Deuteronomium 4

₁Israel arki! Un hori unsrefi na den sani di un mus tan du nanga na den sani na san un mus tan hori unsrefi. Den sani di mi leri unu fu du. Efu un du dati, un sa tan na libi èn un sa go ini a kondre di MASRA, a Gado fu den afo fu unu, o gi unu, fu un teki en abra. ₂Un no sa poti noti moro na den sani di mi taigi unu fu du, èn un no sa puru noti fu den tu. Un hori unu na den gebod fu MASRA, un Gado, di mi gi unu. ₃Un si nanga un eigi ai san MASRA du na Baal-Peor. Un si fa MASRA, un Gado, kiri ala sma di ben waka baka Baal-Peor. ₄Ma unu di tan dini MASRA, un Gado, de tide na libi ete.

₅Luku, mi leri un den sani di un mus tan du nanga den sani na san un mus tan hori unsrefi, leki fa MASRA, mi Gado, ben komanderi mi. Un mus hori un na den sani disi te un de ini a kondre di un o teki abra. ₆Un mus hori unsrefi bun na san den e taki. Disi sa meki taki tra folku si taki un koni èn taki un abi ferstan, te den yere ala den sani di un mus tan du. Den sa taki: “Trutru, a bigi folku disi na wan koni folku nanga ferstan.” ₇Bika no wan folku, awinsi fa a bigi, abi gado di e yepi den so esi, leki fa MASRA, wi Gado, e yepi unu ala leisi te wi kari En. ₈No wan folku no de tu, awinsi fa a bigi, di abi so bun sani di den mus tan du, nanga sani na san den mus tan hori densrefi, leki a heri wèt di mi e leri un tide. ₉Ma un mus sorgu taki noiti un fergiti den sani di un si nanga un eigi ai. Un mus tan memre den solanga leki un e libi èn un mus ferteri den na den pikin nanga den bakapikin fu unu.

₁₀Ferteri den fu a dei di un ben tnapu na MASRA, un Gado, fesi na a Horeb-bergi. Di MASRA taigi mi taki: “Kari a folku kon na wan. Mi wani taki nanga den fu den leri lespeki Mi solanga leki den e libi èn fu den leri den pikin fu den fu lespeki Mi.” ₁₁So un kon, dan un tan tnapu na a futu fu a bergi. Faya ben e opo fu a bergi go na te heimel èn deki blaka wolku ben e tapu a bergi. ₁₂Ne MASRA taki nanga unu. En sten ben de fu yere ini a faya. Un ben e yere wan sten e taki, ma un no si noti. Soso wan sten ben de fu yere. ₁₃Dan A meki un kon sabi a ferbontu, den tin gebod, di A ben wani taki un ben mus hori. A skrifi den tapu tu plata ston. ₁₄Ma MASRA ben komanderi mi taki mi mus leri un den sani di un mus tan du, nanga den sani na san un mus tan hori unsrefi fu un ben tan du den ini a kondre di un e go teki abra now. ₁₅Dat' meki, fu di un si noti ini a faya tapu a Horeb-bergi, a dei di MASRA taki nanga unu, ₁₆un mus sorgu taki un no du sani di no bun srefsrefi, fu go meki wan ston noso wan udu popki fu wan kruktu gado. Wan sani di gersi wan uma, wan man, ₁₇noso wan meti di e libi na grontapu. A no mus de tu fu wan meti nanga frei, di e frei na loktu, ₁₈wan prentyi fu wan meti di e kroipi na grontapu, noso fu wan fisi di e libi ini a watra na grontapu. ₁₉Un no mus opo un ede go na loktu tu fu luku heimel, a son, a mun, den stari noso wan tra sani di de loktu na heimel, dan un meki un ati kori unu fu boigi gi den èn anbegi den, bika MASRA ben poti den sani dati gi ala den tra folku na grontapu. ₂₀Ma MASRA ben puru unu na ini Egipte ini a faya onfu, ini a pina di un ben e pina drape, fu un ben kan de En eigi folku, leki tide.

