Israel e tan trangayesi
1Ini a di fu seibi yari di un ben de ini Babilon leki strafuman, tapu a di fu tin dei fu a di fu feifi mun, wantu edeman fu Israel kon na mi fu kon suku rai na MASRA. Di den teki presi, 2MASRA taki nanga mi, A taigi mi taki: 3“Manpikin fu libisma, taigi den edeman fu Israel taki: ‘Na disi Masra MASRA e taki: Na kon un kon suku rai na Mi? Mi e sweri na Mi eigi libi taki Mi no o gi un no wan rai, Masra MASRA e taki.’ 4Krutu den, manpikin fu libisma, krutu den. Meki den ferstan sortu groskin sani den afo fu den du. 5Taigi den taki: ‘Na disi Masra MASRA e taki: Langa na fesi di Mi teki Israel gi Misrefi, Mi meki den, di na den bakapikin fu Yakob, wan pramisi, èn Mi sweri srefi tak' Mi o du san Mi pramisi. Di Mi sori Misrefi na den ini Egipte Mi pramisi den nanga wan sweri taki: Mi na MASRA, a Gado fu unu. 6Mi sweri gi den a ten dati tu tak' Mi o puru den fu Egipte tyari go na wan kondre di Misrefi ben suku gi den, wan gudu kondre, wan kondre nanga bun doti, a moro moi kondre fu ala trawan. 7Mi ben taigi den taki: Iniwan fu unu mus trowe den groskin popki fu den kruktu gado di un e opo un ede e luku, èn un no doti unsrefi nanga den kruktu gado fu Egipte. Mi na MASRA, a Gado fu unu.
8Ma den no ben wani du san Mi taki, den no ben wani arki Mi srefsrefi. No wan fu den trowe den groskin gado popki di den ben e opo den ede luku. Den no tapu fu dini den kruktu gado fu Egipte tu. Ne Mi ben wani lusu a hebi atibron fu Mi na den tapu, Mi ben wani lusu ala a faya atibron fu Mi na den tapu drape ini a kondre Egipte. 9Ma fu Mi no pori a nen fu Mi ini a ai fu den folku pe den ben e libi, Mi puru den na ini Egipte fu sori Misrefi na a fasi dati na den tra folku. 10Mi puru den Israelitisma fu Egipte tyari go ini a bigi dreisabana. 11Mi gi den den sani fu Mi di den mus tan du nanga den sani fu Mi na san den ben mus tan hori densrefi, den sani di e tyari libi gi iniwan sma di e hori den. 12Mi gi den a sabatdei tu leki wan marki mindri Mi nanga den, fu den memre dati Mi, MASRA, santa.
13Ma a pipel fu Israel no ben wani arki ini a bigi dreisabana. Den no ben e du den sani fu Mi di den ben mus tan du èn den sani fu Mi na san den ben mus tan hori densrefi den poti na wan sei, den sani di e tyari libi gi iniwan sma di e hori den. Den ben e pori a sabatdei fu Mi sote, wan sani di ben o meki Mi lusu a hebi atibron fu Mi na den tapu ini a bigi dreisabana fu kiri den. 14Ma Mi no pori a nen fu Mi ini a ai fu den folku pe Mi ben puru den. 15Ma Mi sweri gi den drape ini a bigi dreisabana taki Mi no o tyari den go moro ini a kondre di Mi ben gi den, wan gudu kondre, wan kondre nanga bun doti, a moro moi kondre fu ala trawan, 16bika den poti den sani fu Mi na wan sei na san den ben mus tan hori densrefi, den no du den sani fu Mi di den mus tan du èn den pori a sabatdei fu Mi. Den ati ben e angri na den kruktu gado fu den. 17Ma Mi sari den, èn Mi no kiri den puru na pasi drape ini a bigi dreisabana. 18Baka dati Mi taki nanga den pikin fu den drape ini a bigi dreisabana. Mi taigi den taki: Un no mus du den sani di den bigisma fu unu du, un no mus hori unsrefi na den sani di den poti taki un mus tan hori den èn un no doti unsrefi na den kruktu gado fu den. 19Mi na MASRA, a Gado fu unu. Un du den sani fu Mi di un mus tan du èn un hori unsrefi fin'fini na den sani fu Mi na san un mus tan hori unsrefi. 20Un hori a sabatdei hei. Dati sa de wan marki mindri Mi nanga unu, fu sma kan si dati Mi, MASRA, na a Gado fu unu.
21Ma owktu den pikin fu den ben trangayesi. Den no du den sani fu Mi di den mus tan du èn den no hori densrefi kwet'kweti na den sani fu Mi na san den ben mus tan hori densrefi, den sani di e tyari libi gi iniwan sma di e hori den. Den e pori a sabatdei fu Mi, wan sani di ben o meki Mi lusu a hebi atibron fu Mi na den tapu, fu Mi lusu ala a faya atibron fu Mi na den tapu èn kiri den drape ini a bigi dreisabana. 22Ma Mi no du dati fu Mi no pori a nen fu Mi ini a ai fu den folku di si fa Mi puru den Israelitisma na den mindri. 23Ma Mi sweri ini a bigi dreisabana dati Mi o panya den go na mindri tra folku, dati Mi o panya den go ini difrenti kondre, 24bika den no hori densrefi na den sani fu Mi na san den ben mus tan hori densrefi, den poti den sani fu Mi na wan sei di den mus tan du, den pori a sabatdei fu Mi, èn den opo den ede luku den kruktu gado fu den afo fu den. 25Dan Misrefi gi den sani di no bun fu den tan du, nanga sani na san den mus tan hori densrefi di ben o kiri den. 26Mi meki den doti densrefi nanga den ofrandi fu den, Mi meki den tyari den fosi pikin fu den di ben e gebore leki ofrandi, so den ben o bruya èn sabi taki Mi de MASRA.’
