga ala den sani di a du, skrifi poti ini a buku fu a historia fu den kownu fu Israel. 22Menakem dede èn en manpikin Pekakya teki en presi leki kownu.
Kownu Pekakya fu Israel
23Di kownu Asarya fu Yuda ben de feifitenti yari na makti, Pekakya, a manpikin fu Menakem tron kownu fu Israel. A ben libi na Samaria èn a tan tu yari na makti. 24A ben e du san no bun ini MASRA ai. A tan du den sondu di Yerobeam, a manpikin fu Nebat, ben meki Israel e du.
25Pekak, a manpikin fu Remalyahu, wan fu den ofisiri fu kownu, meki mofo fu kiri en. A kiri kownu nanga Argob nanga Arye, ini a tranga kibripresi fu a kownu-oso na Samaria. A du disi nanga a yepi fu feifitenti man fu Gilead. Baka di Pekak kiri kownu a teki en presi leki kownu. 26Den tra sani di psa ini a libi fu Pekakya nanga ala den sani di a du, skrifi poti ini a buku fu a historia fu den kownu fu Israel.
Kownu Pekak fu Israel
27Di kownu Asarya fu Yuda ben de feifitenti-na-tu yari na makti, Pekak, a manpikin fu Remalyahu, tron kownu fu Israel. A ben e libi na Samaria èn a tan tutenti yari na makti. 28A ben e du san no bun ini MASRA ai. A tan du den sondu di Yerobeam, a manpikin fu Nebat, ben meki Israel e du.
29Di kownu Pekak fu Israel ben de na makti, kownu Tiglatpileser fu Asur, broko kon ini a kondre. A teki den foto Iyon, Abel-Bet-Maaka, Yanoak, Kedes nanga Hasor, abra. A teki den kontren Gilead, Galilea nanga a heri kontren fu Naftali abra tu dan a tyari den sma di ben e libi drape nanga tranga gwe na Asur.
30Hosea, a manpikin fu Ela, ben meki mofo fu kiri Pekak, a manpikin fu Remalyahu. A kiri en dan a teki en presi leki kownu, di kownu Yotam, a manpikin fu Usia, ben de tutenti yari na makti. 31Den tra sani di psa ini a libi fu Pekak nanga ala den sani di a du, skrifi poti ini a buku fu a historia fu den kownu fu Israel.
Kownu Yotam fu Yuda
32Di kownu Pekak fu Israel, a manpikin fu Remalyahu, ben de tu yari na makti, Yotam, a manpikin fu Usia, tron kownu fu Yuda. 33A ben abi tutenti-na-feifi yari di a tron kownu èn a tan tin-na-siksi yari na makti ini Yerusalem. En m'ma ben nen Yerusa èn a ben de a umapikin fu Sadok. 34Yotam ben e du san bun ini MASRA ai, neleki en p'pa Usia. 35Ma den presi pe den sma ben e tyari ofrandi ben tan. Den sma ben tan e srakti meti leki ofrandi èn bron wierook na den presi dati.
Na Yotam meki a Tap'seipoort na a oso fu MASRA. 36Den tra sani di psa ini a libi fu Yotam nanga ala den sani di a du, skrifi poti ini a buku fu a historia fu den kownu fu Yuda. 37Ini a ten di Yotam ben de na makti, MASRA meki kownu Resin fu Aram, nanga kownu Pekak fu Israel, go feti na Yuda fu a fosi leisi. 38Yotam dede èn den beri en na den afo fu en ini a foto fu David. En manpikin Akas teki en presi leki kownu.