₂₁Ma fu un ede MASRA atibron na mi tapu. A sweri taki mi no sa koti a Yordanliba abra èn taki mi no sa kon ini a bun kondre di MASRA, un Gado, o gi unu fu de fu unu fu têgo. ₂₂Mi o dede ini a kondre disi. Mi no sa koti a Yordanliba abra. Na unu o koti abra fu teki a bun kondre abra. ₂₃Dat' meki un mus sorgu taki un no fergiti a ferbontu di MASRA, un Gado, meki nanga unu, dan un meki wan popki fu wan sani di MASRA, un Gado, taigi unu taki un no mus du. ₂₄Bika MASRA, un Gado, na leki wan faya di e bron ala sani. Na wan dyarusu Gado. ₂₅Te un de langa nofo ini a kondre èn un kisi pikin nanga bakapikin, dan baka dati un bigin sondu fu meki wan popki fu wan sani, èn un bigin wiki a atibron fu MASRA, un Gado, fu du sani di no bun ini en ai, ₂₆dan mi e teki heimel nanga grontapu tide leki kotoigi, taki es'esi un o dede ini a kondre di un o teki abra te un koti a Yordanliba abra. Un no sa tan libi langa drape srefsrefi ma un o figi kmoto na grontapu. ₂₇MASRA sa panya unu na mindri den tra folku na grontapu. Un o de wan pikin grupu nomo mindri den folku pe MASRA o tyari un go. ₂₈Drape un o dini gado di libisma srefi meki, gado di meki fu udu nanga ston, di no e si, di no e yere, di no e nyan èn di no man smeri. ₂₉Dan un o suku MASRA, un Gado, drape èn un o feni en efu un e aksi fu En nanga un heri ati èn nanga un heri sili. ₃₀Te a ten doro taki un de ini nowtu fu di ala den sani disi miti unu, dan un o drai baka arki MASRA, un Gado. ₃₁Bika MASRA, un Gado, na wan Gado di abi sari-ati. A no sa drai En baka gi unu, A no sa libi unu fu sani miti unu èn A no sa fergiti a ferbontu di A meki nanga den afo fu unu. A ben sweri dati.

₃₂Un luku na a ten di didon na un baka, sensi di a dei di Gado meki libisma na grontapu, dan un aksi fu a wan sei fu grontapu go miti a tra sei, efu sowan bigi sani ben psa kba noso efu sma ben yere fu sowan sani kba. ₃₃No wan folku no de di yere fa a sten fu wan gado e kmoto na ini wan faya, leki fa unu yere dati, dan den tan na libi. ₃₄Noiti wan gado prefuru tu fu puru wan folku di ben de ini anu fu wan tra folku, dan a taki tak' den na fu en. Noiti wan gado du a san dati fu pina a tra folku, fu du wondru nanga marki di tyari bruya, dan a feti gi den nanga bigi krakti nanga makti, leki fa MASRA, un Gado, du dati gi unu ini Egipte meki un si. ₃₅A meki un si den sani disi, fu un kan sabi taki MASRA wawan na Gado. Boiti En no wan trawan no de. ₃₆A meki un yere En sten fu heimel, fu leri unu san un mus du. A meki un si a bigi faya fu En na grontapu, dan A taki nanga unu fu mindri a faya. ₃₇A ben lobi den afo fu unu èn A ben teki den bakapikin fu den gi Ensrefi. Dat' meki a puru unu nanga bigi makti na ini Egipte. ₃₈A yagi folku di ben bigi èn di ben tranga moro unu, fu ben kan tyari unu go ini a kondre fu den èn fu gi unu a kondre taki na fu unu, leki fa a de now. ₃₉Dat' meki un mus sabi tide èn un no mus fergiti taki MASRA wawan na Gado ini heimel nanga dyaso na grontapu. Boiti En no wan trawan no de. ₄₀Un hori un na den sani di un mus tan du nanga den gebod di mi e gi un tide. Dan a sa go bun nanga unu nanga den pikin fu unu èn un sa libi langa ini a kondre di MASRA, un Gado sa gi unu fu a de fu unu fu têgo.

₄₁Dan Moses poti dri foto na oostsei, abrasei fu a Yordanliba. ₄₂Efu wan sma ben kiri wan trawan sondro espresi èn sondro taki a ben abi a trawan na ati, dan sowan sma ben kan lowe go na wan fu den dri foto disi fu tan na libi. ₄₃Den sma fu a lo fu Ruben ben abi a foto Beser, di ben didon tapu den hei plata presi. A lo fu Gad ben abi a foto Ramot ini Gilead èn a lo fu Manase ben abi a foto Golan ini Basan.

₄₄Disi na a wèt di Moses gi den sma fu Israel: ₄₅den warskow, den sani di den ben mus tan du nanga den sani na san den ben mus tan hori densrefi. Moses ben leri den Israelitisma den sani disi di den ben kmoto na ini Egipte. ₄₆A ben leri den den sani disi di den ben na a tra sei fu a Yordanliba, ini a Yordandal nanga den fesi go na Bet-Peor. Dati ben de a kondre fu Sikon, a kownu fu den Amoritisma, di ben e libi na Hesbon. Moses nanga den Israelitisma ben feti nanga a kownu disi di den ben kmoto na ini Egipte èn den ben wini en. ₄₇Den ben teki a kondre fu en abra, leki fa den ben du nanga a kondre fu Og, a kownu fu Basan. Disi ben de den tu kownu fu den Amoritisma, di ben e libi na a tra sei fu a Yordanliba, na a oostsei. ₄₈A kondre disi ben e bigin na Arower, di didon na syoro fu a Arnonliba, te go miti a Siryonbergi, dati na a Hermonbergi. ₄₉Moro fara a heri Yordandal na abrasei fu a Yordanliba, na a oostsei, te go miti a Sowtuse, di didon na a futu fu a Pisgabergi.