27Dat' meki, manpikin fu libisma, opo yu mofo taigi den taki: ‘Na disi Masra MASRA e taki: Den afo fu unu afrontu Mi tu fu go waka e motyo gi Mi. 28Mi tyari den go na a kondre di Mi ben sweri dati Mi ben o gi den. Ma drape den tyari ofrandi gi kruktu gado loktusei fu ibri lagi bergi di den si, nanga ondro ibri bon di ben lai wiwiri. Ofrandi di ben e meki Mi nyan Mi niri. Drape den ben e tyari den ofrandi di ben e smeri switi èn den ben e trowe win na gron tu leki ofrandi. 29Ne Mi aksi den san na den presi pe den e go tyari ofrandi. Na so den presi dati kisi a nen: hei presi.’
30Dat' meki, taigi a pipel fu Israel taki: ‘Na disi Masra MASRA e taki: Fu sanede un e doti unsrefi leki den afo fu unu fu waka e motyo nanga den groskin kruktu gado? 31Iya, te nanga now un e doti unsrefi fu di un e tyari ofrandi gi den kruktu gado dati, fu di un e bron den pikin fu unu ini faya leki ofrandi gi den, èn fu di un e dini den. Dan fa un wani meki Mi gi un rai dan, pipel fu Israel? Mi e sweri na Mi eigi libi, Masra MASRA e taki, Mi no e gi un no wan rai. 32Èn a sani di un poti na un ede fu du no o psa srefsrefi tu, a sani disi di un e taki: Un wani kon leki den tra folku, leki den sma fu den tra kondre di e dini gado di meki fu udu nanga ston. 33Mi e sweri na Mi eigi libi, Masra MASRA e taki, dati Mi o tiri unu nanga a bigi krakti èn nanga a hebi atibron fu Mi. 34Nanga Mi bigi krakti Mi o puru un na mindri fu den folku nanga ini den kondre pe Mi ben panya un go, dan Mi o lusu a hebi atibron fu Mi na un tapu. 35Mi o tyari un go ini a bigi dreisabana di lontu nanga den difrenti folku, èn miti nanga un drape fesi nanga fesi. Dan Mi o leisi strafu gi unu 36èn strafu unu leki fa Mi ben strafu den afo fu unu ini a bigi dreisabana fu Egipte, Masra MASRA e taki. 37Mi o tiri un tapu wan tranga fasi èn dwengi unu fu un hori unu na den plekti fu a ferbontu di Mi meki nanga unu. 38Mi o prati den wan di trangayesi fu den wan di no trangayesi, nanga den di broko den wèt fu Mi fu den di no broko den. Mi o puru den trangayesi wan ini a kondre pe a feyanti ben tyari den go leki strafuman, ma no fu tyari den kon ini den kondre Israel. Dan un o sabi taki Mi de MASRA.
39Pipel fu Israel, na disi Masra MASRA e taki: Un tyari go, iniwan fu unu dini den kruktu gado fu unu. Ma heri esi un o arki Mi, heri esi un o tapu fu pori a santa nen fu Mi. Un o tapu fu tyari ofrandi gi den kruktu gado fu unu. 40Bika soso tapu Mi santa bergi, tapu a hei bergi fu Israel, Masra MASRA e taki, a pipel fu Israel mus dini Mi. Iniwan fu den, fu alasei fu a kondre. Drape Mi o abi prisiri nanga a fasi fa un o tyari unsrefi. Den moro bun ofrandi, den moro bun sani di un abi fu gi, un mus poti aparti gi Mi. 41Te Mi puru un mindri den folku pe un e libi now, un o furu Mi nanga prisiri leki fa wan ofrandi nanga wan switi smeri e du. Mi o tyari un kon na wan fu den kondre pe Mi ben panya un go, èn so den folku o si dati Mi santa. 42Èn unu o si dati Mi de MASRA, te Mi tyari un go ini Israel, a kondre di Mi ben sweri gi den afo fu unu dati Mi ben o gi den. 43Drape un o prakseri ala den syen sani di un du, nanga fa un ben doti unsrefi. Dan un o fuga fu unsrefi fu ala den ogri di un du. 44Èn dan, pipel fu Israel, te Mi o du nanga unu leki fa fiti a nen fu Mi, èn no san fiti den pori nanga doti sani di un e du, dan un o sabi taki Mi de MASRA, Masra MASRA e taki.’ ”
A faya fu zuidsei
45MASRA taki nanga mi, A taigi mi taki: 46“Manpikin fu libisma, poti yu fesi go na zuidsei. Taki furu go na a sei dati, taigi den busi fu a kondre dati na zuidsei san Mi e gi yu fu taki. 47Taigi a busi fu zuidsei taki: ‘Arki a boskopu fu MASRA: Na disi Masra MASRA e taki: Yere, Mi e sutu faya gi yu, wan faya di o bron ibri grun bon nanga ibri drei bon. A hebi faya disi no o man dede, èn ala sma, fu zuidsei go te na noordsei, o firi a faya fu a faya dati ini den fesi. 48Èn ala libisani o si dati na Mi, MASRA, leti a faya dati, a faya no o dede.’ ” 49Ma dan mi, Esekiyel, kragi taki: “Tye, Masra MASRA, sma e taki fu mi taki: ‘A e taki soso na ini raitori.’ ”
