Gado teki Elia na heimel
1Elia nanga Elisa ben e kmoto fu a foto Gilgal, pikinso fosi MASRA bo teki Elia na heimel ini wan hebi winti. 2Dan Elia taigi Elisa taki: “Mi begi yu, tan dyaso, bika MASRA taigi mi tak' mi mus go na Betel.” Ma Elisa taigi Elia taki: “Mi e sweri na a libilibi MASRA, èn na yu eigi libi, tak' mi no o gwe libi yu.” So den go moro fara na Betel. 3Dan den profeiti fu Betel kon aksi Elisa taki: “Yu sabi tak' MASRA o teki yu basi tide tyari gwe?” Elisa piki den taki: “Iya mi sabi, ma un tan tiri.” 4Dan Elia taigi Elisa taki: “Mi e begi yu, tan dyaso, bika MASRA seni mi go na Yeriko.” Ma Elisa piki en taki: “Mi e sweri na a libilibi MASRA, èn na yu eigi libi, tak' mi no o gwe libi yu.” So den go moro fara na Yeriko. 5Dan den profeiti fu Yeriko kon aksi Elisa taki: “Yu sabi tak' MASRA o teki yu basi tide tyari gwe?” Elisa piki den taki: “Iya mi sabi, ma un tan tiri.” 6Dan Elia taigi Elisa taki: “Mi e begi yu, tan dyaso, bika MASRA seni mi go na a Yordanliba.” Ma Elisa piki en taki: “Mi e sweri na a libilibi MASRA, èn na yu eigi libi, tak' mi no o gwe libi yu.” So den ala tu go moro fara.
7Feifitenti profeiti ben go nanga den, ma den tan tnapu fara fu den di Elia nanga Elisa tan tnapu na a Yordanliba. 8Elia puru a langa dyakti fu en, a fow en, dan a naki tapu a watra. Ne a watra fu a liba prati go na kruktusei nanga let'sei èn den tu man ben kan abra na tapu drei gron. 9Di den doro na a tra sei, Elia taigi Elisa taki: “San mi kan du gi yu fosi MASRA teki mi?” Elisa piki taki: “Meki a yeye di e wroko ini yu leki profeiti wroko tu tron so tranga ini mi.” 10Elia piki en taki: “A no wan makriki sani yu winsi. Efu yu sa si mi te mi e gwe, a o psa. Ma efu yu no si mi, a no o psa.” 11Dan den waka moro fara, èn den ben e taki. Ne wantronso, asi fu faya di ben e hari wan fetiwagi fu faya, prati den fu makandra, èn wan bun hebi winti tyari Elia go na heimel. 12Elisa si a heri sani, èn a bari: “Mi p'pa, mi p'pa! Fetiwagi nanga legre fu Israel!” Di a no ben e si Elia moro, a hari a krosi di a ben weri priti na tu pisi, fu di a ben e sari. 13Baka dati, a piki a langa dyakti di ben fadon kmoto fu Elia skin, dan a drai gwe go tnapu na syoro fu a Yordanliba. 14Dan a naki tapu a watra nanga a langa dyakti fu Elia, èn a bari taki: “MASRA, Gado fu Elia, pe Yu de?” Di a naki tapu a watra, a watra prati, èn Elisa abra go na tra sei. 15Den profeiti fu Yeriko, di ben tnapu farawe e luku, si san psa dan den taki: “A yeye fu Elia de na tapu Elisa.” Dan den waka go miti Elisa èn den boigi dipi gi en. 16Ne den taigi en taki: “Luku, wi de nanga feifitenti tranga man dyaso. Meki wi go suku a basi fu yu. Bika kande a Yeye fu MASRA teki en poti tapu wan bergi noso na ini wan fu den dal.” Ma Elisa taigi den taki: “Un no abi fu du dati.” 17Ma den tan dwengi te leki Elisa firi wan fasi. Ne a taigi den taki: “A bun, un seni den go.” Ne den seni feifitenti man, di suku dri dei langa, sondro fu feni Elia. 18Di den drai go na Elisa, di ben de ini Yeriko, a taigi den taki: “Mi ben taigi unu tak' un no ben abi fu go.”
A fosi wondru fu Elisa
19Den sma fu a foto go na Elisa èn den taigi en taki: “Masra, soleki fa yu srefi e si, Yeriko de na wan bun presi. Ma a watra no bun èn libisma nanga meti e lasi bere.” 20Ne Elisa taigi den taki: “Un go teki wan nyun komki nanga sowtu na ini dan un tyari kon gi mi.” So den tyari gi en san a aksi. 21Dan Elisa go na a watrabron fu a foto, a fringi a sowtu go na ini dan a taki: “Na disi MASRA e taki: ‘Mi e meki a watra disi kon bun baka. A no sa tyari dede moro èn a no sa meki libisma nanga meti e lasi bere.’ ” 22Ne a watra kon bun baka, neleki fa Elisa ben taki èn a tan so te tide.
23Dan Elisa kmoto fu Yeriko go na Betel. Ma di a e kren a pasi e go na loktu, wan grupu pikin boi kmoto ini a foto di bigin meki spotu nanga en. Den ben e bari gi en taki: “Tyari go, pir'ede, tyari go, pir'ede!” 24Ne Elisa drai luku den, dan a fluku den ini a nen fu MASRA. Wantron tu umabeer kmoto ini a busi èn priti fotenti-na-tu fu den.
25Dan Elisa kmoto fu Betel, go na a Karmelbergi, èn fu drape a drai go baka na Samaria.
