Esekiyel 15

₁MASRA taki nanga mi, A taigi mi taki: ₂Manpikin fu libisma, san de so spesrutu na a udu fu a droifitiki? San yu kan du nanga en di yu no man du nanga a udu fu den sortu bon leki en? ₃Sma no man meki noti nanga en, a no bun srefi fu meki wan aka fu anga krosi. ₄Yere, na ini faya sma e fringi en. Te a faya bron den tu fesi pisi fu en, èn a mindri pisi kon blaka, san kan meki moro fu en? ₅Srefi di a no ben go ini a faya ete sma no ben kan meki noti fu en. O moro te a faya go na en skin, te a bron en, na now sma no o man meki noti nanga en. ₆Dat' meki na disi Masra MASRA e taki: Leki fa Mi teki a droifitiki fu ala den tra udu fu a busi, leki nyanyan gi a faya, na so Mi e du nanga den sma fu Yerusalem. ₇Mi sa tron den feyanti. Awinsi den kmopo libilibi ini a faya, toku den o lasi den libi ini faya. Èn un o sabi taki Mi de MASRA te Mi tron un feyanti. ₈Mi meki a kondre tron wan broko pranasi tu, fu di den du san Mi no wani fu go dini kruktu gado. Na so MASRA e taki.