1Baka dati un drai dan un hari go na a sei fu Basan. Ne Og, a kownu fu Basan, hari kon miti unu, fu feti nanga unu na Edrei. En nanga a heri folku fu en. 2Ma MASRA taigi mi taki: “No frede gi en, bika Mi e gi en, en heri folku nanga a kondre fu en abra ini un makti. Un sa du a srefi nanga en leki fa un du nanga Sikon, a kownu fu den Amoritisma, di ben e libi na Hesbon.” 3Dan MASRA, un Gado, gi Og, a kownu fu Basan, nanga en heri folku, abra ini un makti tu. Un fon den èn un kiri den te na a laste man. No wan sma no tan na libi. 4Ala den foto fu en un teki abra. No wan foto no ben de di wi no teki abra. Un teki ala siksitenti foto di ben de ini a kontren fu Argob, pe kownu Og ben de na makti ini Basan. 5Ala den foto disi ben de tranga foto nanga hei skotu, bigi doro nanga greni. Moro fara wan lo pikinpikin dorpu ben de tu. 6Un broko den foto èn un kiri ala sma leki fa un du nanga Sikon, a kownu fu Hesbon. Ala foto un broko èn un kiri man, uma nanga pikin. 7Ma ala den kaw, skapu nanga krabita nanga den gudu fu den foto wi tyari gwe fu hori gi unsrefi.
8Na so un puru a heri kontren na a anu fu den tu Amoritikownu. Dati na a kontren di didon na a tra sei fu a Yordanliba, bigin na a Arnonliba te go miti a Hermonbergi. 9A Hermonbergi den sma fu Sidon ben e kari Siryonbergi. Den Amoritisma ben e kari en Senirbergi. 10Na ini a kontren disi yu ben abi ala den foto di ben den tapu den hei plata presi, heri Gilead nanga Basan te kon miti Salka nanga Edrei, sobun a heri kontren pe kownu Og fu Basan ben de na makti leki kownu. 11Kownu Og fu Basan ben de a laste bakapikin fu den Refaitisma. A ston kisi ini san a beri ben meki fu basaltston. A langa sowan fo meter èn a bradi sowan tu meter. A de fu si ini Raba, a moro prenspari foto fu Amon.
12Disi ben den a kondre di un teki a pisten dati abra. A pisi di e bigin na a foto Arower di didon na a Arnonliba nanga afu fu den bergi fu Gilead nanga den foto, mi gi na den bakapikin fu Ruben nanga Gad. 13A tra afu fu den bergi fu Gilead nanga heri Basan, a kontren fu kownu Og, nanga a heri kontren fu Argob, mi gi na afu fu a lo fu Manase. A heri Basan den e kari a kondre fu den Refaitisma tu. 14Yair, wan bakapikin fu Manase, ben teki a heri kontren fu Argob abra, te kon miti a kontren fu den Gesuritisma nanga den Maakatitisma. Dan a gi a kontren Basan en eigi nen. A kari den: den dorpu fu Yair. Te leki tide den e tyari a nen disi. 15Den bakapikin fu Makir a manpikin fu Manase kisi Gilead. 16Den bakapikin fu Ruben nanga di fu Gad mi gi a pisi fu Gilead te go miti afu fu a Arnonliba. A pisi di mi gi den ben waka na a zuidsei te go miti afu fu a Arnonliba. Na noordsei a ben e waka go te na a Yabok-kriki pe a kondre fu den Amonitisma ben e bigin. 17Moro fara den ben kisi a Yordandal, a Yordanliba nanga a kontren kmoto fu Kineret nanga a Sowtuse go na oostsei te go miti a futu fu a Pisgabergi.
18Mi ben taigi un taki: “MASRA, un Gado, gi un a kondre disi fu un teki en. Ma un mus go nanga un fetisani na fesi fu den brada fu unu, a folku fu Israel, te den o koti a Yordanliba abra. 19Soso den umasma, den pikin fu unu nanga den meti fu unu kan tan na baka ini den foto di mi gi unu. Mi sabi omeni meti un abi. 20Un mus go nanga den brada fu unu, te leki MASRA meki den brada fu unu wini ala den feyanti fu den tu neleki unu, èn den teki a kondre abra di MASRA, un Gado, gi den na a tra sei fu a Yordanliba. Baka dati un kan drai kon baka. Ala sma kan drai kon na a pisi gron di mi gi en.” 21Yosua mi ben taigi taki: “Yu si ala sani nanga yu eigi ai san MASRA, yu Gado, du nanga den tu kownu disi. A srefi fasi MASRA o du nanga ala den tra kownu di un o go miti. 22No frede den, bika na MASRA, yu Gado, o feti den feti gi unu.”
23Mi ben begi MASRA tu taki: 24“Masra fu MASRA, Yu bigin fu sori yu knekti Yu makti nanga fa Yu bigi. Bika no wan gado no de na ini heimel noso na grontapu, di kan du den bigi sani di Yu du noso di abi sowan makti leki Yu. 25Mi e begi Yu gi mi a okasi fu koti abra, fu mi si a bun kondre di didon na abrasei fu a Yordanliba, den moi bergi nanga a Libanonbergi.” 26Ma MASRA en ati ben e bron na mi tapu fu unu ede èn A no ben wani arki mi. MASRA taigi mi taki: “A sari! Noiti moro yu mus aksi Mi a sani disi baka. 27Kren go na a moro hei pisi fu a Pisgabergi, dan yu e luku go na a westsei, a noordsei, a zuidsei nanga a oostsei. Luku lontu san yu e si, bika yu no sa koti a Yordanliba abra. 28Taigi Yosua ala sani di a mus du. Gi en dek'ati. Bika na en sa go na fesi fu a folku disi, te den o koti abra. Na en o meki den teki a kondre abra di yu o si.” 29Dan un tan ini a dal nanga un fesi go na Bet-Peor.
